1․ Եւ եղեւ ընդ աւուրսն ընդ այնոսիկ ե՛լ հրաման յԱւգոստոս կայսերէ՝ աշխարհագի՛ր առնել ընդ ամենայն տիեզերս:
2․ Այս՝ առաջի՛ն աշխարհագիր եղեւ ի դատաւորութեան ասորւոց՝ Կիւրէնեայ:
3․ Եւ երթայի՛ն ամենեքեան մտանել յաշխարհագիր յիւրաքանչի՛ւր քաղաքի:
4․ Ե՛լ եւ Յովսէփ ի Գալիլեէ ի քաղաքէ Նազարեթէ ի Հրէաստան, ի քաղա՛ք Դաւթի, որ կոչի Բեթղահէմ. վասն լինելոյ նորա ի տանէ եւ յազգէ՛ Դաւթի,
5․ մտանե՛լ յաշխարհագիր Մարեմաւ հանդերձ զոր խաւսեալն էր նմա, եւ էր յղի՛:
6․ Եւ եղեւ ի հասանելն նոցա անդր, լցա՛ն աւուրք ծնանելոյ նորա:
7․ Եւ ծնա՛ւ զորդին իւր զանդրանիկ, եւ պատեա՛ց ի խանձարուրս, եւ ե՛դ զնա ի մսուր. զի ո՛չ գոյր նոցա տեղի յիջավանին:
8․ Եւ հովի՛ւք էին ի տեղւոջն յայնմիկ բացաւթեագք, որ պահէին զպահպանութիւնս գիշերոյ հաւտից իւրեանց:
9․ Եւ հրեշտա՛կ Տեառն երեւեցաւ նոցա, եւ փառք Տեառն ծագեցին առ նոսա. եւ երկեան՝ երկեւղ մեծ:
10․ Եւ ասէ ցնոսա հրեշտակն. Մի՛ երկնչիք, զի ահաւասիկ աւետարանեմ ձեզ ուրախութիւն մեծ, որ եղիցի ամենայն ժողովրդեանն.
11․ զի ծնաւ ձեզ այսաւր փրկի՛չ, որ է՝ աւծեա՛լ Տէր. ի քաղաքի՛ Դաւթի:
12․ Եւ ա՛յս նշանա՛կ գտանիցէք մանուկ պատեալ ի խանձարուրս, եւ եդեա՛լ ի մսուր:
13․ Եւ յանկարծակի եղեւ ընդ հրեշտակին ընդ այնմիկ բազմութիւն զաւրաց երկնաւորաց, որ աւրհնէին զԱստուած՝ եւ ասէին.
14․ Փա՛ռք ի բարձունս Աստուծոյ, եւ յերկիր խաղաղութիւն, ի մարդիկ հաճութիւն:
15․ Եւ եղեւ իբրեւ վերացան ի նոցանէ հրեշտակքն յերկինս, ասեն ցմիմեանս հովիւքն. եկա՛յք երթիցուք մինչեւ ցԲեթղահէմ, եւ տեսցո՛ւք զինչ է բանս այս որ եղեւ. զոր Տէր եցոյց մեզ:
16․ Եւ եկին փութանակի, եւ գտին զՄարիամ եւ զՅովսէփ, եւ զմանուկն եդեալ ի մսուր:
17․ Եւ ծանեան վասն բանին՝ որ ասացաւ նոցա զմանկանէն:
18․ Եւ ամենեքին որ լսէին՝ զարմանային վասն բանիցն՝ զոր խաւսեցան ընդ նոսա հովիւքն:
19․ Եւ Մարիամ զամենայն զբանս զայսոսիկ պահէր, եւ խելամո՛ւտ լինէր ի սրտի իւրում:
20․ Եւ դարձան հովիւքն՝ փառաւո՛ր առնէին եւ աւրհնէին զԱստուած, վասն ամենայնի զոր լուան եւ տեսին, որպէս պատմեցա՛ւ նոցա:
21․ Եւ իբրեւ լցան աւուրք ութ թլփատել զնա, եւ կոչեցաւ անուն նորա Յիսուս. որ կոչեցեա՛լ էր ի հրեշտակէն, մինչչե՛ւ յղացեալ էր զնա յորովայնի:
22․ Եւ իբրեւ լցան աւուրք սրբութեան նոցա ըստ աւրինացն Մովսիսի, ածին զնա յԵրուսաղէմ յանդիմա՛ն առնել Տեառն:
23․ Որպէս եւ գրեա՛լ է յաւրէնս Տեառն, թէ ամենայն արու որ բանա՛յ զարգանդ՝ սուրբ Տեառն կոչեսցի:
24․ Եւ տալ պատարա՛գս՝ ըստ ասացելոյն յաւրէնս Տեառն, զոյգս տատրակաց, կամ երկուս ձագս աղաւնեաց:
25․ Եւ ահա՝ էր այր մի յԵրուսաղէմ, որոյ անուն էր Սիմէ՛ովն. եւ էր այրն այն արդա՛ր եւ երկիւղա՛ծ, եւ ա՛կն ունէր մխիթարութեանն Իսրայէլի, եւ հոգի՛ սուրբ՝ է՛ր ի նմա:
26․ Եւ էր նորա հրաման առեալ ի հոգւոյն սրբոյ՝ մի՛ տեսանել զմահ, մինչեւ տեսցէ զաւծեալն Տեառն:
27․ Եւ ե՛կն հոգւովն ի տաճարն: Եւ իբրեւ ածին ծնաւղքն զմանուկն Յիսուս, առնել նոցա ըստ սովորութեան աւրինացն ի վերայ նորա.
28․ եւ նա՝ ա՛ռ ընկալա՛ւ զնա ի գիրկս իւր, եւ աւրհնեաց զԱստուած, եւ ասէ.
29․ Արդ՝ արձակե՛ս զծառայս քո Տէր ըստ բանի քում ի խաղաղութիւն.
30․ զի տեսի՛ն աչք իմ զփրկութիւն քո.
31․ զոր պատրաստեցեր առաջի ամենայն ժողովրդոց:
32․ Լո՛յս ի յայտնութիւն հեթանոսաց, եւ փառս ժողովրդեան քում Իսրայէլի:
33․ Եւ էին հայրն եւ մայր նորա զարմացեա՛լ ի վերայ բանիցն, որ խաւսէին զնմանէ:
34 ․Եւ աւրհնեաց զնոսա Սիմէ՛ովն, եւ ասէ ցՄարիամ մայրն նորա. Ահա սա՛ կայ՝ ի գլորումն եւ ի կանգնումն բազմաց ի մէջ Իսրայէլի, եւ ի նշա՛ն հակառակութեան:
35․ Եւ ընդ քո՛ իսկ անձն անցցէ՛ սուր. զի յայտնեսցի՛ն ի բազում սրտից խորհուրդք:
36․ Եւ ա՛նդ էր Աննա մարգարէ՝ դուստր Փանուելի յազգէ Ասերայ. սա՛ ինքն անցեա՛լ էր զաւուրբք բազմաւք, կեցեալ ընդ առն ամս եւթն ի կուսութենէ իւրմէ:
37․ Եւ էր՝ այրի՛ ամաց իբրեւ ութսուն եւ չորից. որ ո՛չ մեկնէր ի տաճարէն, այլ պահաւք եւ աղաւթիւք պաշտէ՛ր զցա՛յգ եւ զցերեկ:
38․ Եւ սա՝ ի նմին ժամու յարուցեալ, գոհանա՛յր զՏեառնէ, եւ խաւսէ՛ր զնմանէ ընդ ամենեսին՝ որ ա՛կն ունէին փրկութեանն Երուսաղէմի:
39․ Եւ իբրեւ կատարեցին զամենայն ըստ աւրինացն Տեառն, դարձա՛ն անդրէն ի Գալիլեա ի քաղաքն իւրեանց Նազարեթ:
40․ Եւ մանուկն աճէ՛ր եւ զաւրանայր լի՛ իմաստութեամբ. եւ շնո՛րհք Աստուծոյ էին ի վերայ նորա:
41․ Եւ երթային ծնաւղքն նորա ամի՝ ամի՝ յԵրուսաղէմ ի տաւն զատկին:
42․ Եւ իբրեւ եղեն նորա ա՛մք երկոտասան, յելանել նոցա յԵրուսաղէմ ըստ սովորութեան տաւնին,
43․ եւ կատարել զաւուրսն՝ եւ դառնա՛լ անդրէն, մնա՛ց Յիսուս մանուկն յԵրուսաղէմ. եւ ո՛չ գիտացին ծնաւղքն նորա:
44․ Կարծէին զնմանէ՝ թէ ընդ ուղեկիցսն իցէ. եկին իբրեւ աւուր միոյ ճանապարհ, եւ խնդրէին զնա ընդ դրացի՛ս եւ ընդ ծանաւթս:
45․ Եւ իբրեւ ո՛չ գտին, դարձա՛ն անդրէն յԵրուսաղէմ խնդրել զնա:
46․ Եւ եղեւ յետ երից աւուրց, գտին զնա ի տաճարին զի նստէ՛ր ընդ վարդապետսն, լսէ՛ր ի նոցանէ՝ եւ հարցանէ՛ր զնոսա: Զարմանայի՛ն ամենեքեան որ լսէինն ի նմանէ՝ ընդ իմաստութիւնն եւ ընդ պատասխանիս նորա:
47․ Եւ իբրեւ տեսին զնա՝ սքանչացա՛ն: Եւ ասէ ցնա մայրն իւր. Ո՛րդեակ՝ զի՞նչ գործ գործեցեր դու ընդ մեզ. ահաւասիկ հայր քո՝ եւ ես՝ տառապեաք՝ խնդրեաք զքեզ:
48․ Եւ ասէ ցնոսա. Զի՞ խնդրէիք զիս, ո՛չ գիտէիք եթէ ի տան հաւր իմոյ պա՛րտ է ինձ լինել:
49․ Եւ նոքա՝ ո՛չ իմացան զբանն զոր խաւսեցաւ ընդ նոսա:
50․ Եւ էջ ընդ նոսա, եւ գնա՛ց ի Նազարեթ. եւ էր նոցա հնազա՛նդ: Եւ մայրն նորա պահէր զամենայն բանսն ի սրտի իւրում:
51․ Եւ Յիսուս զարգանա՛յր իմաստութեամբ եւ հասակաւ՝ եւ շնորհա՛ւք յԱստուծոյ եւ ի մարդկանէ:
Հաղորդում կայքում սխալի վերաբերյալ
Տվյալ հատվածում առկա է սխալ: