1. Բանն որ եղեւ ի վերայ Երեմիայի ի Տեառնէ՝ յետ արձակելոյն զնա Նաբուզարգանայ դահճապետի ի Հռամա. քանզի առին զնա կապեալ ձեռակապաւք ի միջոյ ամենայն գերութեանն Երուսաղէմի եւ Յուդայ՝ զոր խաղացուցին ի Բաբելոն։
2. առ զնա դահճապետն՝ եւ ասէ ցնա. Տէր Աստուած բարբառեցաւ զչարիսդ զայդ ի վերայ տեղւոյս այսորիկ։
3. եւ ած՝ եւ արար Տէր որպէս եւ խաւսեցաւ. զի մեղայք Տեառն, եւ ոչ լուայք ձայնի նորա, եւ եղեւ ընդ ձեզ բանդ այդ։
4. Եւ արդ՝ ահա այժմ լուծի զքեզ այսաւր ի ձեռակապացդ որ էին ի ձեռս քո. եթէ բարւոք թուի առաջի քո գալ ընդ իս ի Բաբելոն՝ եկ, եւ ածից ի վերայ քո ակն։ եւ եթէ չար թուի յաչս քո գալ ընդ իս ի Բաբելոն, դադարեա աստէն. ահա ամենայն երկիրս առաջի քո է ի բարիս, ուր հաճոյ է քեզ երթալ՝ անդր երթիցես։
5. Եւ մինչդեռ աստ եմ, երթ յով եւ կամիս. եւ դարձիր առ Գոդողիա որդի Աքիկամայ որդւոյ Սափանայ. զոր կացոյց արքայն բաբելացւոց ի վերայ երկրիդ Հրէաստանի, եւ բնակեսցես ընդ նմա ի մէջ ժողովրդեանն։ ապա թէ ոչ՝ ըստ ամենայն հաճութեան աչաց քոց երթալոյ երթիցես։ եւ ետ նմա դահճապետն նպարակս, եւ պարգեւս՝ եւ արձակեաց։
6. Եւ եկն Երեմիա առ Գոդողիա որդի Աքիկամայ ի Մասեփա, եւ նստաւ անդ ի մէջ ժողովրդեան երկրին մնացելոց։
7. Եւ լուան ամենայն զաւրավարք զաւրաց որ էին ի բացի, ինքեանք եւ զաւրք իւրեանց, թէ կացոյց արքայն բաբելացւոց զԳոդողիա որդի Աքիկամայ ի վերայ երկրին. եւ յանձն արար նմա զարս՝ եւ զկանայս, եւ ժողովուրդ բազում. եւ յաղքատաց ժողովրդեան երկրին զորս ոչ խաղացոյց ի Բաբելովն։
8. Եկին առ Գոդողիա ի Մասեփայ, Իսմայէլ որդի Նաթանայ, եւ Յովնան եւ Յովնաթան որդիք Կարէի. եւ Սարեա որդի Թանաթեմայ, եւ որդիք Ովփերի որդւոյ Նետոփատայ, եւ Յեզոնիա որդի Մաքաթայ. ինքեանք եւ արք որ ընդ նոսա։
9. Եւ երդուաւ նոցա Գոդողիա որդի Աքիկամայ որդւոյ Սափանայ, եւ արանցն որ ընդ նոսա՝ եւ ասէ. Մի երկնչիք յերեսաց ծառայիցն քաղդեացւոց, այլ բնակեցէք յերկրիս. եւ հարկեցարուք արքային բաբելացւոց, եւ բարի եղիցի ձեզ։
10. Եւ ես ահաւասիկ նստիմ ի Մասեփա. կալ ընդդէմ քաղդեացւոցն որ ելանիցեն ի վերայ ձեր։ եւ դուք ժողովեցէք զգինի եւ զմիրգ, եւ ժողովեցէք եւղ յամանս ձեր. եւ բնակեցէք ի քաղաքս ձեր զորս կալայք քաջութեամբ։
11. Եւ ամենայն հրէայք որ էին յերկրին Մովաբացւոց, եւ ի մէջ որդւոցն Ամովնայ, եւ որք Յեդովմ՝ եւ որք յամենայն երկիր, լուան եթէ թող արքայն բաբելացւոց մնացորդս ի Հրէաստանի. եւ կացոյց նոցա վերակացու՝ զԳոդողիա որդի Աքիկամայ որդւոյ Սափանայ,
12. դարձան անդրէն ամենայն հրէայք յամենայն տեղեաց ուր ցրուեցան անդր, եւ եկին յերկիրն Յուդայ առ Գոդողիա ի Մասեփա, եւ ժողովեցին գինի եւ միրգ բազում յոյժ։
13. Եւ Յովնան որդի Կարէի, եւ ամենայն զաւրավարք զաւրացն որ էին ի բացի՝ եկին առ Գոդողիա ի Մասեփա.
14. եւ ասեն ցնա. Զայն գիտիցե՞ս զի Բայաելիս թագաւոր որդւոցն Ամովնայ արձակեաց առ Իսմայէլ որդի Նաթանայ սպանանել զքեզ։ եւ ոչ հաւատաց նոցա Գոդողիա որդի Աքիկամայ։
15. Եւ Յովնան որդի Կարէի՝ ասէ գաղտ ցԳոդողիա ի Մասեփա. Երթա՞յց սպանից զԻսմայէլ որդի Նաթանայ, եւ մի ոք գիտասցէ։ գուցէ՞ երբէք սպանանիցէ զքեզ, եւ ցրուեսցին հրէայք որ ժողովեալ են առ քեզ. եւ կորնչիցին մնացորդք Յուդայ։
16. Եւ ասէ Գոդողիա որդի Աքիկամայ ցՅովնան որդի Կարէի. Մի արասցես ըստ բանիդ այդորիկ, զի սուտ խաւսեցար դու զԻսմայելէ։
Հաղորդում կայքում սխալի վերաբերյալ
Տվյալ հատվածում առկա է սխալ: