1. Քսան եւ մի ամաց էր Սեդեկիա արքայ ի թագաւորել իւրում. եւ մետասան ամ թագաւորեաց յԵրուսաղէմ, եւ անուն մաւր նորա Ամիտաաղ դուստր Երեմիա ի Ղուբենայ։
2. Եւ արար չար առաջի Տեառն, որպէս արար Յովակիմ։
3. զի ի ցասումն Տեառն էր Երուսաղէմ եւ Յուդայ. մինչեւ մերժեաց զնոսա յերեսաց իւրոց։ եւ ապստամբեաց Սեդեկիա յարքայէն բաբելացւոց։
4. Եւ եղեւ յիններորդի ամի թագաւորութեան նորա, եւ յամսեանն տասներորդի որ աւր տասն էր ամսոյն. եկն Նաբուքոդոնոսոր արքայ բաբելացւոց ամենայն զաւրաւք իւրովք յԵրուսաղէմ, եւ պաշարեաց զնա. եւ շինեաց շուրջ զնովաւ պարիսպ առնպարիսպ՝ ի չորեքկուսի վիմաց։
5. Եւ եհաս քաղաքն ի նեղութիւն մինչեւ յամն մետասաներորդի Սեդեկիայ արքայի,
6. եւ յամիսն չորրորդ՝ որ աւր ինն էր ամսոյն։ եւ զաւրացաւ սով ի քաղաքին. եւ ոչ գտանէր հաց ուտելոյ ժողովրդեան երկրին։
7. Եւ խրամատեցաւ քաղաքն, եւ ամենայն արք պատերազմաւղք փախեան, եւ ելին ի քաղաքէ անտի ի գիշերի ընդ ճանապարհ դրանն՝ ընդ պարիսպ եւ ընդ պատուհան, ընդ կողմն պարտիզին արքունի. եւ քաղդեացիքն շուրջ զքաղաքաւն էին։ եւ գնացին ընդ ճանապարհս արաբացւոց։
8. Եւ զհետ եղեն զաւրք թագաւորին քաղդեացւոց, եւ հասին Սեդեկիայ արքայի յանցս Երիքովի. եւ ամենայն ծառայք նորա ցրուեցան ի նմանէ։
9. Եւ կալան զթագաւորն եւ ածին առ արքայն բաբելացւոց ի Գեբլաթայ յերկիրն Եմաթայ. եւ խաւսեցաւ ընդ նմա դատաստանաւք։
10. եւ կոտորեաց արքայն բաբելացւոց զորդիսն Սեդեկիայ յանդիման նորա. եւ զամենայն իշխանս Յուդայ կոտորեաց ի Գեբլաթա։
11. եւ զաչսն Սեդեկիայ կուրացոյց. եւ կապեաց զնա ձեռակապաւք. եւ տարաւ զնա արքայն բաբելացւոց ի Բաբելոն, եւ եդ զնա ի տուն աղաւրեաց, մինչեւ յաւր մահուան իւրոյ։
12. Եւ յամսեանն հինգերորդի որ աւր տասն էր ամսոյն. այն ամ իննուտասն էր Նաբուքոդոնոսորայ արքային բաբելացւոց. եկն Նաբուզարդան դահճապետ որ կայր առաջի արքային բաբելացւոց։
13. եւ հրձիգ արար զտունն Տեառն, եւ զապարանսն արքունի, եւ զամենայն տունս քաղաքին. եւ զամենայն ապարանս մեծամեծս այրեաց հրով։
14. եւ զամենայն պարիսպսն Երուսաղէմի շուրջանակի՝ ամենայն զաւրաւք քաղդեացւոց քակեցին որ էին ընդ դահճապետին։
15. Բայց յաղքատաց ժողովրդեանն եւ ի մնացորդաց, եւ զսինլքորսն որ մնացին ի քաղաքին. եւ զփախստականս որ փախեան առ արքայն բաբելացւոց, եւ զմնացորդս ժողովրդեանն եթող Նաբուզարդան դահճապետ։
16. եւ յաղքատաց երկրին եթող Նաբուզարդան դահճապետ յայգեգործս եւ յարդիւնարարս։
17. Եւ զսիւնսն պղնձիս տան Տեառն, եւ զխարիսխսն, եւ զծովն պղնձի որ էր ի տան Տեառն՝ խորտակեցին քաղդէացիքն, եւ խաղացուցին զամենայն պղինձն ի Բաբելոն։
18. Եւ զոտսն եւ զվերնախարիսխսն, եւ զպսակսն եւ զտաշտսն, եւ զմսահանսն. եւ զամենայն կահ պղնձի որովք առնէին սպաս՝ առ։
19. եւ զապփովթն, եւ զամասարակովթ, եւ զպարզուտսն, եւ զաշտանակսն, եւ զճաշակսն. եւ զտուփսն, որ ոսկի՝ ոսկի, եւ որ արծաթի՝ արծաթի, առ դահճապետն։
20. Եւ սիւնք երկու էին, եւ ծով մի. եւ ցուլքն երկոտասան էին որ կային ընդ ծովուն. զորս արար արքայ Սողոմոն ի տան Տեառն. եւ ոչ գոյր չափ պղնձոյն, եւ ամենայն կահին պղնձոյ։
21. Եւ սեանցն՝ երեսուն եւ հինգ կանգուն էր բարձրութիւն միոյ միո յսեան. եւ մանեակ յերկոտասան կանգնոյ շուրջ զնովաւ. եւ թանձրութիւն նորա շուրջ առ չորս մասունս։
22. եւ ախաւեղագէսք նորա պղնձիք. եւ բարձրութիւն միոյ ախաւեղագիսին, ի հինգ կանգնոյ։ եւ վանդակապատք եւ նռնաձեւք ի վերայ ահաւեղագիսին շուրջ շրջանակաւ՝ ամենայն պղնձի։ ըստ նմին աւրինակի եւ երկրորդի սեանն, ութ նռնաձեւ, կանգուն առ կանգուն, յերկոտասան կանգնոյ։
23. Եւ էին նռնաձեւք իննսուն եւ վեց, ի միոջէ կողմանէ. եւ էին ամենայն նռնաձեւքն հարեւր ի վերայ վանդակին շուրջանակի։
24. Եւ առ դահճապետն զՍարեա զքահանայ զգլխաւորն, եւ զՍոփոնիա զերկրորդ, եւ երիս բարապանս։
25. եւ ի քաղաքէ անտի առ ներքինի մի, որ էր ոստիկան արանց պատերազմողաց. եւ եւթն այր անուանի որ կային առաջի թագաւորին՝ գտեալս ի քաղաքին. եւ զդպրապետն զիշխան զաւրացն, եւ զդպրապետ ժողովրդեան երկրին, եւ վաթսուն այր ի ժողովրդենէ երկրին՝ որ գտան ի քաղաքին։
26. եւ առ զնոսա Նաբուզարդան դահճապետ, եւ տարաւ առ արքայն բաբելացւոց ի Դեբլաթա։
27. Եւ եհար զնոսա արքայն բաբելացւոց, եւ սպան զնոսա ի Դեբլաթա յերկրին Եմաթայ։ եւ գերեցաւ Յուդայ անդուստ յերկրէ իւրմէ։
28. եւ այս ժողովուրդ է զոր գերեաց Նաբուքոդոնոսոր՝ արքայ յամին եւթներորդի ի հրէից երիս հազարս եւ քսան եւ երեք։
29. եւ յամին ութուտասաներորդի Նաբուքոդոնոսորայ, տարան յԵրուսաղէմէ ոգիս եւթն հարիւր երեսուն եւ երկուս։
30. եւ յամին քսաներորդի եւ երրորդի Նաբուքոդոնոսորայ խաղացոյց Նաբուզարդան դահճապետ ի հրէից ոգիս եւթն հարիւր քառասուն եւ հինգ։ ընդ ամենայն ոգիքչորք հազար եւ վեց հարիւր։
31. Եւ եղեւ յերեսներորդի եւթներորդի ամի գերութեան Յովակիմայ արքայիՅուդայ, յերկոտասաներորդ ամսեանն ի քսան եւ ի չորս ամսոյն, բարձրացոյց Ուղմարորդաք արքայ
բաբելացւոց՝ յամին յորում թագաւորեաց՝ զգլուխ Յովակիմայ արքայի Յուդայ. եւ եհան զնա ի տանէն ուրկայր ի պահեստի,
32. եւ խաւսեցաւ ընդ նմա քաղցրութեամբ. եւ էարկ զաթոռ նորա ի վերոյ քան զաթոռս թագաւորացն որ էին ընդ նմա ի Բաբելովն։
33. եւ փոխեաց զպատմուճան բանտի նորա. եւ ուտէր հացհանապազ առաջի նորա զամենայն աւուրս որչափ եւ եկեաց։
34. Եւ կարգեցաւ նմա ռոճիկ հանապազորդ,զոր տային յարքայէն բաբելացւոց աւր ըստ աւրէ մինչեւ ցաւր մահու զամենայն աւուրս կենաց իւրոց։ Տունք։
Հաղորդում կայքում սխալի վերաբերյալ
Տվյալ հատվածում առկա է սխալ: