1․ Որովք ի կուտել բիւրաւորաց ժողովրդեանն՝ մինչեւ կոխե՛լ զմիմեանս: Սկսաւ ասել ցաշակերտսն իւր. Նախ՝ զգո՛յշ լերուք անձանց ի խմորոյ սադուկեցւոցն, որ է կեղծաւորութիւն:
2․ Զի ո՛չինչ է ի ծածուկ՝ որ ոչ յայտնեսցի, եւ գաղտնի՝ որ ո՛չ ծանիցի:
3․ Վասն զի զոր ինչ ասիցէք ի խաւարի, լսելի լիցի ի լո՛յս. եւ զոր յունկանէն խաւսեցարուք ի շտեմարանս, քարոզեսցի ի վերայ տանեաց:
4․ Բայց ձե՛զ ասեմ սիրելեաց իմոց. մի՛ զարհուրիցիք յայնցանէ որ սպանանեն զմարմին, եւ յետ այնորիկ աւելի ինչ ո՛չ ունիցին առնել:
5․ Այլ ցուցի՛ց ձեզ յումէ երկնչիցիք: Երկնչիջի՛ք յայնմանէ՝ որ յետ սպանանելո՛յ ունի իշխանութիւն արկանե՛լ ի գեհեն. այո՛ ասե՛մ ձեզ, յայնմանէ երկնչիջի՛ք:
6․ Ոչ ապաքէն հինգ ձագ՝ երկուց դանգաց վաճառի, եւ մի ի նոցանէ ո՛չ է մոռացեալ առաջի Աստուծոյ:
7․ Այլ ձեր՝ եւ ամենայն իսկ հեր գլխոյ թուեալ մի՛ երկնչիք, զի քան զբազում ձագս լաւ էք դուք:
8․ Ասե՛մ զի ամենայն որ խոստովանեսցի յիս առաջի մարդկան, եւ որդի մարդոյ խոստովանեսցի՛ զնմանէ առաջի հրեշտակաց Աստուծոյ:
9․ Եւ որ ուրասցի զիս առաջի մարդկան, ուրացեա՛լ լիցի առաջի հրեշտակաց Աստուծոյ:
10․ Եւ ամենայն որ ասէ բան զորդւոյ մարդոյ, թողցի՛ նմա. բայց որ զհոգին սուրբ հայհոյիցէ, մի՛ թողցի նմա:
11․ Այլ յորժամ տանիցին զձեզ ի ժողովուրդս, եւ ի պետութիւնս, եւ յիշխանութիւնս, մի՛ հոգայցէք՝ որպէս թէ զինչ պատասխանի տայցէք, կամ զինչ ասիցէք:
12․ Զի հոգին սուրբ ուսուսցէ ձեզ ի նմին ժամու՝ զինչ պա՛րտ իցէ խաւսել:
13․ Ասէ ոմն ի ժողովրդենէն ցնա. Վա՛րդապետ՝ ասա ցեղբայր իմ՝ բաժանել ընդ իս զժառանգութիւնն:
14․ Եւ նա՝ ասէ ցնա. Ա՛յր դու՝ ո՞ կացոյց զիս դատաւոր կամ բաժանարա՛ր ի վերայ ձեր:
15․ Եւ ասէ ցնոսա. Տեսէ՛ք եւ զգո՛յշ լերուք յամենայն ագահութենէ, զի ո՛չ եթէ ի մթերից ընչից ուրուք իցեն կեանք նորա:
16․ Խաւսեցա՛ւ առ նոսա առակ մի՝ եւ ասէ. Ա՛ռն ուրումն մեծատան ետուն անդք տոհմակա՛նս:
17․ Եւ խորհէ՛ր ի միտս իւր՝ եւ ասէր. Զի՞ գործեցից՝ զի ո՛չ գոյ տեղի ուր ժողովեցից զարդիւնս իմ:
18․ Եւ ասէ. Գիտե՛մ զինչ արարից. քակեցի՛ց զշտեմարանս իմ՝ եւ եւս մեծամեծս շինեցից. եւ անդր ժողովեցից զցորեան եւ զամենայն բարութիւնս իմ.
19․ եւ ասացից ցանձն իմ. ա՛նձն՝ ունի՛ս բազում բարութիւնս համբարեալ ամաց բազմաց. հանգի՛ր՝ կե՛ր՝ ա՛րբ եւ ուրա՛խ լեր:
20․ Ասէ ցնա Աստուած. Ա՛նմիտ՝ յայսմ գիշերի զոգիդ ի քէն ի բաց պահանջիցեն, իսկ զոր պատրաստեցերն՝ ո՞ւմ լինիցի:
21․ Նոյնպէս եւ որ գանձէ անձին, եւ ո՛չ յԱստուած մեծանայցէ:
22․ Ասէ ցաշակերտսն իւր. Վասն այդորիկ ասե՛մ Մի՛ հոգայք ընդ ոգւոյ՝ թէ զինչ ուտիցէք, եւ մի՛ ընդ մարմնոյ՝ թէ զինչ զգենուցուք.
23․ զի ոգի՝ առաւե՛լ է քան զկերակուր, եւ մարմին քան զհանդերձ:
24․ Հայեցարո՛ւք ընդ ագռաւս, զի ո՛չ սերմանեն եւ ո՛չ հնձեն, որոց ո՛չ գոն շտեմարանք՝ եւ ո՛չ համբարանոցք. եւ Աստուած կերակրէ զնոսա. ո՛րչափ եւս առաւել զձե՛զ՝ որ լա՛ւ էք քան զթռչունս:
25․ Ո՞վ ի ձէնջ առ հոգալ՝ կարիցէ յաւելուլ ի հասակ իւր կանգուն մի:
26․ Իսկ արդ՝ եթէ ի փոքուն չէ՛ք բաւական՝ վասն այլոցն զի՞ հոգայցէք:
27․ Հայեցարո՛ւք ընդ շուշանն՝ ո՛րպէս աճէ, ո՛չ ջանայ՝ եւ ո՛չ նիւթէ՛: Ասե՛մ ձեզ, եւ ո՛չ Սողովմո՛ն յամենայն ի փառսն իւր զգեցաւ իբրեւ զմի ի նոցանէ:
28․ Իսկ եթէ զխոտն՝ որ այսաւր ի բացի՛ է՝ եւ վաղիւ ի հնոց արկանելի, Աստուած այնպէս զգեցուցանէ. ո՞րչափ եւս առաւել զձեզ թե՛րահաւատք:
29․ Եւ դուք մի՛ խնդրէք՝ զինչ ուտիցէք կամ զինչ ըմպիցէք, եւ մի՛ զբաղնուք.
30․ զի զայն ամենայն հեթանո՛սք աշխարհի խնդրեն: Այլ ձեր հայր՝ գիտէ՛ զի պիտոյ է այն ամենայն:
31․ Բայց խնդրեցէ՛ք զարքայութիւն Աստուծոյ. եւ այն յաւելցի ձեզ:
32․ Մի՛ երկնչիր հաւտ փոքրիկ. զի հաճեցաւ հայր ձեր տա՛լ ձեզ զարքայութիւնն:
33․ Վաճառեցէ՛ք զինչս ձեր, եւ տո՛ւք ողորմութիւն. եւ արարէ՛ք ձեզ քսակս առանց հնանալո՛յ, գանձ անպակա՛ս յերկինս. ուր ո՛չ գող մերձենայ, եւ ո՛չ ցեց ապականէ:
34․ Զի ուր գանձն ձեր է, ա՛նդ եւ սիրտք ձեր եղիցին:
35․ Եղիցին գաւտիք ձեր պնդեա՛լ ընդ մէջս, եւ ճրագունք լուցեալք:
36․ Եւ դուք նմանաւղք մարդկան՝ որ ա՛կն ունիցին Տեառն իւրեանց՝ թէ ե՞րբ դառնայցէ ի հարսանեաց: Զի յորժամ գայցէ եւ բախիցէ, վաղվաղակի՛ բանայցեն նմա:
37․ Երանի՛ իցէ ծառայիցն այնոցիկ, զորս եկեալ Տէրն գտցէ արթունս: Ամէն ասե՛մ ձեզ՝ զի գաւտի ընդ մէջ ածցէ, եւ բազմեցուսցէ զնոսա, եւ անցեալ պաշտիցէ՛ զնոսա:
38․ Եւ եթէ յերկրորդ՝ կամ յերրորդ պահո՛ւ եկեսցէ՝ եւ գտցէ այնպէս, երանելի՛ են ծառայքն այնոքիկ:
39․ Բայց զայն գիտասջի՛ք, եթէ գիտէ՛ր տանուտէրն յորում ժամու գող գայ, չտայր թոյլ ական հատանե՛լ ի տան իւրում:
40․ Եւ դուք՝ եղերո՛ւք պատրաստք, զի յորում ժամու ո՛չ կարծիցէք, գա՛յ որդի մարդոյ:
41․ Ասէ Պե՛տրոս. Տէր՝ առ մե՞զ ասացեր զառակդ զայդ՝ թէ առ ամենեսեան:
42․ Եւ ասէ Տէր. Ո՞վ իցէ հաւատարիմ տնտես եւ իմաստուն, զոր կացոյց տէ՛ր իւր ի վերայ գերդաստանի իւրոյ տա՛լ ի ժամու զկերակուրս:
43․ Երանի՛ իցէ ծառային այնմիկ՝ զոր եկեալ տէ՛ր իւր գտանիցէ արարեալ այնպէս:
44․ Արդարեւ ասե՛մ ձեզ, զի ի վերայ ամենայն ընչից իւրոց կացուսցէ զնա:
45․ Ապա թէ ասիցէ ծառայն ա՛յն ի սրտի իւրում. Յամէ՛ տէր իմ ի գալ. եւ սկսանիցի հարկանել զծառայսն եւ զաղախնայս, ուտել եւ ըմպե՛լ եւ արբենալ.
46․ եկեսցէ տէր ծառային այնորիկ՝ յաւուր յորում ակն ո՛չ ունիցի, եւ ի ժամու յորում ո՛չ գիտիցէ. ընդ մէ՛ջ կտրեսցէ զնա, եւ զմասն նորա ընդ անհաւա՛տս դիցէ:
47․ Եւ ծառա՛յ որ գիտիցէ զկամս տեառն իւրոյ՝ եւ ոչ պատրաստեսցի ըստ կամաց նորա, արբցէ գան բազում:
48 Եւ որ ոչն գիտիցէ՝ եւ արժանի գանի ինչ գործիցէ, արբցէ գան սակա՛ւ: Ամենա՛յն որում շատ տուաւ, շա՛տ խնդրեսցի ի նմանէ. եւ որում բազում աւանդեցաւ, առաւե՛լ եւս պահանջեսցեն ի նմանէ:
49․ դևդ. Հո՛ւր եկի արկանել յերկիր: Եւ զի՞նչ. կամիմ թէ արդէն իսկ բորբոքէր:
50․ Եւ մկրտութիւն մի ունիմ մկրտել. եւ զիա՞րդ, փութամ մինչեւ կատարեսցի՛:
51․ Համարիք եթէ խաղաղութի՞ւն եկի տալ յերկիր, ո՛չ. ասե՛մ ձեզ, այլ բաժի՛նս:
52․ Զի եղիցին յայսմ հետէ հինգ ի տա՛ն միում բաժանեալք, երե՛քն՝ յերկուց, եւ երկուքն՝ յերի՛ց:
53․ Բաժանեսցի՛ հայր՝ յորդւոյ, եւ որդի՝ ի հաւրէ. մայր՝ ի դստերէ, եւ դուստր՝ ի մաւրէ. սկեսուր՝ ի հարսնէ, եւ հարսն՝ ի սկեսրէ իւրմէ:
54․ Ասա՛ց եւ ցժողովուրդսն. յորժամ տեսանիցէք ա՛մպ ծագեալ յարեւմտից, իսկո՛յն ասէք՝ թէ անձրեւ գայ, եւ լինի՛ այնպէս.
55․ եւ յորժամ հարա՛ւ շնչեալ, ասէք թէ խորշա՛կ լինի, եւ լինի՛ այնպէս:
56․ Կե՛ղծաւորք՝ զերեսս երկնի եւ երկրի գիտէ՛ք փորձել, իսկ զժամանակս զայս զիա՞րդ ո՛չ փորձէք:
57․ Ընդէ՞ր եւ յանձանց իսկ ո՛չ ընտրեցէք զարժանն:
58․ Յորժամ երթայցես ընդ ոսոխի՛ քում առ իշխան, ի ճանապարհի՛ տուր զհաշիւն զերծանել ի նմանէ. զի գուցէ քարշիցէ՛ զքեզ առ դատաւորն, եւ դատաւորն մատնիցէ դահճի՛, եւ դահիճն արկանիցէ ի բա՛նտ:
59․ Ասե՛մ քեզ, ո՛չ ելանիցես անտի՝ մինչեւ հատուցանիցես զյետի՛ն բնիոնն:
Հաղորդում կայքում սխալի վերաբերյալ
Տվյալ հատվածում առկա է սխալ: