1. Եւ ի ժողով հրամայեաց կոչել Դաւիթ զամենայն իշխանս Իսրայէղացւոց զզաւրագլուխս գնդաց գնդաց եւ զզաւրագլուխս վիճակաց վիճակաց, զամսապահս, շաբաթապահս, զաւրասպասիկս, սպասաւորս արքունի, զիշխանս իշխանս, հազարաւր հարիւրաւոր գնդաց, գանձապետս գանձից եւ որ ի վերայ ամենայն ընչից ստացուածոց նորա էին, զգաւառապետս գաւառապետս, եւ զամենայն պետս արքունի, զորդիսն անգամ զարքայի ներքինեաւքն հանդերձ զամենայն զաւրագլուխս զաւրաւորացն, մեծամեծաւք, պետաւք, մարտիկ նահատակաւք հանդերձ եւ եկին ժողովեցան յԵրուսաղէմ,
2. ապա եկն եկաց Դաւիթ արքայ ի մէջ ժողովրդոց խաւսել կալաւ առաջի եւ ասէ. Արք եղբարք իմ, ժողովուրդ իմ, լուարուք ինձ: Հաճոյ եղեւ դնել ինձ ի սրտի, ի մտի իմում շինել տաճար հանգստեան տապանակին կտակարանաց Տեառն եւ հաստատութիւն հանգստեան, անոտնէի ոտիցն Աստուծոյ մերոյ, եւ պատրաստեցի ես զամենայն նիւթ շինածոյ որ զինչ պիտ էր զոսկի եւ զարծաթ, զպղինձ եւ զարոյր եւ զերկաթ եւ փայտ բազում յոյժ:
3. Ապա խաւսել սկսաւ ընդ իս Տէր Աստուած իմ եւ ասէ ոչ եթէ դու շինեսցես ինձ տուն անուան զանուն իմ ի վերայ նորայ, զի դու այր պատերազմող էիր եւ արիւնք բազումք հեղան ի ձեռս քո:
4. Արդ այս յայտ է զի ընտրեաց Տէր Աստուած յամենայն ազգաց զտունդ Իսրայէղի եւ զՅուդայ կանգնել զթագաւորութիւնս յաւիտեանս, եւ ընդ Յուդայ եւ ընդ Իսրայէղ, ընտրեաց Տէր զՅուդայ եւ ի տանէ Յուդայ ընտրեաց Տէր զտուն հաւր իմոյ, եւ ի տանէ հաւր իմոյ ի մէջ եղբարց իմոց ընդիս հաճեցաւ, զի թագաւորեցուսցէ զիս ի վերայ ամենայն որդոցդ Իսրայէղի,
5. եւ ի մէջ ամենայն որդւոցն իմոց զի բազում որդիս ետ ինձ Աստուած: Ընդրեաց զՍողովմովն որդի իմ նստուցանել յաթոռ թագաւորութեան Տեառն ի վերայ ամենայն Իսրայէղի:
6. Եւ ասէ ցիս Աստուած. Սողոմովն որդի քո շինեսցէ զտաճարն իմ եւ զսրահսն իմ, զի ընտրեցի ես զնա լինել ինձ զնա որդի, եւ ես եղէց նորա հայր
7. եւ պատրաստեցից ես զարքայութիւն նորա մինչչեւ յաւիտեանս ժամանակաց, եթէ կարասցէ յաղթել առնել եւ պահել զպատուիրանս իմ, եւ զիրաւունս իմ, իբրեւ յաւր յայս
8. արդ դիցէ առաջի աչաց իւրոց ամենայն Իսրայէղ եւ ունկնդիր լիցին Տեառն Աստուծոյ մերում խնդրել եւ պահել զամենայն պատուիրանս Տեառն Աստուծոյ մերոյ, զի ժառանգել կարասջիք զերկիրն բարեաց եւ ժառանգեցուսջիք զորդիս ձեր մինչչեւ յաւիտեանս ժամանակաց
9. եւ արդ Սողոմովն որդեակ իմ ծանիր դու զՏէր Աստուած հարցն քոց, եւ ծառայեաց դու նմա կատարեալ սրտիւ, մտադիր մտաւք զի զամենայն սիրտս քննէ Տէր, եւ զխորհուրդս մաց ճանաչէ, եւ եթէ խնդրեսցես դու զնա, գտցի քեզ, եւ եթէ թողցես զնա, լքցէ քեզ մինչչեւ ի սպառ,
10. արդ տես զի ընտրեաց զքեզ ի շինել նմա տուն ի սրբութեան: Քաջալերեաց զաւրացիր եւ ի գործ կաց
11. ապայ ետ Դաւիթ Սողոմովնի որդոյ իւրում աւրինակս աւրինակս տաճարին եւ սենեկացն, գանձանակացն եւ վերնատանցն շտեմարանացն ներքնոցն եւ արտաքնոցն, վերնատան եւ տաճարին քաւութեանց
12. եւ զաւրինակ զամենայնի որպէս եդ ի նմա ոգին, սրահիցն եւ զգաւթացն զամենայն սենեկացն որ շուրջ զշտեմարանաւքն Տեառն Աստուծոյ էին:
13. Զտան գանձին նուիրաց զմասանցն զվիճակացն զշաբաթաւորացն, զքահանայիցն եւ զղեւտացւոցն, եւ որ յամենայն ի գործ ինչ պաշտաման տանն Տեառն զտուն գանձին. կահին կարասոյն որ առ ձեռին ապաս էր պաշտամանն Տեառն,
14. ի կշիռ յոսկոյն եւ ի մէտ կշռոցն ըստ իւրաքանչիւր անաւթոց որպէս եւ պաշտէր ի կշիռ արծաթոյն,
15. եւ ի մէտ ըստ ամենայն կահի կարասոյն որպէս եւ պաշտէր ըստ բաւականի, ըստ կշիռ ոսկի աշտանակացն, եւ ճրագարանաւքն, եւ բազմակալաւքն, հանդերձ իւրեանց ոսկի կշռով ի ճրագարան մի եւ ի բազմակակալս,
16. եւ յաշտանակսն, ոսկի եւ արծաթի, աշտանակացն, եւ ճրագարանացն, եւ բազմակակալացն կշիռ ետ ցնա ճշմարտեալ նոյնպէս զկշիռ սեղանոյն ոսկոյ սեղանոյն նոյնպէս եւ շամփրոցն,
17. եւ մսահանացն, տաշտիցն ոսկեացն, եւ ճաշակացն, եւ մաղզմայիցն ոսկոցն, զկշիռ Քէփուրացն եւ զՔեփուրն, եւ զկշիռ ոսկոյն, եւ զարծաթոյ իւրաքանչիւր կշռով
18. եւ զնիւթ ոսկէ սեղանոյ խնկոցն կշռով յոսկոյ քաջէ: Եւ եցոյց նմա զաւրինակ կառանց քերովբէիցն տարածելով թեւովքն որ վերացեալ թռուցեալ տարածեալ խոնարհեալ, հովանի ունէր ի վերա տապանակի կտակարանացն Տեառն,
19. զամենայն գրով ի ձեռանէ Տեառն: Ետ Դաւիթ ի ձեռս Սողոմովնի ըստ բաւականի իմաստութեան մտաց իւրոց, զի ի մտի դիցէ
զամենայն գործած զաւրինակացն:
20. Եւ ասէ Դաւիթ ցՍողոմովն որդի իւր քաջալերեաց զաւրացիր, գործեա եւ մի զանգիտեր, զի Տէր Աստուած քո ընդ քեզ է: Ոչ թողցէ զքեզ եւ ոչ ընդ վայր հարցէ մինչչեւ գործեսցես, կազմեսցես գործ պաշտաման տանն Տեառն զաւրինակ տաճարին եւ տան նորա, եւ քակքով նորա, եւ վերնատանց նորա եւ ներքին գանձանակին եւ տանն քաւութեան եւ զաւրինակ տանն Տեառն:
21. Ահաւասիկ դասք դասք բաժանիցն շաբաթաւոր քահանայիցն աւր սպասիկ ղեւտացւոցն յամենայն գործ կարգի տան Տեառն եւ ընդ քեզ աւադիկ յամենայն ի գործս քո ամենայն յաւժարամիտ յամենայն կարս կամակարութեան իմաստութեան ըստ ամենայն ճարտարութեան եւ իշխանք եւ ամենայն ժողովք զաւրացն ամենեքին ըստ բանի քում:
Հաղորդում կայքում սխալի վերաբերյալ
Տվյալ հատվածում առկա է սխալ: