1. Յամին իններորդի Սեդեկիա արքայի Յուդայ՝ յամսեանն տասներորդի. եկն եհաս Նաբուքոդոնոսոր արքայ բաբելացւոց, ինքն եւ ամենայն զաւրք իւր յԵրուսաղէմ, եւ պաշարեցին զնա։
2. Եւ յամին մետասաներորդի Սեդեկիայ՝ յամսեանն չորրորդի՝ որ աւր ինն էր ամսոյն, պատառեցաւ քաղաքն։
3. եւ մտին ամենայն զաւրավարք արքային բաբելացւոց, եւ նստան ի դրանն միջնումն. Ներգեղ, Սարասար, Սարմագադ, Նաբուսարսեքիմ, Ռափսարիս, եւ Ներգեղ, Սարասար, Ռաբմադ. եւ ամենայն այլ եւս իշխանք արքային բաբելացւոց։
4. Եւ եղեւ իբրեւ ետես զնոսա Սեդեկիա արքայ Յուդայ, եւ ամենայն արք պատերազմաւղք. փախեան եւ ելին գիշերի ի քաղաքէ անտի ընդ ճանապարհ բուրաստանին արքունի, ընդ դուռնն որ էր ի մէջ պարսպացն. եւ ելին ընդ ճանապարհն Արաբիայ։
5. Եւ զհետ եղեն նոցա զաւրք քաղդեացւոցն, եւ հասին Սեդեկիայ յԱրաբովթ Երիքովայ. կալան զնա՝ եւ ածին առ Նաբուքոդոնոսոր արքայ բաբելացւոց ի Դեբղաթա յերկիրն Եմաթայ։ Եւ խաւսեցաւ ընդ նմա դատաստանաւք։
6. եւ սպան արքայն բաբելացւոց զորդիսն Սեդեկիայ ի Դեբղաթա առաջի նորա։ եւ զամենայն ազատսն Յուդայ կոտորեաց արքայն բաբելացւոց։
7. եւ զաչսն Սեդեկիայ կուրացոյց, եւ կապեաց զնա պղնձի շղթայիւք տանել զնա ի Բաբելովն։
8. Եւ զտուն թագաւորին եւ զտունս ժողովրդեանն, այրեցին քաղդեացիքն հրով, եւ զպարիսպն Երուսաղէմի քակեցին։
9. եւ զմնացորդս ժողովրդեանն որ մնացին ի քաղաքին, եւ զանկեալսն որ անկան ի նա. եւ զսինլքորսն ժողովրդեանն որ մնացին, խաղացոյց Նաբուզարդան դահճապետ ի Բաբելոն։
10. Եւ յաղքատաց ժողովրդեանն՝ որոց ոչ ինչ գոյր, եթող Նաբուզարդան դահճապետ անդրէն յերկրին Յուդայ. եւ ետ նոցա այգիս եւ ջրարբիս յաւուր յայնմիկ։
11. Եւ ետ պատուիրանաւ Նաբուքոդոնոսոր արքայ բաբելացւոց զԵրեմիա ի ձեռս Նաբուզարդանայ դահճապետին եւ ասէ.
12. Առ զդա՝ եւ ակն ած ի վերայ դորա, եւ մի ինչ արասցես դմա չար. այլ զոր ինչ ասասցէ ցքեզ՝ արասցես դմա։
13. Եւ առաքեցին Նաբուզարդան դահճապետ, եւ Նաբուսազաբան ներքինապետ, եւ Ներգեղ. եւ Սարասար. եւ Ռոբոդոմ, եւ ամենայն մեծամեծք արքային բաբելացւոց.
14. եւ առին զԵրեմիա ի բանտէ անտի, եւ ետուն ցԳոդողիա որդի Աքիկամայ՝ որդւոյ Սափանայ, եւ հանին զնա ի տունն. եւ անդ նստէր ի մէջ ժողովրդեանն։
15. Եւ առ Երեմիա եղեւ բան Տեառն՝ մինչ էր ի նեղութեանն ի սրահի բանտին եւ ասէ.
16. Երթ եւ ասա ցԱբդամելէք Եթւովպացի. Այսպէս ասէ Տէր զաւրութեանց Աստուած Իսրայէլի. Ահաւադիկ ածեմ ես զբանն իմ ի վերայ քաղաքիդ այդորիկ ի չարիս՝ եւ ոչ ի բարիս։ եւ եղիցի առաջի աչաց քոց յաւուր յայնմիկ։
17. Եւ զքեզ փրկեցից յաւուր յայնմիկ՝ ասէ Տէր, եւ ոչ տաց զքեզ ի ձեռս արանցն յորոց դու երկնչիս յերեսաց նոցա։
18. զի ապրեցուցանելով ապրեցուցից զքեզ, եւ ի սուր մի անկցիս, եւ եղիցի քեզ անձն քո ի գիւտս, զի յուսացար յիս՝ ասէ Տէր։
Հաղորդում կայքում սխալի վերաբերյալ
Տվյալ հատվածում առկա է սխալ: