1. Եւ ժողովեցան ամենայն ազգ Իսրայէղի առ Դաւիթ ի Քեբրովն եւ ասեն. Մարմինք ի մարմնոց քոց եւ ոսկր յոսկերաց քոց,
2. քանզի երէկ եւ յեռանդ մինչդեռ Շաւուղ կենդանի էր, դու էիր որ առաջնորդէիր տանդ Իսրայէղի: Եւ ցքեզ ասաց Տէր Աստուած քո դու հովուեսցես ասէ, եւ առաջնորդեսցես ժողովրդեան քում Իսրայէղի:
3. Եւ եկին ամենայն ծերակոյտ տանն Իսրայէղի առ թագաւորն ի Քեբրովն, եւ անդ եդին ուխտ ընդ նմա առաջի Տեառն: Եւ աւծին զԴաւիթ ի թագաւորութիւն տանն Իսրայէղի ըստ բանի Տեառն ի ձեռն Սամուէլի:
4. Եւ գնայր արքայ Դաւթի եւ ամենայն Իսրայէղ ընդ նմա յԵրուսաղէմ այսինքն Յեբոշ, եւ անդ Յեբոշացիքն բնակիչք երկրին:
5. Սկսան խաւսեալ ընդ Դաւթի եւ ասեն. զպարուարն Սիհովն: Այսինքն. Է քաղաք Դաւթի:
6. Ապա խաւսել կալաւ Դաւիթ ի մէջ զաւրացն եւ ասէ. Ամենայն այր որ յարձակեալ ձեռներեց լիցի սատակել զայր Յեբուսացի, իշխան զաւրավար կացուցից զնա ի վերայ ամենայն զաւրացն: Անդէն վաղվաղակի յարձակել նախաձեռն ձեռներեց լինէր Յովաբ որդի Շարուհեա վանել զՅեբուշացին ձեռներէց ի ներքս անկանէր, եւ նա լինէր իշխան զաւրավար զաւրացն,
7. եւ պահ արկեալ նստէր Դաւիթ շուրջ զպատուարաւն, վասն այսորիկ անուանեցաւ քաղաքն այն քաղաք Դաւթի:
8. Եւ շինեաց Դաւիթ զքաղաքն շուրջանակի ի գլխաւոր տեղոջէ անտի մինչչեւ ի շուրջ պատելով եւ Յովաբ շրջէր ջանայր ապրեցուցանել զմնացորդս քաղաքին
9. եւ Դաւիթ երթալով երթայր յառաջադէմ յաջողեալ բարձրացեալ եւ Տէր ամենակալ էր ընդ նմա,
10. եւ այս իշխանք են զաւրավարացն, որ էին ընդ Դաւթի, որ աւգնական ձեռնտու էին նմա ի թագաւորութեան իւրում, ամենայն Իսրայէղացովքն հանդերձ, զի թագաւորեցուսցեն զնա ընտ բանին Տեառն ի վերայ որդւոցն Իսրայէղի:
11. Եւ այս թիւք են զաւրավարացն Դաւթի: Յեսէբան որդի Քատանայ, առաջի քան զերիսն: Սա սուսեր ի վեր առեալ ընդ խառնէր ի մէջ ինն հարոյր յարձակելոյն միանգամայն,
12. եւ յետ նորա Եղէազար որդի Ռոդեա հաւրեղբաւր նորուն, եւ սա էր յերից անտի ի հզաւր
13. որ ընդ Դաւթին իսկ էր ի սեղան: Եւ այլազգիքն ժողովեալ էին ի գործ պատերազմի եւ անդ էր երկիր մի յագարակի վարեալ լի ոսպամբ, եւ գունդն Դաւթեան ի փախուստ դառնայր յերեսացն այլազգեաց,
14. եւ նա առեալ ունէր զտեղին ի մէջ երկրին վիճակաց եւ զերկիրն ապրեցուցանէր, եւ զայլազգիսն վանէր եւ առնէր փրկութիւն մեծ ի ձեռն Տեառն ժողովրդեանն ամենայնի,
15. եւ իջին երեք ոմանք յերից գնդից անտի, զի էր Դաւիթ յայրի անդ, առ վիմին Ոդողամ, եւ գունդք այլազգեաց պատրաստեալ ի պատերազմ ի հովտին Տիտանայ:
16. Եւ Դաւիթ յայնժամ արգելեալ էր ի ներքս, եւ գունդքն այլազգեաց պատեալ էին շուրջ զհովտաւն Բեթղեեմ:
17. Եւ ցանկալով տենչացաւ Դաւիթ եւ ասէ. Լինէր ոք որ գայր բերէր ինձ ջուր ի Բեթղահեմ, ի ջրհորէ անտի որ մերձ առ դրանն է,
18. եւ անդէն վաղվաղակի երեքն յարձակեցան ի վերայ գնդին այլազգեաց եւ զգունդն պատառեցին, եւ ջուր առեալ բերին ի ջրհորէ անտի ի Բեթղահեմ, որ էր մերձ առ դրանն, եւ առ Դաւիթ ոչ կամեցաւ ըմբել ի ջրոյ անտի, այլ զոհեր զնա առաջի Տեառն
19. իբր ի նուէրս պատարագաց, եւ ասէր. Քաւ լիցի ինձ, եթէ արարից զբանդ զայդ, եթէ յարիւն արանցդ այդոցիկ ի փոխանակել զոգիս իւրեանց ընդ ջրոյդ, եթէ արբիցես այտի, զայս այն երեքն արարին:
20. Եւ Աբեսայ եղբայր Յովաբու, սա գլուխ էր երիցն, այս այն է որ հանեալ զսուսեր իւր եւ վանէր զերեք հարիւրսն յարձակեալս ի միում վայրի, եւ սա էր անուանեալ
21. ի մէջ երիցն ինքն երորդ փառաւորագոյն քան զերկուսն: Եւ եղեւ գլուխ նոցա, եւ երիցն ոք ոչ ժամանէր
22. եւ Բանէաս որդի Յովադ, որդի առն հզաւրի եւ բազում գործք գործեալ էին ի նմանէ ի Կասայէլ: Այս այն է, որ եհար վանեաց զերկոսին որդիսն Արիէլ Բանէ, եւ սա էր որ էջ էսպան ի ներքս ի գբի անդ զառեւծսն յաւուրն ձիւնաբերի:
23. Սա այն է որ սատակեաց զայրն եգիպտացի, զայրն յաղթանդամ հինգ կանգնեան, որ ունէր զկնիզակն ի ձեռին իբրեւ զվերստորի ոստայնանկաց, եւ իջանէր ի վերայ նորա Բանէ բրաւ, եւ թափէր ի նմանէ զնիզակն, եւ նոսին անդէն նորին նիզակաւն սպանանէր զնա,
24. զայս արար Բանեաս որդի Յովադայ եւ այս անուն էր նորա, ի մէջ երիցն հզաւրաց,
25. փառաւորագոյն քան զերկուսն եւ երիցս ոչ ոք կարեր նմանել, եւ կացոյց զնա Դաւիթ ի վերայ իշխանութեանն,
26. եւ զաւրաւորքն զաւրութեան իւրոյ, Ասաէլ եղբայր Յովաբու Եղէանան որդի Գողդեա հաւրեղբաւր նորին ի Բեդղեէմ քաղաքէ:
27. Սարովթ Արովրացի, Սեղով Փեւղովնացի,
28. Իրաս որդի Եկայ Թէկուացոյ, Աբիեզեր Անաթովթացի,
29. Սուբիովքայ որդի Սովթաթայ, Եղա Աքաթիմարի
30. ովնեթ, Յովփաթեայ,
31. Հեթի որդի Հռուեա, ի Տարաթեա, ի Բենիամին, ի բլրոյ անտի, Բանի Փարաթովնայ,
32. Ուրիայ ի Նաքաղեայ, Գաղսաբիէլ, Յերաբաթա
33. Ամսովթ, Բարամացի, Եղիբա Սաղաբովնեայ,
34. Իրասէ Այգունունեցի: Որդիք Սասովնեայ Զենեանց, Յունաթան որդի Սամեա Արովրացի,
35. Աքիամ որդի Իսաքասեանց, Եղիփայէլ որդի Սուրհեայ Ոփար,
36. Մեքովրաթայ, Ոքար Փեղովնացի,
37. Եզրիքեր Մեղացի, Նայարի, որդի Ազբեայ,
38. Յովէլ եղբայր Նաթանու, Նաաբար, որդի Ագարեայ,
39. Սեղէկ Ամանացի, Նուարա Բերովթացի, զինկիրք Յովաբու որդւոյ Շարուհեա
40. Իրայ Եթրացի, Գարէ Բեթրացի,
41. Ուրիաս Քեթթացի, Զաբաթ որդի Սամաղեա,
42. չորք սոքա, Գինան որդի Սիզայ, եւ Հռոբէն ի վերայ երեսնիցն
43. Անան որդի Մաաքայ եւ Յուսափաթ, Մաթանայ,
44. Ոզիայ, Եսթարովնա, Սամայ եւ Յէիէլ որդիք Քովթան Արարիանց,
45. Յիեղէլ որդի Շամայայ, եւ Եղեայ եղբայր նորա, Թովսի
46. Յիեղեայ Յովթովնաամ, եւ Յեթմա Մովաբացի, եւ Եղիէլ, Յովսէլ եւ Յեսիէլ Մասեբաացի:
Հաղորդում կայքում սխալի վերաբերյալ
Տվյալ հատվածում առկա է սխալ: