1. Եթէ արձակեսցէ այր զկին իւր, եւ գնասցէ ի նմանէ՝ եւ լինիցի առն այլում, եթէ դառնալով դարձցի անդրէն ի նոյն. ո՞չ ապաքէն պղծելով պղծիցի կինն այն։ եւ դու պոռնկեցար ընդ հովիւս բազումս, եւ ոչ դարձար առ իս՝ ասէ Տէր։
2. Ամբարձ զաչս քո յուղղութիւն՝ եւ տես ո՞ւր ոչ թաթաւեցար ի ճանապարհս քո. նստար դու նոցա իբրեւ ագռաւ միայնացեալ թափուր. եւ պղծեցեր զերկիրդ պոռնկութեամբ քո եւ չարեաւք քովք.
3. եւ ստացար հովիւս բազումս ի գայթագղութիւն քեզ։ երեսք կնոջ պոռնկի եղեն քեզ. անամաւթեցար առ ամենեսեան։
4. ոչ իբրեւ զՏէր կոչեցեր զիս. հայր եւ իշխան կուսութեան քո։
5. Միթէ յաւիտեա՞ն կայցէ, կամ ի սպա՞ռ պահեսցի. ահա խաւսեցար՝ եւ արարեր զայդ ամենայն չարիս՝ եւ զաւրացար։
6. Եւ ասէ ցիս Տէր յաւուրս Յովսիայ արքայի. Տեսե՞ր զինչ գործեաց բնակիչդ Իսրայէլի. գնաց առանձինն ի վերայ ամենայն լերանց բարձանց՝ եւ ի ներքոյ ամենայն անտառախիտ ծառոց, եւ անդ պոռնկեցաւ։
7. Եւ ասացի յետ այնչափ պոռնկութեան նորա. Դարձ առ իս, եւ ոչ դարձաւ. եւ ետես զցոփութիւն նորա ուխտադրուժն Յուդա։
8. եւ տեսի թէ յամենայնի որովք շնացաւ բնակիչն Իսրայէլի ըմբռնեցաւ. արձակեցի զնա, եւ ետու նմա թուղթ ապահարզանի ի ձեռս նորա. եւ ոչ զարհուրեցաւ ուխտադրուժն Յուդա քոյր նորա. այլ գնաց եւ պոռնկեցաւ եւ նա։
9. Եւ եղեւ յոչինչ պոռնկութիւն նորա. եւ շաղախէր զերկիրն, զի շնայր ընդ քարի եւ ընդ փայտին։
10. եւ ի վերայ այսր ամենայնի ոչ դարձաւ առ իս ուխտադրուժ քոյր նորա Յուդա՝ յամենայն սրտէ իւրմէ, այլ ստութեամբ՝ ասէ Տէր։
11. Եւ ասէ ցիս Տէր, Արդարացոյց զանձն իւր ապստամբութիւնն Իսրայէլի առ ուխտազանցութեամբն Յուդայ։
12. Այլ երթ եւ ընթերցիր զպատգամս զայսոսիկ ի կողմանս հիւսւսոյ, եւ ասասցես. Դարձ առ իս բնակիչդ Իսրայէլի՝ ասէ Տէր. եւ ոչ հաստատեցից զերեսս իմ ի վերայ ձեր, զի ողորմած եմ ես՝ ասէ Տէր. եւ ոչ պահեցից ձեզ ոխս յաւիտեան։
13. Բայց ծանիր զանիրաւութիւնս քո, զի ի Տէր Աստուած քո ամպարշտեցար. եւ տարածեցեր զճանապարհս քո աւտարաց ի ներքոյ ամենայն անտառախիտ ծառոց. եւ ձայնի իմում ոչ լուար՝ ասէ Տէր։
14. Դարձարուք առ իս որդիք հեռացեալք՝ ասէ Տէր, զի ես տիրեցից ձեզ. եւ առից զձեզ մի ի քաղաքէ եւ երկուս յազգէ, եւ տարայց զձեզ ի Սիովն։
15. եւ տաց ձեզ հովիւ ըստ սրտի իմում. եւ հովուելով հովուեսցեն զձեզ իմաստութեամբ։
16. Եւ եղիցի եթէ բազմանայցէք եւ աճիցէք ի վերայ երկրի յաւուրսն յայնոսիկ՝ ասէ Տէր, ոչ եւս ասիցեն՝ տապանակ կտակարանաց սրբոյն Իսրայէլի. եւ ոչ անկցի ի սիրտ. եւ ոչ անուանեսցի ի նմա. եւ ոչ եւս խնդրեսցի, եւ ոչ գործեսցի։ Յաւուրսն յայնոսիկ
17. եւ ի ժամանակին յայնմիկ կոչեսցեն զԵրուսաղէմ աթոռ Տեառն եւ ժողովեսցին ամենայն ազգք յանուն Տեառն յԵրուսաղէմ. եւ ոչ եւս գնասցեն զհետ խորհրդոց սրտից իւրեանց չարաց։
18. Յաւուրսն յայնոսիկ ժողովեսցին տունն Իսրայէլի առ տունն Յուդայ. եւ եկեսցեն ի միասին ի հիւսւսոյ՝ եւ յամենայն գաւառաց յերկիրն յորում ժառանգեցուցի զհարս նոցա։
19. Եւ ես ասեմ, Եղիցի Տէր։ Զի կարգեցից զձեզ յորդիս, եւ տաց ձեզ զերկիրն ընտիր, ժառանգութիւն անուանի Աստուծոյ ամենակալի ազգաց. եւ ասացից. թէ հայր կոչեսցես զիս, եւ ոչ եւս դառնայցես յինէն։
20. Բայց որպէս անգոսնէ կին զամուսին իւր. այնպէս անգոսնեաց զիս տունդ Իսրայէլի՝ ասէ Տէր։
21. Ձայն ի շրթանց գուժեաց՝ լալոյ եւ պաղատանաց որդւոցն Իսրայէլի. զի անիրաւեցան ի ճանապարհս իւրեանց եւ մոռացան զԱստուած սուրբն իւրեանց։
22. Դարձարուք որդիք՝ դարձիք, եւ ես բժշկեցից զբեկումն ձեր. եւ ասացին, աւասիկ կամք. զի դու ես Տէր Աստուած մեր։
23. արդարեւ՝ սուտ իսկ էին բլուրք եւ զաւրութիւնք բարձանց. բայց ի ձեռն Տեառն Աստուծոյ մերոյ է փրկութիւն տանն Իսրայէլի։
24. Եւ ամաւթ մաշեաց զվաստակս հարցն մերոց ի մանկութենէ իւրեանց. զխաշինս նոցա եւ զանդեայս, եւ զուստերս եւ զդստերս իւրեանց։
25. Ննջեցաք ամաւթով մերով, եւ ծածկեցին զմեզ անարգանք մեր. քանզի առաջի Աստուծոյ մերոյ մեղաք մեք եւ հարքն մեր ի մանկութենէ մինչեւ ցայսաւր. եւ ոչ լուաք ձայնի Տեառն Աստուծոյ մերոյ։
Հաղորդում կայքում սխալի վերաբերյալ
Տվյալ հատվածում առկա է սխալ: