1․ Եւ եղեւ յետ այսորիկ հարկանէր վանէր Դաւիթ զայլազգիսն, եւ հանէր ի ձեռաց նոցա զԳեթն եւ զդստերս նորա ի ձեռաց այլազգեաց,
2․ հարկանէր վանէր զՄովաբն, եւ լինէր Մովաբ ծառայ Դաւթի պաշտել պատարագաւք:
3․ Ապա հարկանէր վանէր Դաւիթ զԱդրազագեր արքա Սուբայ յԵմաթ ի ժամանակի իբրեւ յարուցեալ գայր դնել զձեռն իւր ի վերայ գետոյն Եւփրատու,
4․ եւ առնոյր Դաւիթ զնոսայ հազար կառս ոսկիապատ, եւ եւթն հազար հեծեալ, եւ քսան հազար հետեւայկ, եւ քակէր քակտէր զայն, եւ թողոյր իւր անտի հարիւր կառս ի սպաս:
5․ Ապա դարձեալ գայր հասանէր արքայ յԱսորեստանի կողմանցն Դամասկոսի ի թիկունս Ադրազարու արքայի Սուբայ, դարձեալ հարկանէր վանէ Դաւիթ զասորիսն ի քսան եւ երկու հազարս այր պատերազմող, եւ զաշխարհն ի հարկի կացուցանէր,
6․ եւ շինէր պարհակ ի Դամասկոս ասորեստանեաց, եւ կային նմա ի ծառայութեան, բերել նմա պատարագս հանապազորդս:
․
7 Եւ առնոյր Դաւիթ զմանեակսն ոսկիս ի ծառայիցն Ադրազարու եւ բերէր զնոսա յԵրուսաղէմ,
8․ եւ ի Տաբաթայ եւ յայլոց ընտիր ընդիր քաղաքացն Ադրազարու, առնոյր Դաւիթ արծաթ եւ արոյր, եւ պղինձ բազում յոյժ, ուստի եւ առնէր իսկ Սողովմոն զծովն պղնծի, եւ զսիւնս պղընձիս, եւ զայլս ամենայն սպասն պղնձի:
9․ Ապա իբրեւ լուաւ Թովայ արքայ Եմաթայ, եթե վանեաց սատակեաց Դաւիթ զամենայն զաւրութիւն
Ադրազարու արքայի Սուբայ,
10․ եւ առաքեաց նա զԱգորամ որդի իւր առ Դաւիթ, աղաչել զնա ի խաղաղութիւն, եւ աւրհնել զնա, զի հարկանէր վանէր զԱդրազադէր, զի այր էր նա խռովիչ մարտիկ պատերազմող, եւ վանէր զԱդրազադեր Դաւիթ, եւ առնոյր զամենայն սպաս զոսկոյ եւ զարծաթոյ, եւ զպղընձոյ
11․ եւ բերէր Դաւիթ զամենայն սպասն զոսկւոյ եւ զարծաթոյ յամենայն ազգաց հեթանոսաց յԻդումեացացն Ամովնայ, եւ այլոց
ազգացն Ամաղեկացւոցն:
12․ Եւ Աբեսայ որդի Շարուհեայ հարկանէր վանէր զկողմանս Եդոմայեցւոց ի հովիտս
աղտիցն ութ եւ տասն հազար,
13․ եւ անդ շինէր պարհակ եւ պարհակապանս կարգէր, եւ կային Եդոմայեցիքն ի ծառայութեան Դաւթի յամենայնի յոր եւ հրամայէր նոցա,
14․ եւ թագաւորեաց Դաւիթ ամենայնիւ ի վերայ Իսրայէղի, եւ առնէր զիրաւունս եւ զարդարութիւն յամենայն ժողովրդեանն,
15․ եւ Յովաբ որդի Շարուհեա սպարապետ նորա, եւ Յովսափատ որդի Աքիղովթ յիշատակաց դպիր,
16․ եւ Աքիտովփ եւ Աբիմեղեք որդիք Սադովկայ քահանայք նորա, եւ Շուշա դպրապետ նորա,
17․ եւ Բանէ որդի Յուդայեէ, ի վերայ ելի մտի, եւ որդիքն Դաւթի առաջինքն, ի ձեռն թագաւորի:
Հաղորդում կայքում սխալի վերաբերյալ
Տվյալ հատվածում առկա է սխալ: