1. Ի սկզբան թագաւորութեան Յովակիմայ որդւոյ Յովսիայ արքայի Յուդայ. եղեւ բանս այս ի Տեառնէ՝ եւ ասէ.
2. Այսպէս ասէ Տէր. Կաց ի սրահի տանն Տեառն, եւ մարգարէասցիս ամենայն տանն Յուդայ ոյք գայցեն երկիր պագանել ի տանն Տեառն. զամենայն բանսդ զոր կարգեցի առ քեզ մարգարէանալ նոցա, մի հատանիցես ինչ ի բանիցդ։
3. Թերեւս լուիցեն, եւ դարձցին իւրաքանչիւր ի ճանապարհէ իւրմէ չարէ. եւ մեղմացայց ես ի չարեացն զոր խորհիմ ես առնել նոցա վասն չարութեան գնացից նոցա։
4. Եւ ասասցես ցնոսա. Այսպէս ասէ Տէր. Եթէ ոչ լսիցէք ինձ գնալ յաւրէնս իմ զոր ետու յանդիման ձեր,
5. լսել բանից ծառայից իմոց մարգարէից՝ զոր ես առաքեցի առ ձեզ կանխաւ. եւ առաքեցի՝ եւ ոչ լուարուք։
6. եւ արարից զտունդ զայդ իբրեւ զՍելովմ, եւ զքաղաքս տաց յանէծս ամենայն ազգաց երկրի։
7. Եւ լուան քահանայքն եւ սուտ մարգարէքն՝ եւ ամենայն ժողովուրդն ի խաւսել Երեմիայի զբանս զայսոսիկ ի տանն Տեառն։
8. Եւ եղեւ ի դադարել Երեմիայի ի խաւսիցն՝ ըստ ամենայնի զոր հրաման ետ նմա Տէր խաւսել առ ամենայն ժողովուրդն։ կալան զնա քահանայքն եւ սուտ մարգարէքն եւ ամենայն ժողովուրդն՝ եւ ասեն. Մահու մեռցիս.
9. զի մարգարէացար յանուն Տեառն, եւ ասացեր՝ թէ իբրեւ զՍելովմ եղիցի տունս այս, եւ քաղաքս աւերեսցի ի բնակչաց։ եւ կուտեցաւ ժողովուրդն ի վերայ Երեմիայի ի տան Տեառն։
10. Եւ լուան իշխանքն Յուդայ զբանս զայսոսիկ, եւ ելին ի տանէ թագաւորին ի տունն Տեառն. եւ նստան առաջի դրանն Տեառն նորոյ։
11. Եւ ասեն քահանայքն եւ սուտ մարգարէքն ցիշխանսն՝ եւ ցամենայն ժողովուրդն. Դատաստան մահու է առնդ այդմիկ, զի մարգարէացաւ զքաղաքէս զայսմանէ, որպէս ձերովք իսկ ակընջաւք լուարուք։
12. Եւ ասէ Երեմիա ցամենեսին ցիշխանսն եւ ցամենայն ժողովուրդն. Տէր առաքեաց զիս մարգարէանալ ի վերայ տանդ այդորիկ՝ եւ ի վերայ քաղաքիս զամենայն բանսդ զոր լուարուք։
13. եւ արդ՝ ուղղեցէք զճանապարհս ձեր՝ եւ զգործս ձեր, եւ լուարուք ձայնի Տեառն Աստուծոյ ձերոյ. եւ մեղմասցի Տէր ի չարեացն ձերոց՝ զոր խաւսեցաւ ի վերայ ձեր։
14. եւ ես աւասիկ կամ ի ձեռս ձեր, արարէք ընդ իս որպէս եւ ձեզ աւգուտ եւ լաւ իցէ։
15. Բայց գիտելով գիտասջիք՝ զի թէ սպանանէք դուք զիս՝ արիւն անպարտ արկանէք ի վերայ ձեր, եւ ի վերայ քաղաքիս այսորիկ, եւ ի վերայ բնակչաց սորա։ զի ճշմարտութեամբ առաքեաց զիս Տէր առ ձեզ՝ խաւսել յականջս ձեր զամենայն բանս զայսոսիկ։
16. Եւ ասեն իշխանքն եւ ամենայն ժողովուրդն ցքահանայս եւ ցսուտ մարգարէսն. Ոչ է դատաստան մահու առնդ այդորիկ. զի յանուն Տեառն Աստուծոյ խաւսեցաւ առ մեզ։
17 Յոտն կացին արք ի ծերոց երկրին, եւ ասեն ցամենայն ժողովս ժողովրդոցն։
18. Միքիէ Մորստացի մարգարէանայր յաւուրս Եզեկիայ արքայի Յուդայ. խաւսեցաւ ընդ ամենայն ժողովրդեանն Յուդայ՝ եւ ասէ. Այսպէս ասէ Տէր զաւրութեանց. Սիովն իբրեւ զագարակ արաւրադիր լիցի, եւ Երուսաղէմ՝ իբրեւ զհիղս մրգապահաց, եւ լեառն տանդ՝ եղիցի իբրեւ զանտառ մայրւոյ։
19. Միթէ սպանանելով սպա՞ն զնա Եզեկիա արքայ Յուդայ՝ եւ ամենայն Հրէաստան. ոչ ապաքէն զահի հարան ի Տեառնէ, եւ խնդրեցին յերեսաց Տեառն. եւ դադարեաց Տէր յամենայն չարեացն զոր խաւսեցաւ ի վերայ նոցա։ Եւ մեք արարաք չարիս մեծամեծ յանձինս մեր։
20. եւ այր մի մարգարէանայր յանուն Տեառն, Ուրիայ որդի Սամեայ ի Կարիաթարիմայ. եւ մարգարէացաւ ի վերայ քաղաքիս այսորիկ, եւ ի վերայ երկրիս այսորիկ ըստ ամենայն բանից Երեմիայի։
21. Եւ լուաւ արքայ Յովակիմ, եւ ամենայն զաւրաւորք իւր, եւ ամենայն իշխանք զամենայն բանս նորա, եւ խնդրէին սպանանել զնա։ Եւ լուաւ Ուրիա, երկեաւ՝ եւ փախեաւ եւ գնաց յերկիրն Եգիպտացւոց։
22. եւ առաքեաց արքայ Յովակիմ արս յԵգիպտոս. զԵղնաթան որդի Աքովբերայ եւ արս ընդ նմա յԵգիպտոս։
23. եւ հանին զնա անտի՝ եւ ածին առ արքայն Յովակիմ, եւ սպանին զնա սրով. եւ ընկէց ի շիրիմ որդւոց ժողովրդեան իւրոյ։
24. Բայց ձեռն Աքիկամայ որդւոյ Սափանայ՝ էր ընդ Երեմիայի. զի մի մատնեսցի ի ձեռս ժողովրդեանն սպանանել զնա։
Հաղորդում կայքում սխալի վերաբերյալ
Տվյալ հատվածում առկա է սխալ: