Գլուխ 5

   
1. Եւ որդիքն Հռուբէլի անդրանկանն Իսրայէղի, զի նա էր անդրանիկ, բայց քանզի պղծեաց նա զանկողին հաւր նորա բարձաւ անդրանկութիւն ի նմանէ, եւ տուաւ որդւոյն Յովսէփու, որդւոյ Իսրայէղի, եւ ոչ թուեցաւ այնուհետեւ ի թիւ ազգագիր համարոց անդրանկութեան Հռուբէլ:

2. Զի Յուդայ հաստատեալ զաւրանայր ի մէջ եղբարց իւրոց առաջնորդել ի նմանէ եւ անդրանկութիւնքն ի նոցանէ առ Յովսէփ:

3. Որդիք Հռուբէլի անդրանկանն Իսրայէղի Ենովք, եւ Փաղուս, Ասիովմ, եւ Քարմի.

4. Յովել որդի նորա, Սամէի որդի նորա, Դանէ որդի նորա, Գովգ

5. որդի նորա, Սամէի որդի նորա, Միքիայ որդի նորա, Յունա որդի նորա,

6. Բաղաայ որդի նորա, զոր գերեաց փոփոխեաց Թեկղաթփաղսար արքայ ասորեստանեաց: Զի նա ել գլուխ իշխան գնդաց նոցա

7. եղբարբ իւրով հանդերձ ի համար ազգագրի իւրեանց առաջնորդ Յովէլ, եւ Զաքարիայ

8. եւ Քաղաա որդի Յուզազա, որդի Սեմեայ, որդի Յովելեայ, սա ինքն է որ բնակեալն էր Յարոէր, եւ մինչ ի Նաբաւ, եւ մինչ ի Բէեղմէում,

9. զարեւելս բնակեալ մինչչեւ ի մուտս անապատին, գետոյն Եւփրատայ զի խաշինք բազում էին յոյժ յերկրին Գաղաադու:

10. Եւ յաւուրս Շաւուղի եղեւ մարտ պատերազմի ընդ Ագաացիսն եւ անկան նոքա ի ձեռս նոցա, եւ բնակեցին անդ բանակաւք իւրեանց, ընդ ամենայն երեսս երկրին, ընդ արեւելս ի Գաղաադ:

11. Եւ որդիքն Գադա բնակեցան ընդ դէմ նոցա յերկրին ի Բասան մինչչեւ յելքո.

12. եւ Յովէլ իշխան եւ Սափա երկրորդ, եւ յԱնի, եւ Սափան անդէն ի Բիշովն,

13. եւ եղբարք նոցա ըստ ազգատոհմին իւրեանց, Միքայէլ եւ Մեսողղամ, եւ Սաբէէ, եւ Ուրիմ եւ յԱքայ, եւ Ազիայ եւ Էիր:

14. Սոքա եւթներորդ ի Յաբեղա որդւոյ Ուրեայ որդւոյ Գաղաադու, որդւոյ Միքայելայ, որդւոյ Շուելայ, որդւոյ Եդղով, որդւոյ Բուզեայ,

15. որդւոյ Բայեղայ, որդւոյ Տունի իշխան առաջնորդ

16. բնակեալ տոհմի իւրեանց: Եւ բնակեալ էին նոքա յերկրին ի Գաղաադ եւ ի Բիշովն, եւ յամենայն ի դստերս նորա եւ յամենայն զատեալ սահմանս Սարովմայ, յելս ի մուտս իւրեանց,

17. ամենեքին յազգակիրս համարեցան, յաւուրս Յովասայ արքայի հրէաստանի յաւուրս Յերոբովամու արքայի Իսրայէղացւոյ,

18. որդիք Հռուբելայ, Գադայ եւ կէս ազգին Մանասեան գնդին յորդւոց զաւրաւոր, զաւրաւոր արանց առհասարակ որ սուսերի եւ ասպարի յաղթէր: Արդ հասարակ աղեղնաւոր կորովի, ուսուցեալք եւ կարգեալք ի գործ պատերազմի, քառասուն եւ չորք հազարք եւ եւթն հարիւր եւ վաթսուն այր, որ միաբան հասարակ յառաջ խաղային:

19. Եւ ետուն պատերազմ ընդ Ագարացիսն, եւ ընդ Յեթուրացիսն, եւ ընդ նափիսեցիսն, եւ նեբագացիսն եւ ընդ աբիմաացիսն,

20. եւ խրասոյզ զաղաղակ բարձին ի վերայ նոցա եւ մատնեցան ի ձեռս նոցա ագարակացիքն եւ ամենեքին որ ընդ նոսայն էին, զի առ ած կարդացին ի պատերազմի անտ, եւ նա լուաւ նոցա, զի յուսացեալ էին ի նա,

21. եւ հարին գերեցին զզաւրս նոցա ի գերութեան: Վարեցին զամենայն ինչս, եւ զստացուածս նոցա եւ առին   ի նոցանէ երամակս ուղտուց իբրեւ յիսուն հազար եւ հաւտս խաշանց իբրեւ երկերիւրիւ, եւ յիսուն հազար, եւ երամակս իշոց, իբրեւ երկուս հազարս: Եւ առին ի նոցանէ զմարդագերին իբրեւ հարիւր հազար մարդ,

22. եւ բազում խոց վիրաւորեալք անկան յաւուր յայնմիկ, զի Աստուծոյ էր պատերազմ, եւ բնակեցան նոքա ի նոցուն բնակութեանն, մինչչեւ յաւր փոփոխմանն իւրեանց,

23. եւ կես ազգին Մանասէի բնակեցան ի Բիշոնէ մինչչեւ ի Բաղաազ Հերմովն, եւ Սանիր, եւ Ահերմոն ի կողմանսն Լիբանանու, եւ անդէն բազմացան:

24. Եւ այս իշխանք տանն ազգատոհմին Ափերեա, եւ Եսեայ, եւ Եղիեղայ, եւ Երեմիայ եւ Յեկղուէս, եւ Յեղիէլ, արք հզաւրք զաւրութեամբ իւրեանց, արք երեւելիք անուանիք ի կարգս ազգատոհմին իւրեանց,

25. եւ կոտորեցան յանաւրենութեան իւրեանց յետսկող յԱստուծոյ հարցն իւրեանց, եւ պոռնկեցան զհետ դիցն աւտարոտոց յերկրին պանդխտութեան զոր ջնջեացն Աստուած ի միջոյ նոցա առաջի երեսաց նոցա,

26. եւ յարոյց Աստուած զՓուա արքա ասորեստանեաց, եւ զԹեկղաթփաղսար արքայ ասորոց, եւ եկին բարձին զՀռուբէն, եւ զԳաւգն, եւ զկէս ազգին Մանասեան գնդին: Եւ առին տարան զնոսա յԱղաան, եւ Յաբովր, եւ Յառան, եւ բնակեցուցին առ գետեզերն Գովգայ մինչչեւ ցայսաւր ժամանակի: