1․ Խաւսեցաւ Տէր ընդ Մովսէսի ի լերինն Սինայի եւ ասէ.
2. Խաւսեաց ընդ որդիսն Իսրայէղի եւ ասասցես ցնոսա. Եթէ մտանիցէք յերկիրն, զոր ես տաց ձեզ.
3. զվեց ամ վարեսցես զանդ քո եւ զվեց ամ յատցես զայգի քո. եւ ժողովեսցես զպտուղ նորա.
4. Յամին եւթներորդի շաբաթ է հանգիստ եղիցի երկրին, զի շաբաթ Տեառն է.
5. եւ զինքնեակն անդւոյ քո ոչ հնձեսցես որ գայցէ, եւ զխաղող սրբութեան քո ոչ կթեսցես, զի ամ հանգստեան է այն երկրին:
6. Եւ եղիցի շաբաթ երկրին ձերոյ` կերակուր քեզ եւ ծառայի քում, եւ աղախնւոյ քում եւ վարձկանի քում, եւ պանդխտին յեցելոյ ի քեզ.
7. եւ անասնոյ քում, եւ գազանաց որ իցեն յերկրի քում, եղիցի ամենայն բեր նոցա կերակուր:
8. Եւ թուեսցես դու քեզ եւթն հանգիստ ամաց, եւթն եւթնակին. եւ եղիցի եւթն եւթներորդքն ամացն` քառասուն եւ ինն ամ:
9. Եւ ազդ առնիցէք բարբառովք փողոց յամենայն երկրին ձերում` յամսեանն եր[ր]որդի, որ աւր տասն իցէ ամսոյն. յաւուրն քաւութեան, ազդ արասջիք փողով ընդ ամենայն երկիրն ձեր:
10. եւ սրբեսջիք զամենայն յիսներորդ տարւոյն, եւ քարոզեսջիք թողութիւն ի վերայ երկրին` ամենայն բնակչաց նորա. զի տարի թողութեան եղիցի ձեզ այն ազդեցութիւն: Եւ դարձցի իւրաքանչիւր ոք ի ստացուածս իւր, եւ իւրաքանչիւր ոք յազգ իւր երթիցէ.
11. զի թողութեան ազդեցութիւն է այն: Ամն յիսներորդ եղիցի ձեզ տարեկան. մի սերմանիցէք, եւ մի հնձիցէք զինքնեակս նորա` որ ելանիցեն. եւ մի կթիցէք զսրբեցեալս նորա.
12. զի թողութեան ազդեցութիւն է` սուրբ լինիցի ձեզ. ի դաշտաց կերիջիք զարմտիս նորա:
13. Յամին ազդեցութեան թողութեան նորա դարձցի իւրաքանչիւր ոք ի ստացուածս իւր:
14. Ապա թէ վաճառեսցէ ոք վաճառ ընկերի իւրում եւ ստասցէ յընկերէն իւրմէ, մի նեղեսցէ այր զընկեր իւր.
15. ըստ թուոյ ամացն յետ ազդեցութեանն` ստացի յընկերէն իւրմէ ըստ թուոյ ամացն արմտեացն վաճառեսցի քեզ.
16. ըստ յաճախելոյ ամացն յաճախեսցէ զստացուածս իւր. եւ ըստ պակասելոյ ամացն պակասեցուսցէ զստացուածն իւր, զի ըստ թուոյ արդեանցն վաճառեսցէ նա քեզ.
17. մի նեղեսցէ այր զընկեր իւր: Եւ երկնչիցիս ի Տեառնէ Աստուծոյ քումմէ. ես եմ Տէր Աստուած ձեր:
18. Եւ արասջիք զամենայն իրաւունս իմ եւ զամենայն հրամանս իմ, եւ զամենայն դատաստանս իմ. եւ պահեսջիք եւ արասջիք զնոսա. եւ բնակեսջիք յերկրին յուսով.
19. եւ տացէ երկիրն զբերս իւր, եւ կերիջիք ցայգ. եւ բնակեսջիք ի նմա վստահութեամբ:
20. Ապա թէ ասիցէք. Զի՞նչ կերիցուք յամին եւթներորդի յայնմիկ, եթէ ոչ սերմանիցեմք եւ ժողովիցեմք զարմտիս մեր:
21. Առաքեցից զաւրհնութիւնս իմ ի ձեզ յամին վեցերորդի. եւ արասցէ զարդիւնս իւր երից ամաց.
22. եւ սերմանեսջիք յամին ութերորդի. եւ կերիջիք զհին արդեանցն մինչչեւ յամին իններորդի. մինչչեւ գայցեն արմտիք նորա` կերիջիք հին ի հնոյ:
23. Եւ երկիրն ոչ վաճառեսցի ի հաստատութիւն, զի իմ է երկիրն. քանզի պանդուխտք եւ նշդեհ էք դուք առաջի իմ.
24. եւ ըստ ամենայն կալուածոց երկրին ձերոց` փրկանս տաջիք երկրին:
25. Եւ եթէ աղքատասցի եղբայր քո որ ընդ քեզ իցէ, եւ վաճառեսցէ ի կալուածոց իւրոց. եւ եկեսցէ մերձաւորիչն` որ մերձաւոր իցէ նորա, եւ փրկեսցէ զվաճառ եղբաւր իւրոյ:
26. Ապա թէ չիցէ ուրուք մերձաւորիչ, եւ ձեռնհաս իցէ. եւ գտանիցի նմա բաւական փրկանացն իւրոց.
27. եւ համարեսցի զամս վաճառացն իւրոց, եւ հատուսցէ կարողն առնն որում վաճառեաց նմա, եւ դարձցի ի կալուածս իւր:
28. Ապա թէ ոչ գտցի ի ձեռին նորա բաւական` առ ի հատուցանելոյ նմա, եղիցի վաճառ նորա այնմ` որ ստացաւ զնա մինչչեւ յամն թողութեան. եւ ելցէ յամին թողութեան եւ դարձցի անդրէն ի կալուածս իւր:
29. եթէ վաճեռեսցէ ոք տուն բնակութեան ի պարսպաւոր քաղաքի, եղիցին փրկանք նորա մինչչեւ ի կատարել տարւոյն աւուրց վախճանի նորա. աւրաթուի լինիցին փրկանք նորա:
30. Ապա թէ ոչ փրկիցին մինչչեւ լնուցու տարի ողջոյն, հաստատեսցի տունն որ իցէ ի պարսպաւոր քաղաքի հաստատութեամբ ստացողին իւրոյ յազգս իւր. եւ ելցէ ի թողութեանն:
31. Իսկ տունք, որ յաւանս իցեն, որոց պարիսպ ոչ իցեն շուրջանակի, ընդ անդս համարեսցին, եւ հանապազ ընդ փրկանաւք լինիցին. եւ ի թողութեանն ելցեն:
32. Եւ ի քաղաքս Ղեւտացւոց տունք, որ ի քաղաքս կալուածոց նոցա իցեն, ընդ փրկանաւք լինիցին հանապազ ի մէջ Ղեւտացւոցն:
33. Եւ որ ոք փրկեսցէ ի Ղեւտացւոց, ելցէ վաճառ տանց քաղաքաց կալուածոց նոցա ի թողութեանն. զի տունք քաղաքացն Ղեւտացւոց կալուածոց նոցա են այն ի մէջ որդւոցն Իսրայէղի:
34. Եւ ագարագքն զատուցեալք ի քաղաքս նոցա` մի վաճառեսցին. զի կալուած յաւիտենական է այն նոցա:
35. Եւ եթէ աղքատանայցէ եղբայր քո եւ տկարանայցէ ձեռաւք` առ քեզ պատսպարեսցես զնա` իբրեւ զեկն իբրեւ զպանդուխտն. եւ կեցցէ եղբայրն քո` որ ընդ քեզն իցէ:
36. Մի առնուցուս ի նմանէ վաշխ եւ տոկոսիս. եւ երկնչիցիս ի Տեառնէ Աստուծոյ քումմէ, զի ես եմ Տէր. եւ կեցցէ եղբայրն քո ընդ քեզ.
37. զարծաթ քո մի տայցես նմա ընդ տոկոսեաւք եւ զկերակուր քո մի տայցես նմա ընդ շարիատիւ:
38. Ես եմ Տէր Աստուած ձեր, որ հանի զձեզ յերկրէն Եգիպտացւոց` տալ ձեզ զերկիրն Քանանացւոց առ լինել ձեր
Աստուած:
39. եթէ տնանկասցի եղբայր քո առ քեզ` եւ վաճառեսցի քեզ, մի ծառայեսցէ քեզ զծառայութիւն ստրկի`
40. իբրեւ զվարձկան. իբրեւ զպանդուխտն եղիցի քեզ. մինչչեւ ցամն թողութեան գործեսցէ առ քեզ:
41. Եւ ելցէ ի թողութեանն ինքն եւ որդիք իւր, եւ դարձցի յազգ իւր, եւ ի հայրենի կալուած իւր երթիցէ:
42. Զի ծառայք իմ են նոքա` զորս հանի յերկրէն Եգիպտացւոց. մի վաճառեսցի ի վաճառ ստրկի.
43. եւ մի տառապեցուսցես զնա:
44. Եւ ծառայ կամ աղախին որչափ եւ լինիցի քեզ յազգաց որ շուրջ զքեւ իցեն, ի նոցանէ ստասջիք.
45. եւ յորդւոց պանդխտացն` որ ի միջի ձերում իցեն, եւ ի նոցանէ ստանայցէք եւ յազգականաց նոցա. որչափ ինչ լինիցին յերկրին ձերում` եղիցին ձեզ ի կալուած.
46. եւ բաժանեսջիք զնոսա որդւոց ձերոց յետ ձեր, եւ եղիցին ձեզ ստրուկք յաւիտեան: Բայց յեղբարց ձերոց յորդւոցն Իսրայէղի` իւրաքանչիւր ոք զեղբայր իւր մի տառապեցուցանիցէք աշխատութեամբք:
47. Եւ թէ բաւական իցէ ձեռն եկին եւ պանդխտին` որ առ քեզ իցէ. եւ չքաւորեալ եղբայր քո` վաճառեսցի եկին կամ պանդխտին, որ առ քեզ իցէ` անդէն ծնելոյ պանդխտին:
48. Յետ վախճանելոյ նորա փրկանք լինիցին նմա. մի ոք` որ եւ իցէ յեղբարց իւրոց` փրկեսցէ զնա.
49. եղբայր հաւրն կամ որդի հաւրեղբաւր փրկեսցէ զնա. կամ ոք ընդանեաց մարմնոյ իւրոյ` ի ցեղէ իւրմէ փրկեսցէ զնա: Ապա թէ իւր իսկ զձեռամբ իցէ` ինքն փրկեսցէ զանձնն.
50. եւ համարեսցի ընդ ստացողին իւրոյ` յամէ անդի յորում վաճառեցաւ նմա մինչչեւ ցամն թողութեան. եւ եղիցի արծաթ գնոց նորա իբրեւ վարձկանի. ամ յամէ որչափ իցէ ընդ նմա:
51. Եւ եթէ աւելի եւս քան զայն ամս կայցէ, տացէ զփրկանս իւր յարծաթւոյ ստացուածոյն իւրոյ:
52. Եւ եթէ սակաւ ինչ կայցէ յամաց անտի մինչչեւ յամն թողութեան. համարեսցի իւր ըստ ամաց իւրոց, եւ տացէ զփրկանս իւր
53. իբրեւ զվարձկան ամ յամէ` որչափ իցէ ընդ նմա. եւ մի տառապեցուցանիցէ զնա աշխատութեամբ առաջի քո:
54. Ապա թէ ոչ փրկեսցէ ըստ այսմ աւրինակի, ելցէ յամին թողութեան` ինքն եւ որդիք իւր ընդ նմա.
55. զի իմ են որդիքն Իսրայէղի` ստրուկք ծառայք իմ, զորս հանի յերկրէն Եգիպտացւոց
Հաղորդում կայքում սխալի վերաբերյալ
Տվյալ հատվածում առկա է սխալ: