Գլուխ 6

   

1. Խաւսեցաւ Տէր ընդ Մովսիսի` եւ ասէ.

2. Անձն ոք եթէ մեղիցէ, եւ արհամարհելով արհամարհեաց զպատուիրանս Տեառն. եւ ստեսցէ ընկերի իւրում. եթէ յաւանդի, եթէ ի զովողութեան, եւ եթէ ի յափշտակութեան, եւ եթէ վնասեսցէ ինչ ընկերի իւրում:

3. Եւ եթէ եգիտ կորուստ ինչ` եւ ժխտիցէ ի վերայ նորա. եւ երդնուցու սուտ վասն միոյ իրիք` յամենայնէ զոր եւ առնիցէ մարդ

4. առ ի մեղանչելոյ նորա նոքաւք: Եւ եղիցի յորժամ մեղանչիցէ եւ յանցանիցէ, հատուսցէ զյափշտակութիւնն` զոր յափշտակեաց,

5. կամ զվնասն զոր վնասեաց, կամ զաւանդն զոր աւանդեցաւ նմա, կամ զկորուստն զոր եգիտ յամենայն իրաց, վասն որոյ երդուաւ սուտ: Տուժեսցի զգլուխն, եւ զհինգերորդ մասն յաւելցէ ի նոյն. եւ ոյր իցէ` հատուսցէ նմա յաւուր յորում յանդիմանեսցի:

6. Եւ ընդ յանցանաց իւրոց մատուսցէ Տեառն խոյ անարատ ի հաւտից` գնոց արծաթոյ, վասն որոյ յանցեաւն:

7. Եւ քաւեսցէ վասն նորա քահանայն առաջի Տեառն. եւ թողցի նմա վասն միոյ իրիք յամենայնէ զոր արար եւ յանցեաւ նա:

8. Խաւսեցաւ Տէր ընդ Մովսիսի` եւ ասէ.

9. Պատուէր տուր Ահարոնի եւ որդւոց նորա` եւ ասասցես. Այս աւրէն է ողջակիզին, վասն այրելոյ նորա ի վերայ սեղանոյն զամենայն գիշերն մինչչեւ ցառաւաւտ. եւ հուր սեղանոյն որ այրիցի ի վերայ նորա` մի շիջցի:

10. Եւ զգեցցի քահանայն պատմուճան կտաւի. եւ անդրավարտիս կտաւիս զգեցցի ի վերայ մարմնոյ իւրոյ, եւ հանցէ զընծայս ողջակիզին ի վերայ սեղանոյն` զոր հուրն ծախիցէ. եւ դիցէ առ ընթեր սեղանոյն:

11. Եւ մերկասցի զպատմուճանն իւր, եւ զգեցցի այլ պատմուճան. եւ հանցէ զողջակէզն արտաքոյ բանակին ի տեղի սուրբ:

12. Եւ հուրն որ այրիցի ի վերայ սեղանոյն մի շիջցի. եւ այրեսցէ ի վերայ նորա քահանայն փայտ ընդ առաւաւտս. եւ դիցէ ի վերայ նորա զողջակէզսն. եւ դիցէ ի նմա զճարպ փրկութեանն.

13. եւ հուր հանապազ այրեսցի ի վերայ սեղանոյն` եւ մի շիջցի:

14. Եւ այս աւրէն է զոհին` զոր մատուցանիցեն որդիքն Ահարոնի քահանայքն առաջի Տեառն յանդիման սեղանոյն:

15. Առցէ ափով իւրով ի նաշհւոյ զոհին հանդերձ իւղով նորա եւ կնդրկաւն որ իցէ ի վերայ զոհին. եւ հանցէ ի սեղանն պտուղ ի հոտ անուշից ի յիշատակ նորա Տեառն:

16. Եւ մնացեալն ի նմանէ կերիցէ Ահարոն եւ որդիք նորա. բաղարջ կերիցի ի սուրբ տեղւոջ. ի սրահի խորանին վկայութեան կերիցեն զնա:

17. Ոչ եփեսցի խմորեալ: Մասն ետու զայն նոցա ի պտղոցն Տեառն. սրբութիւնք սրբութեանց են: Որպէս վասն մեղացն իցէ, նոյնպէս եւ վասն յանցանացն.

18. ամենայն արու քահանայիցն կերիցեն զայն. աւրէն յաւիտենական յազգս ձեր ի պտղոցն Տեառն. ամենայն որ մերձեսցի ի նոսա` սրբեսցի:

19. Խաւսեցաւ Տէր ընդ Մովսիսի` եւ ասէ.

20. Այս է պատարագ Ահարոնի եւ որդւոցն նորա` զոր մատուցանիցեն Տեառն յաւուր յորում աւծանիցես զնոսա: Զտասանորդ գրուի միոյ նաշհւոյ զոհ հանապազորդ. զկէս նորա` այգուն, եւ զկէս նորա երեկունն.

21. ի տապակի իւղով զանգեալ գործեսցի: Եւ մատուսցէ զայն մաքրեալ զոհ ի պատառոյ. զոհ ի հոտ անուշից Տեառն:

22. Քահանայն աւծեալ` փոխանակ նորա յորդւոց իւրոց առցէ զայն, աւրէն յաւիտենական Տեառն ամենեւին կատարեսցի:

23. Եւ ամենայն զոհք քահանային ողջակէզ լինիցի, եւ մի ուտիցի:

24. Խաւսեցաւ Տէր ընդ Մովսիսի` եւ ասէ.

25. Խաւսեաց ընդ Ահարոն եւ ընդ որդիս նորա` եւ ասասցես. Այս աւրէն իցէ վասն մեղացայոյն: Ի տեղւոջ ուր սպանանիցեն զողջակէզսն, սպանանիցեն եւ զվասն մեղացն առաջի Տեառն: Սրբութիւն սրբութեանց է:

26. Քահանայն որ մատուցանիցէ զայն, կերիցէ. ի սուրբ տեղւոջ կերիցէ, ի սրահի խորանին վկայութեան:

27. Ամենայն որ մերձանայցէ ի միս նորա` սրբեսցի. եւ յոյր ձորձոց վերայ սրսկեսցի ի նմանէ արիւն` լուասցի ի սուրբ տեղւոջ:

28. Եւ յանաւթ կաւեղէն յորում եփեսցի, փշրեսցի: Եւ եթէ ի պղնձի անաւթ եփեսցի, քերեսցէ զնա` եւ ջրով ողողեսցէ:

29. Ամենայն արու քահանայիցն կերիցէ զայն: Սրբութիւն սրբութեանց է Տեառն:

30. Եւ յամենայն վասն մեղաց յորոց մտանիցէ յարենէ նոցա ի խորանն վկայութեան քաւել ի սրբութիւնսն` մի կերիցէ, այլ հրով այրեսցի: