1. Բանն որ եղեւ առ Երեմիա ի Տեառնէ՝ յաւուրս Յովակիմայ որդւոյ Յովսիայ արքայի Յուդայ՝ եւ ասէ։
2. Երթ ի տուն Ռաքաբիմայ, եւ կոչեա զնոսա՝ եւ ածցես ի տուն Տեառն ի մի ի սրահից անտի, եւ արբուսցես նոցա գինի։
3. Եւ ածի զՅեքոնիա որդի Երեմայ որդւոյ Քարասինեայ, եւ զեղբարս նորա, եւ զամենայն որդիս նորա. եւ զամենայն տուն Ռաքաբիմայ
4. ածի ի տուն Տեառն, ի դահլիճ որդւոյն Անանայ որդւոյ Գոդողեայ առն Աստուծոյ. որ էր մերձ ի տուն իշխանացն, ի վերայ ապարանիցն Մայասայ՝ որդւոյ Սելովմայ վտառապահի։
5. Եւ եդի առաջի որդւոցն Ռաքաբիմայ աման մի լի գինւով՝ եւ բաժակս. եւ ասեմ ցնոսա. Արբէք գինի այտի։
6. Եւ ասեն. Ոչ արբցուք գինի. զի Յովնադաբ որդի Ռեքեբայ հայր մեր պատուիրեաց մեզ՝ եւ ասէ. Մի ըմպիցէք գինի դուք՝ եւ որդիքն ձեր մինչեւ ցյաւիտեան։
7. եւ մի շինիցէք տունս, եւ մի սերմանիցէք սերմանս, եւ մի տնկէք այգիս. այլ ի վրանս բնակիցէք զամենայն աւուրս ձեր, զի կայցէք աւուրս բազումս յերկրիդ յորում շրջիցիք դուք ի դմա։
8. Եւ լուաք բարբառոյ Յովնադաբայ որդւոյ Ռեքեբայ հաւր մերում՝ ըստ ամենայնի զոր պատուիրեաց մեզ չըմպել գինի զամենայն աւուրս մեր. մեք՝ եւ կանայք մեր՝ եւ ուստերք եւ դստերք մեր։
9. եւ ոչ շինել տունս՝ եւ ոչ բնակել ի նոսա. եւ այգիք՝ եւ անդք՝ եւ սերմանիք ոչ եղեն մեր։
10. եւ բնակեցաք վրանաւք. եւ լուաք եւ արարաք ըստ ամենայնի՝ զոր պատուիրեաց մեզ Յովնադաբ հայր մեր։
11. Եւ եղեւ իբրեւ ել Նաբուքոդոնոսոր արքայ բաբելացւոց յերկիրս յայս՝ ասացաք. Ելցուք եւ մտցուք յԵրուսաղէմ, յերեսաց զաւրուն Քաղդէացւոց, եւ յերեսաց զաւրուն ասորեստանեայց, եւ բնակեսցուք անդ։
12. Եւ եղեւ բան Տեառն առ իս՝ եւ ասէ.
13. Այսպէս ասէ Տէր զաւրութեանց՝ Աստուած Իսրայէլի. Երթ եւ ասա ցարս Յուդայ՝ եւ ցբնակիչս Երուսաղէմի. ո՞չ առնուցուք խրատ լսել բանից իմոց՝ ասէ Տէր։
14. Կացին ի բանի որդիքն Յովնադաբայ որդւոյ Ռեքեբայ զոր պատուիրեաց որդւոց իւրոց, չըմպել գինի, եւ ոչ արբին մինչեւ ցայսաւր. զի լուան պատուիրանի հաւրն իւրեանց։ Եւ ես խաւսեցայ ընդ ձեզ կանխաւ, եւ ոչ լուարուք ինձ։
15. եւ առաքեցի առ ձեզ զամենայն ծառայս իմ զմարգարէս կանխեալ եւ առաքեալ. բամ դարձարուք իւրաքանչիւր ի ճանապարհէ իւրմէ չարէ, եւ լաւագոյնս արարէք զիրս ձեր. եւ մի երթայք զհետ աստուածոց աւտարաց ծառայել նոցա. եւ բնակիցէք յերկրիդ զոր ետու ձեզ եւ հարցն ձերոց. եւ ոչ խոնարհեցուցէք զունկն ձեր, եւ ոչ լուարուք ինձ։
16. Եւ կացուցին որդիքն Յովնադաբայ որդւոյ Ռեքեբայ զպատուէր հաւրն իւրեանց զոր պատուիրեաց նոցա. եւ ժողովուրդդ այդ ոչ լուան ինձ։
17. Վասն այդորիկ այսպէս ասէ Տէր զաւրութեանց Աստուած Իսրայէլի. Ահաւադիկ ես ածից ի վերայ Յուդայ՝ եւ ի վերայ ամենայն բնակչաց Երուսաղէմի զամենայն չարիս զոր խաւսեցայ ի վերայ նոցա. փոխանակ զի խաւսեցայ առ նոսա՝ եւ ոչ լուան. կոչեցի զնոսա՝ եւ ոչ ետուն ինձ պատասխանի։
18. Եւ առ տուն Ռեքեբա ասաց Երեմիա. Վասն այդորիկ այսպէս ասէ Տէր զաւրութեանց Աստուած Իսրայէլի. Փոխանակ զի լուան որդիք Յովնադաբայ որդւոյ Ռեքեբայ պատուիրանի հաւր իւրեանց. եւ պահեցին զամենայն հրամանս նորա, առնել ըստ ամենայնի զոր պատուիրեաց նոցա հայրն իւրեանց։
19. Վասն այնորիկ այսպէս ասէ Տէր զաւրութեանց Աստուած Իսրայէլի. Մի պակասեսցէ այր յորդւոցն Յովնադաբայ որդւոյ Ռեքեբայ յանդիման կալ առաջի իմ զամենայն աւուրս երկրիդ։
Հաղորդում կայքում սխալի վերաբերյալ
Տվյալ հատվածում առկա է սխալ: