1. Խաւսեցաւ Տէր ընդ Մովսիսի` եւ ասէ.
2. Այս աւրէն եղիցի բորոտի` յաւուր յորում սրբիցի. ածցի առ քահանայն.
3. եւ ելցէ քահանայն արտաքոյ բանակին. եւ տեսանիցէ քահանայն` եւ ահա բժշկեալ իցէ արատ բորոտութեան ի բորոտէ անտի.
4. Հրաման տացէ քահանայն, եւ առցեն սրբելոյն երկուս հաւս կենդանիս սուրբս, եւ փայտ եղեւնայ, եւ կարմիր մանեալ, եւ զոպա:
5. Եւ հրաման տայցէ քահանայն` եւ սպանցեն զմի հաւն յանաւթ խեցեղէն ի վերայ ջրոյ կենդանոյ:
6. Եւ զհաւն կենդանի առցէ, եւ զփայտն եղեւնեայ, եւ զկարմիրն մանեալ եւ զզոպայն. եւ թացցէ զնոսա եւ զհաւն կենդանի` յարեան հաւուն սպանելոյ ի վերայ ջրոյն կենդանւոյն.
7. եւ ցանեսցէ ի վերայ սրբելոյն ի բորոտութենէ եւթն անգամ եւ սրբեսցէ զնա. եւ արձակեսցէ զհաւն կենդանի ի դաշտ:
8. Եւ լուասցէ սրբեալն զձորձս իւր եւ գերծցէ զամենայն մազն, եւ լուասցէ ջրով, եւ սուրբ լիցի. եւ ապա մտցէ ի բանակն եւ լիցի արտաքոյ տան իւրոյ զեւթն աւր.
9. եւ յաւուրն եւթներորդի գերծցէ զամենայն զմազ իւր գերծցէ. եւ ողողեսցէ զհանդերձս իւր, եւ լուասցէ զմարմինս իւր ջրով, եւ սուրբ լիցի:
10. Եւ յաւուրն ութերորդի առցէ երկուս գառինս` տարեւորս անարատս, եւ աւրոջ մի անարատ տարեւոր եւ երիս տասանորդս նաշոյ ի զոհ եւղով զանգեալ, եւ ճաշակ մի եւղոյ.
11. եւ կացցէ քահանայն, որ սրբեսցէ զայրն որ սրբիցի, եւ զայն` առաջի խորանին վկայութեան.
12. եւ առցէ քահանայն զմի գառնն. եւ մատուսցէ զնա վասն յանցանացն, եւ զճաշակ եւղւոյն. եւ նուիրեսցէ զայն նուէր առաջի Տեառն:
13. Եւ սպանցեն զգառնն զմի ի տեղւոջ, ուր սպանանիցեն զողջակէզսն եւ զվասն մեղացն ի սուրբ տեղւոջ. զի որպէս վասն մեղացն է, նոյնպէս եւ վասն յանցանացն իցէ. եւ եղիցի քահանային. զի սրբութիւն սրբութեանց է:
14. Եւ առցէ քահանայն յարենէ այնր` որ վասն յանցանացն իցէ. եւ դիցէ քահանայն յարենէ անտի ի վերայ բլթակի աջոյ ունկան այնորիկ որ սրբիցին, եւ ի վերայ ծայրից ձեռին նորա աջւոյ եւ ի վերայ ծայրի ոտին նորա աջւոյ.
15. Եւ առեալ քահանային ի ճաշակէ անտի, արկցէ ի ձախոյ ձեռն քահանային:
16. Եւ թացցէ քահանայն զմատն իւր յիւղոյ անտի` որ ի ձեռին իւրում ձախոյ. եւ ցանեսցէ մատամբ իւրով եւթն անգամ առաջի Տեառն.
17. եւ զմնացեալ եւղն ի ձեռին իւրում դիցէ քահանայն ի վերայ բլթակի աջոյ ունկանն այնորիկ որ սրբելոցն իցէ. եւ ի վերայ ծայրի աջոյ ձեռին նորա. եւ ի վերայ ծայրի աջոյ ոտին նորա` ի տեղւոջ արեանն յանցանաց:
18. Եւ զմնացեալ եւղն ի ձեռն քահանային, դիցէ քահանայն ի վերայ գլխոյ սրբեցելոյն.
19. եւ քաւեսցէ վասն նորա քահանայն առաջի Տեառն. եւ արասցէ քահանայն զվասն մեղացն. եւ քաւեսցէ քահանայն վասն այնորիկ` որ սրբելոցն իցէ ի մեղաց իւրոց: Եւ ապա սպանցէ քահանայն զողջակէզն.
20. եւ հանցէ քահանայն զողջակէզն եւ զզոհն առաջի Տեառն ի սեղանն. եւ քաւեսցէ վասն նորա քահանայն, եւ սրբեսցի:
21. Եւ եթէ աղքատ իցէ եւ չգտանիցէ ձեռն իւր, առցէ գառն մի վասն յանցանացն` զոր յանցեաւ ի նուէր առ ի քաւելոյ վասն նորա. եւ զտասանորդ նաշոյ իւղով զանգեալ ի զոհ, եւ ճաշակ մի եւղւոյ.
22. եւ երկուս տատրակս կամ երկուս ձագս աղաւնոյ. որչափ ինչ եգիտ ի ձեռն իւր. եւ եղիցի մինն` վասն մեղացն. եւ մին` յողջակէզ:
23. Եւ տարցի յաւուրն ութերորդի առ քահանայն` առ ի սրբելոյ զնա առ դրան խորանին վկայութեան առաջի Տեառն:
24. Եւ առեալ քահանային զգառնն վասն յանցանաց, եւ զճաշակն իւղւոյ. եւ դիցէ նուէր առաջի Տեառն:
25. Եւ սպանցէ զգառն յանցանաց. եւ առցէ քահանայն յարէնէ անտի որ վասն յանցանաց իցէ եւ դիցէ ի վերայ բլթակի աջոյ ունկան սրբեցելոյն, եւ ի ծայրի աջոյ ձեռին նորա, եւ ի ծայրս աջոյ ոտին նորա:
26. Եւ յեւղւոյ անտի արկցէ քահանայն ի ձախոյ ձեռն քահանային.
27. եւ ցանեսցէ քահանայն մատամբ աջւոյ յիւղոյ անտի` որ իցէ ի ձախոյ ձեռին իւրում եւթն անգամ առաջի Տեառն.
28. եւ դիցէ քահանայն յիւղոյ անտի որ իցէ ի ձեռին իւրում` ի վերայ բլթակի աջոյ ունկան սրբեցելոյն եւ ի վերայ ծայրի աջոյ ձեռին նորա. եւ ի վերայ ծայրի աջոյ ոտին նորա. եւ ի տեղւոջ արեանն որ վասն յանցանացն իցէ:
29. Եւ զմնացեալ եւղն որ իցէ ի ձեռին քահանային, արկցէ ի գլուխ սրբեցելոյն. եւ քաւեսցէ քահանայն վասն նորա առաջի Տեառն:
30. Եւ արասցէ զմի ի տատրակացն կամ ի ձագուցն աղաւնեաց` ըստ ինքեան զոր եգիտ ձեռն իւր.
31. զմին` վասն մեղաց եւ զմին` յողջակէզ հանդերձ զոհիւն. եւ քաւեսցէ քահանայն վասն սրբեցելոյն առաջի Տեառն:
32. Այս աւրէն իցէ յորում իցէ արած բորոտութեան, եւ ոյր ոչ գտանիցէ բաւական լինել ի սրբութիւն իւր:
33. Խաւսեցաւ Տէր ընդ Մովսիսի եւ ընդ Ահարոնի եւ ասէ.
34. Յորժամ մտանիցէք յերկիրն քանանացւոց` զոր ես տաց ձեզ ի ստացուածս. եւ տայցեմ արած բորոտութեան ի տունս երկրին ստացուածոյ ձերոյ.
35. եւ գայցէ որոյ տունն իցէ, եւ պատմեսցէ քահանային եւ ասասցէ. Արած իմն երեւեցաւ ի տան իմում.
36. հրաման տայցէ քահանայն թափել զտունն` մինչ չեւ մտեալ իցէ քահանային տեսանել զտունն. եւ մի պղծեսցէ զամենայն ինչ որ ի տանն կայցէ. եւ ապա մտցէ քահանայն որոնել զտունն:
37. Եւ տեսանիցէ քահանայն զարածն յորմս տանն` զնստագոյն, կանաչս կամ կարմրացեալս. եւ տեսիլ նոցա զնստագոյն իցէ քան զորմոցն.
38. եւ ելեալ քահանայն ի տանէ անտի ի դուռնն տանն, զատուսցէ քահանայն զտունն զեւթն աւր:
39. Եւ եկեսցէ քահանայն դարձեալ յաւուրն եւթներորդի եւ տեսցէ զտունն` եթէ սփռեալ իցէ արածն ընդ որմս տանն.
40. հրաման տայցէ քահանայն, եւ քակեսցէ զքարինսն` յորս արածն իցէ. եւ հանցեն զնոսա արտաքոյ քաղաքին ի տեղի անսուրբ:
41. Եւ քերեսցեն զտունն ի ներքոյ շուրջանակի. եւ հեղցեն զքերածն արտաքոյ քաղաքին ի տեղի անսուրբ.
42. եւ առցեն այլ քարինս քերածոյս եւ դիցեն փոխանակ այնց քարանց. եւ այլ հող առցեն եւ ծփեսցեն զտունն:
43. Եւ եթէ անդէն երեւեսցի արածն ի տանն յետ զքարինսն քակելոյ եւ զտունն քերելոյ եւ միւս անգամ ծփելոյ.
44. մտցէ քահանայն եւ տեսցէ եթէ սփռեալ իցէ արածն ի տունն, բնակ բորոտութիւն է ի տունն, պիղծ է.
45. քակեսցեն զտունն եւ զփայտ նորա եւ զքարինս նորա, եւ զամենայն հող տանն. եւ հանցեն արտաքոյ քաղաքին ի տեղի անսուրբ:
46. Եւ որ մտանիցէ ի տունն զամենայն աւուրս զատանելոյ նորա, պիղծ լիցի մինչչեւ ցերեկոյ.
47. եւ որ ննջիցէ ի տանն` լուասցէ զձորձս իւր. եւ պիղծ լիցի մինչչեւ ցերեկոյ. եւ որ կերիցէ ի տանն, լուասցէ զձորձս իւր. եւ պիղծ լիցի մինչչեւ ցերեկոյ:
48. Եւ եթէ եկեալ մտանիցէ քահանայն եւ տեսանիցէ. եւ ահա չիցէ սփռեալ արածն ընդ տունն յետ ծեփելոյ զտունն. զի բժշկեցաւ տունն յարածոյն:
49. Եւ առցէ առ ի սրբելոյ զտունն երկուս հաւս կենդանիս սուրբս եւ փայտս եղեւնեայ եւ կարմիր մանեալ եւ զոպայ.
50. եւ սպանցէ զմի հաւն յաման խեցեղէն ի վերայ ջրոյ կենդանոյ.
51. եւ առցէ զփայտն եղեւնեայ եւ զկարմիրն մանեալ եւ զզոպայն եւ զհաւն կենդանի. եւ թացցէ զնոսա յարեան հաւուն սպանելոյ, ի վերայ ջրոյ կենդանւոյ. եւ ցանեսցէ նոքաւք զտամբն եւթն անգամ:
52. Եւ սրբեսցէ զտունն արեամբ հաւուն եւ ջրովն կենդանեաւ, եւ հաւուն կենդանեաւ, եւ փայտիւն եղեւնով, եւ զոպայիւն եւ կարմրովն մանելով.
53. եւ ապա արձակեսցէ զհաւն կենդանի արտաքոյ քաղաքին` ի դաշտ. եւ քաւեսցէ վասն տանն. եւ մաքրեսցի եւ սուրբ եղիցի:
54. Այս աւրէն լիցի ըստ ամենայն արածոյ, բորոտութեան եւ հարածի.
55. եւ բորոտութեան հանդերձի եւ տան.
56. եւ սպոյ եւ պալարի. եւ պաղպաջւոյ
57. եւ նշանակելոյ, թէ յորում աւուր պղծիցի եւ յորում աւուր սրբիցի: Այս աւրէն լիցի բորոտութեան:
Հաղորդում կայքում սխալի վերաբերյալ
Տվյալ հատվածում առկա է սխալ: