Գլուխ 14

   
1․ Եւ առաքեաց Քիրամ արքայ Ծուրայ հրեշտակս առ Դաւիթ, եւ ետ բերել նմա փայտ մայրս եւ ճարտարապետս որմաշինաց եւ շինաւղաց, եւ ճարտարապետս փայտագործաց, եւ շինեսցեն նմա տաճար,

2․ եւ գիտաց Դաւիթ եթէ յաջողեաց Տէր զթագաւորութիւն նորա ի վերա Իսրայէղի զի աճելով աճեր եւ բազմանալով բազմանայր տէրութիւն նորայ վասն ժողովրդեան իւրոց Իսրայէղի:

3․ Ապա էառ Դաւիթ կանայս իւր յԵրուսաղէմ: Եւ եղեն նմա ուստերք եւ դստերք

4․ այս անուանք էին որդւոցն որ եղեն յԵրուսաղէմ: Սամաա եւ Սոբէփ, Նաթան եւ Սողովմոն,

5․ եւ Յեբարար, եւ Եղիշուէ, եւ Եղիփաղէթ,

6․ եւ Նագէն, եւ Նափէգ եւ Յաբի,

7․ եւ Եղիշամա, եւ Բաաղիաբաղ, եւ Եղիփաղաղ:

8․ Եւ լու եղեւ այլազգեացն եթէ թագաւորեաց Դաւիթ ի վերայ ամենայն Իսրայէղի, եւ եկին հասին այլազգիքն ի խնդիր Դաւթի: Եւ լու եղեւ Դաւթի եւ գնաց ի դիմի հարկանել նոցա,

9․ եւ եկին լցան այլազգիքն ի հովիտս  սկայիցն:

10․ Ապա սկսաւ հարցանել Դաւիթ ի Տեառնէ եւ ասէ. Եթէ տացես ինձ հրաման ելանել ի վերայ այլազգեաց եւ մատնեսցես զնոսա ի ձեռս իմ: Եւ ասէ ցնա Տէր. Ել համարձակ, զի մատնեցից զնոսա ի ձեռս քո:

11․ Եւ ել Դաւիթ ի Բայեղփարսիմ, եւ սատակեաց զնոսա անդէն: Եւ ասէ. Դաւիթ Սատակեաց այսաւր Տէր ի ձեռին իմում զթշնամիս իմ, եւ ջնջեաց զնոսա զոր աւրինակ զի պակասէ ջուր, իբրեւ հատանեն զնա վնաս այսորիկ կոցեաց զանուն տեղոյն այնորիկ սատակումն Բաեղփարսիս

12․ եւ թողին լքին անդէն այլազգիքն զի դիսն իւրեանց, հրաման ետ Դաւիթ եւ հրձիք արարին զամենայն:

13․ Դարձան յաւելին այլազգիքն ելանել ի հովիտս սկայիցն:

14․ Եւ հարցանէր Դաւիթ ի Տեառնէ Աստուծոյ եւ ասէ ցնա Աստուած, մի ելանել դու զհետ նոցա դարձիր ի նոցանէ, եւ եկեսցես դու մինչչեւ ի տանձիսն

15․ եւ իբրեւ լուիցես դու ձայն բարբառոյ շարժման, ի ծայրից անդի տանձեացն ապա յարձակեսցիս դու ի վերայ այլազգեացն, զի գիտասցես դու եթէ ել Տէր Աստուած քո սատակել զբանակսն այլազգեաց:

16․ Եւ արար Դաւիթ որպէս եւ հրաման ետ նմա Տէր Աստուած, եւ սատակեաց զբանակսն այլազգեաց ի Գաբաւովնէ մինչչեւ Յազերայ:

17․ Եւ ել անուն Դաւթի ընդ ամենայն երկիր, եւ Տէր ետ զահ իւր ի վերայ ամենայն հեթանոսաց: