1․ Եւ բերին մուծին եդին զապանակն կտակարանաց, եւ զենին զուարակս եւթն եւ Դաւիթ զգեցեալ էր Բեհեզ, եւ հաստատեցին զտապանակն ի մէջ խորանին, զոր կանգնեաց նմա Դաւիթ, եւ մատուցին նմա ողջակէզս պատարագաց, զվասն խաղաղութեանն եւ փրկութեանն առաջի Տեառն,
2․ եւ կատարէր Դաւիթ զողջակէզսն պատարագաց զվասն խաղաղութեանն եւ փրկութեան:
3․ Եւ սկսաւ աւրհնել անուամբ Տեառն եւ դնէր Դաւիթ մասունս մասունս ամենայն Իսրայէլացի մարդոյ, յարանց մինչչեւ ցկանայս, առ այր քաքար մի, եւ մանգսու մի,
4․ եւ կտապ մի, եւ կարգեաց Դաւիթ առաջի տապանակին կտակարանաց երգիչս, եւ աւրհնիչս, որ կան խոստովան լինել զՏէր Աստուած Իսրայէլի եւ
5․ Ասափ զաւրագլուխ, եւ երկրորդ նորին Զաքարիաս, եւ Յէիէլ եւ Շէմիրամովթ եւ Յմսյել, եւ Մատաթի, եւ Եղիաբ, եւ Բանէ, եւ Աբղագոմ, եւ Ոսիայ, եւ սրինգս
6․ եւ փողս առաջի տապանակին կտակարանացն Աստուծոյ:
7․ Յաւուր յայնմիկ կարգեաց Դաւիթ ի սկզբանն աւրհնել ի ձեռն Յասափա, եւ եղբարց նորա:
8․ Խոստովան եղերուք ասէ Տեառն, եւ կարդացէք զանուն նորա, պատմեցէք զգործս նորա մեծամեծս,
9․ աւրհնեցէք զնա, եւ պատմեցէք ամենայն հեթանոսք զսքանչելիս նորա զոր արար,
10․ ուրախ լիցին սիրտք որ խնդրեն զհաճոյս նորա,
11․ զաւրացարուք եւ խնդրեցէք զերեսս նորա յամենայն ժամ,
12․ յիշեցեք զսքանչելիս նորա զոր արար, զնշանս եւ զարուեստս, եւ զիրաւունս բերանոյ նորա,
13․ զաւակք Աբրահամու, որդիք Յակովբայ ընտրեալք նորա,
14․ նայ ինքն է Տէր Աստուած մեր յամենայն երկրի են իրաւունք նորա,
15․ յիշատակ արար յաւիտենից ուխտին իւրում, բան զոր պատրաստեաց ի հազար ամ
16․ ուխտ զոր եդ ընդ Աբրահամու, եւ զերդումն իւր ընդ Սահակայ,
17․ հաստատեաց զհրամանս իւր առ Յակովբ եւ առ Իսրայէլ զուխտ իւր յաւիտենից,
18․ ձեզ տաց ասէ զերկիրն քանանացւոց, վիճակ ժառանգութեան ձերոյ,
19․ զի էին նոքա սակաւ թուովն, նշդեհք եւ պանդուխտք ի նմին,
20․ գնացին ազգէ յազգի թագաւորութենէ ի ժողովուրդ յայլ,
21․ ոչ ետ թոյլ մարդոյ մեղանչել նոցա, կշտամբեաց զթագաւորս վասն նոցա:
22․ Մի մերձենայք ասէ յաւծեալս իմ, եւ ի մարգարէս իմ ասէ, մի մեղանչէք:
23․ Աւրհնեցէք զՏէր ամենայն երկիր, պատմեցէք աւր ըստ աւրէ զփրկութիւն նորա:
24․ Պատմեցէք ի հեթանոսս զփառս նորա յամենայն ժողովուրդս սքանչելիս նորա:
25․ Մեծ է Տէր եւ աւրհնեալ է յոյժ, ահարկու է նա ի վերայ ամենայն կռոց,
26․ զի ամենայն կուռք հեթանոսաց դեւք են, այլ Տէր զերկինս արար,
27․ աւրհնութիւն եւ մեծ վայելչութիւն առաջի նորա, զաւրութիւն եւ խոստովանութիւն ի սրբութեան նորա:
28․ Տուք Տեառն տոհմք ազանց,
29․ տուք Տեառն փառս անուան նորա, առէք պատարագս եւ մտէք առաջի նորա, երկիրպագէք Տեառն, որ բնակեալ է ի սրբութեան իւրում,
30․ երկիցեն յերեսաց նորա ամենայն երկիր զի հաստատեաց զաշխարհ զի մի սասանեսցի:
31․ Ուրախ լիցին երկինք եւ ցնծասցէ երկիր, պատմեսցեն հեթանոսք թէ Տէր թագաւորեաց:
32․ Խռովեսցի ծով լրիւ իւրով ցնծասցէ անապատն եւ փայտն ագարակի, եւ ամենայն ինչ որ իցէ ի նմա:
33․ Յայնժամ ցնծասցեն ամենայն ծառք անտառի յերեսաց Տեառն զի գայ, զի հասեալ է Տէր դատել զերկիր:
34․ Խոստովան եղերուք Տեառն զի բարի է, զի յաւիտեան է ողորմ նորա:
35․ Ասացէք եթէ փրկեաց զմեզ Աստուած, եւ ժողովեաց զմեզ ի հեթանոսաց զի աւրհնեսցուք զանուն քո սուրբ, եւ պարծեսցուք յամենայն յաւրհնութիւնս քո:
36․ Աւրհնեալ է Տէր Աստուած Իսրայէղի յաւիտենից եւ ասասցէ ամենայն ժողովուրդն. Ամեն: Եւ աւրհնէին յաւրհնութիւնս յայս զՏէր Աստուած
37․ եւ թողին անդ առաջի տապանակին կտակարանաց Տեառն, եւ զԱսափ եւ զեղբարս նորա, զի պաշտիցեն առաջի տապանակին յամենայն ժամ միաբան աւրըստաւրէ,
38․ զաւր հանապազ եւ զԱբեդովն եւ զեղբարս նորա.ԿԸ., եւ Աբեդաթ եւ Իդիթում եւ որդի Ուս ի դարապանս,
39․ եւ Սադովքն քահանայ եւ զեղբարսն առաջի վրան ժամուն Տեառն, ի Բամաա որ ի Գաբաւովննէ,
40․ զի մատուցանիցեն պատարագ ողջակիզաց Տեառն ի վերայ ողջակիզաց սեղանոյն զայգունն, եւ զերեկուն ըստ ամենայնի որպէս գրեալ է ըստ աւրինաց Տեառն, որպէս եւ ետ պատուէր որդւոցն Իսրայէղի ի ձեռն Մովսէսի ծառայի Տեառն: Եւ ընդ նոսա Եման, եւ Իդիթովն, եւ այլքն որ ընդրեալ էին յանուանէ. աւրհնել զՏէր զի յաւիտեան է ողորմ նորա,
41․ եւ ընդ նոսա Եման, եւ Իդիթովմ, եւ Աբեդովմ, եւ եղբարք իւր.
42․ եւ փող, եւ սրինգ, եւ յերգս քնարի երգել Տեառն Աստուծոյ, եւ Իգիթովմ դարապետ ի վերայ խորանին, տապանակին կտակարանաց
43․ եւ խաղաց գնաց ժողովուրդն ամենայն յիւրաքանչիւր տեղիս գնաց եկն եւ Դաւիթ ի տուն իւր աւրհնել զնա:
Հաղորդում կայքում սխալի վերաբերյալ
Տվյալ հատվածում առկա է սխալ: