1. Խաւսեցաւ Տէր ընդ Մովսիսի եւ ասէ.
2. Պատուիրեա որդւոցն Իսրայէլի` եւ առցեն քեզ եւղ ձիթենեաց սուրբ խակակութ ի լոյս. զի այրեսցի ճրագ հանապազորդ
3. արտաքոյ վարագուրին խորանին վկայութեան. եւ լուցցեն զայն Ահարոն եւ որդիք նորա, յերեկաւրեայ մինչչեւ ցառաւաւտ առաջի Տեառն անպակաս. աւրէն յաւիտենական յազգս ձեր:
4. Ի վերայ աշտանակի սրբոյ այրեցէք ճրագունս առաջի Տեառն մինչչեւ ցառաւաւտ:
5. Եւ առնուցուք նաշիհ, եւ առնիցէք զայն` երկոտասան պան. յերկուց տասանորդաց լինիցի պան մի:
6. Եւ դնիցէք զնոսա երկուս նուէրս. վեց պան զմի նուէրն ի վերայ սեղանւոյն սրբոյ առաջի Տեառն.
7. եւ դիցեն ի վերայ նուիրին կենդրուկ սուրբ եւ աղ. եւ եղիցին ի հաց յիշատակի զառաջաւոր Տեառն:
8. Յաւուրն շաբաթուց դնիցէք առաջի Տեառն` հանահազորդ յորդոցն Իսրայէլի ուխտ յաւիտենական:
9. Եւ եղիցի Ահարոնի եւ որդոց նորա. եւ կերիցեն զայն ի սուրբ Տեղւոջ, զի սրբութիւն սրբութեանց է այն նմա ի զոհ աւուրց Տեառն` աւրէն յաւիտանական:
10. Եւ ել որդի կնոջ Իսրայէլացւոյ, եւ նա է որդի առն եգիպտացոյ ի մէջ որդւոցն Իսրայէլի. եւ կռուեցան ի բանակին` որ յԻսրայէլացւոց անտի էր. եւ այր մի Իսրայելացի.
11. եւ անուանեալ կնոջն Իսրայէլացւոց զանունն` Անէծ. եւ ածին զնա առ Մովսէս. եւ անուն մաւրն նորա Սաղամիթ` դուստր Դաբրեայ, յազգէ Դանայ.
12. եւ արկին զնա ի պահ` դատել զնա հրամանաւ Տեառն:
13. Եւ խաւսեցաւ Տէր ընդ Մովսիսի եւ ասէ.
14. Հանէք զայն որ անէծ նա` արտաքոյ բանակին. եւ դիցեն որ լուանն` զձեռս իւրեանց ի վերայ գլխոյ նորա. եւ քարկոծեսցեն զնա ամենայն ժողովուրդն:
15. Եւ ընդ որդիսն Իսրայէլի խաւսեսցիս եւ ասասցես ցնոսա. Այր ոք` որ անիծիցէ զԱստուած, մեղս ընգալցի.
16. զի անուանեաց զանուն Տեառն` մահու մեռցի. քարընկէցութեամբ քարկոծեսցեն զնա ամենայն ժողովուրդն. եթէ պանդուխտ իցէ եւ եթէ բնակք, յանուանել նորա զանուն Տեառն` սատակեսցի:
17. Եւ մարդ որ հարկանիցէ զամենայն անձն մարդւոյ` եւ մեռանիցի, մահու մեռցի եւ նա:
18. Եւ որ հարկանիցէ զանասուն` անձն ընդ անձին տուժեսցի:
19. Եւ թէ խեղեսցէ ոք զընկեր իւր, որպէս արարն` արասցի նմա:
20. Բեկումն ընդ բեկմանն, ակն ընդ ական, ատամն ընդ ատաման. որպէս առնիցէ ոք զխեղութիւնն` նոյնպէս հատուսցի նմա:
21. Եւ որ հարկանիցէ զնա` եւ մեռանիցէ, մահու մեռցի եւ նա.
22. իրաւունք մի եւ նոյն կացցեն եկին եւ բնակին, զի ես եմ Տէր Աստուած ձեր:
23. Եւ խաւսեցաւ Մովսէս ընդ որդիսն Իսրայէլի. եւ հանին զայն որ անէծն` արտաքոյ բանակին. եւ քարկոծ արարին զնա քարամբք ամենայն ժողովուրդն. եւ որդիքն Իսրայէլի արարին` որպէս պատուիրեաց Տէր Մովսիսի:
Հաղորդում կայքում սխալի վերաբերյալ
Տվյալ հատվածում առկա է սխալ: