1. Ո՛ տայր զգլուխս իմ ջուր, եւ զաչս իմ աղբեւրս արտասուաց. եւ լայի զժողովուրդս զայս զտիւ եւ զգիշեր, եւ զվիրաւորեալս դստեր ժողովրդեան իմոյ։
2. Ո՛ տայր ինձ յանապատի դոյզն աւթեւանս, եւ թողուի զժողովուրդ իմ, եւ գնայի ի դոցանէ. զի ամենեքեան շնան՝ առհասարակ ժողովուրդք արհամարհողաց։
3. Եւ լարեցին զլեզուս իւրեանց իբրեւ զաղեղն։ ստութիւն՝ եւ ո՛չ հաւատք զաւրացան ի վերայ երկրի. զի ի չարեաց ի չարիս ելին, եւ զիս ո՛չ ծանեան՝ ասէ Տէր։
4. Իւրաքանչիւր յընկերէ իւրմէ զգոյշ լերուք, եւ յեղբարս ձեր մի յուսայք։ Զի ամենայն եղբայր՝ խաբելով խաբէ, եւ ամենայն բարեկամ նենգութեամբ գնայ։
5. Իւրաքանչիւր զբարեկամ իւր այպանեն, եւ ճշմարտութիւն ո՛չ խաւսին. ուսաւ լեզու նոցա խաւսել ստութիւն. զրկեցին, եւ ո՛չ դադարեցին
6. ժողովել վաշխս ի վերայ վաշխից, եւ նենգութիւն ի վերայ նենգութեանց, եւ ոչ կամեցան զիս ճանաչել՝ ասէ Տէր։
7. Վասն այնորիկ այսպէս ասէ Տէր՝ Տէր զաւրութեանց. Ահաւադիկ ես ջեռուցից զնոսա, եւ փորձեցից զնոսա, զի արարից յերեսաց չարեաց դստեր ժողովրդեան իմոյ
8. Բալիստր խոցոտիչ։ լեզուք նոցա նենգաւորք. եւ բանք բերանոյ նոցա ընդ ընկերի իւրում խաւսին զխաղաղութիւն, եւ ի սրտի իւրում ունին զթշնամութիւն։
9. Միթէ ի վերայ այսոցիկ ո՞չ արարից այցելութիւն՝ ասէ Տէր. կամ յազգէ այնպիսւոյ ո՞չ խնդրեսցէ վրէժ անձն իմ։
10. Կոծ առէք ի վերայ լերանց, եւ ձայնս ի վերայ բլրոց անապատի. ողբացէք, քանզի պակասեցին առ ի չգոյէ մարդկան անցաւորաց, եւ ոչ լուան զձայնս ստացուածոց. ի թռչնոց երկնից մինչեւ ցանասունս յիմարեցան եւ գնացին։
11. Եւ տաց զԵրուսաղէմ ի գերութիւն եւ ի բնակութիւն վիշապաց. եւ զքաղաքս Յուդայ եդից յապականութիւն, առ ի չգոյէ բնակչաց։
12. Ո՞վ է այր իմաստուն՝ եւ ի միտ առցէ զայս, եւ առ ո՞ւմ բան բերանոյ Տեառն, պատմեսցէ մեզ թէ վասն է՞ր կորեաւ երկիր, լքաւ իբրեւ զանապատ առ ի չգոյէ անցաւորաց։
13. Եւ ասէ ցիս Տէր. Վասն թողլոյն դոցա զաւրէնս իմ զոր եդի առաջի աչաց նոցա, եւ ոչ լուան ձայնի իմում։
14. եւ գնացին զհետ հաճոյից սրտից իւրեանց չարաց, եւ զհետ կռոցն զոր ցուցին նոցա հարքն նոցա։
15. Վասն այնորիկ այսպէս ասէ Տէր զաւրութեանց՝ Աստուած Իսրայէլի. Ահաւասիկ ես ջամբեմ ժողովրդեանդ այդորիկ վտանգ. եւ արբուցանեմ դոցա ջուր դառնութեան։
16. եւ ցրուեցից զդոսա ընդ ազգս զորս ոչ գիտացին դոքա, եւ ոչ հարքն իւրեանց. եւ արձակեցից ի վերայ դոցա սուր, մինչեւ սատակեցից զդոսա նովաւ։
17. Այսպէս ասէ Տէր զաւրութեանց. Զմտաւ ածէք՝ եւ կոչեցէք զձայնարկուս՝ եւ եկեսցեն. եւ առ իմաստուն կանայս առաքեցէք, եւ ճչեսցեն։
18. եւ ստիպեսցեն, եւ առցեն ողբս ի վերայ ձեր. եւ իջուսցեն աչք ձեր արտասուս, եւ արտեւանունք ձեր բղխեսցեն ջուր։
19. Զի ձայն ողորմ գուժեաց ի Սիովն. զիարդ թշուառացաք, ամաչեցաք յոյժ, զի լքաք զերկիր, եւ ընկեցաք զբնակութիւնս մեր։
20. Լուարուք կանայք զպատգամս Տեառն Աստուծոյ, եւ ընկալցին ականջք ձեր զբանս բերանոյ նորա. եւ արդ՝ ուսուցէք դստերաց ձերոց ձայնս. եւ կին՝ ընկերի իւրում ողբս։
21. զի ել մահ ընդ պատուհանս ձեր, եւ եմուտ յերկիր ձեր. ջնջել զտղայս արտաքուստ, եւ զերիտասարդս ի հրապարակաց։
22. Այսպէս ասէ Տէր. եղիցին դիակունք մարդկան նշաւակ ընդ երեսս դաշտաց երկրի ձերոյ, եւ իբրեւ զխոտ զկնի հնձողի. եւ ոչ ոք իցէ որ ժողովիցէ։
23. Այսպէս ասէ Տէր. Մի պարծեսցի իմաստունն յիմաստութիւն իւր, եւ մի պարծեսցի հզաւրն ի զաւրութիւն իւր, եւ մի պարծեսցի մեծն ի մեծութիւն իւր.
24. այլ այն պարծիցի՝ որ պարծիցի իմանալ եւ ճանաչել զիս, թէ ես եմ Տէր Աստուած. որ առնեմ զիրաւունս եւ զողորմութիւն, եւ զարդարութիւն ի վերայ երկրի. եւ ի նոյնս են կամք իմ՝ ասէ Տէր։
25. Ահա աւուրք եկեսցեն ասէ Տէր. եւ արարից այց ի վերայ ամենայն թլփատելոց յանթլփատութեան իւրեանց.
26. ի վերայ Եգիպտոսի, եւ ի վերայ Յուդայ, եւ ի վերայ Եդոմայ, եւ ի վերայ որդւոցն Ամովնայ, եւ ի վերայ որդւոցն Մովաբու, եւ ի վերայ ամենայն յապաւելոցն զերեսաւք բնակչաց անապատի։ զի ամենայն ազգ անթլփատ են մարմնով. եւ ամենայն Իսրայէլ անթլփատ են սրտիւք իւրեանց։
Հաղորդում կայքում սխալի վերաբերյալ
Տվյալ հատվածում առկա է սխալ: