1․ Եւ յարուցեալ ամենայն բազմութիւնն նոցա, ածի՛ն զնա առ Պեղատոս:
2․ Եւ սկսան չարախա՛ւս լինել զնմանէ՝ եւ ասել. Գտաք զսա զի թիւրէր զազգս մեր, եւ արգելո՛յր ի տալոյ հարկս կայսեր, եւ ասէր զանձնէ՝ թէ Քրիստոսն իցէ թագաւոր:
3․ Իսկ Պեղատոս եհարց զնա՝ եւ ասէ. Դո՞ւ ես թագաւորն հրէից: Նա՝ պատասխանի՛ ետ նմա եւ ասէ. Դո՛ւ ասացեր:
4․ Ասէ Պեղատոս ցքահանայապետսն եւ ցժողովուրդսն. Չգտանեմ ինչ վնաս յառնս յայսմիկ:
5․ Եւ նոքա պնդէին, եւ ասէին, թէ խռովէ՛ զժողովուրդս, ուսուցանէ՛ ընդ ամենայն Հրէաստան՝ սկսեալ ի Գալիլեէ մինչեւ ցայսր:
6․ Իսկ Պեղատոս իբրեւ լուաւ զԳալիլեէ, եհա՛րց եթէ գալիլեացի՛ է այրն:
7․ Եւ իբրեւ գիտաց թէ յիշխանութենէն Հերովդի է, ետ տանե՛լ զնա առ Հերովդէս. քանզի եւ նա՛ յԵրուսաղէմ էր յաւուրսն յայնոսիկ:
8․ Եւ Հերովդէս իբրեւ ետես զՅիսուս, ուրա՛խ եղեւ յոյժ. զի ցանկա՛յր ի բազում ժամանակաց տեսանել զնա. քանզի լսէր բազում անգամ զնմանէ, եւ ակն ունէր նշա՛ն ինչ լիեալ՝ տեսանել ի նմանէ:
9․ Հարցանէր զնա բանիւք բազմաւք, եւ նա՛ ո՛չինչ ետ նմա պատասխանի:
10․ Կայի՛ն քահանայապետքն եւ դպիրք՝ եւ պնդագո՛յնս չարախաւսէին զնմանէ:
11․ Արհամարհեա՛ց զնա եւ Հերո՛վդէս հանդերձ իւրո՛վք զաւրականաւքն. եւ ա՛յպն արարեալ՝ ա՛րկ զնովաւ հանդերձս սպիտակս, եւ ետ տանե՛լ անդրէն առ Պեղատոս:
12․ Եւ եղեն բարեկա՛մք Պեղատոս եւ Հերովդէս յաւուր յայնմիկ. քանզի յառաջ թշնամի՛ք էին միմեանց:
13․ Կոչեաց Պեղատոս զքահանայապետսն եւ զիշխանս եւ զժողովուրդն,
14․ եւ ասէ ցնոսա. Ածէք մատուցէք ինձ զայրս զայս իբրեւ զխոտորեցուցի՛չ ժողովրդեանն. եւ ահաւասիկ առաջի ձե՛ր դատեցայ, եւ վնաս ինչ՝ ո՛չ գտի յառնս յայսմիկ՝ զորոց դուք չարախաւսեցէքդ զդմանէ:
15․ Այլ եւ ո՛չ Հերո՛վդէս, քանզի ետո՛ւ տանե՛լ զդա առ նա: Եւ արդ՝ ո՛չի՛նչ մահու արժանի է գործեալ դորա.
16․ խրատեցից զդա, եւ արձակեցի՛ց:
17․ Զի հա՛րկ էր մի մի ըստ տաւնի արձակե՛լ նոցա:
18․ Եւ նոքա՝ աղաղակէին ամենայն բազմութեամբն՝ եւ ասէին. Բա՛րձ զդա, եւ արձակեա՛ մեզ զԲարա՛բբա,
19․ որ էր վասն խռովութեան իրիք եղելոյ ի քաղաքին եւ սպանութեան մտեալ ի բանտ:
20․ Դարձեալ Պեղատոս սկսաւ խաւսե՛լ, քանզի կամէր արձակե՛լ զՅիսուս:
21․ Եւ նոքա՝ անդրէն աղաղակէին եւ ասէին. Ի խաչ հան զդա:
22․ Եւ նա՝ երիցս ասէ ցնոսա. Զի՞նչ չար արա՛ր սա. ո՛չինչ վնաս մահու գտի ի սմա. խրատեցից զսա եւ արձակեցի՛ց:
23․ Եւ նոքա ստիպէին մեծաձայն՝ եւ խնդրէին զնա՝ ի խա՛չ հանել. եւ զաւրանային բարբառքն նոցա եւ քահանայապետիցն:
24․ Եւ Պեղատոս հաւանեցաւ՝ առնե՛լ զհայցուածս նոցա:
25․ Արձակեաց նոցա զԲարա՛բբայն՝ զոր վասն խռովութեան եւ սպանութեան արկեալ էր ի բանտ, զոր եւ խնդրէի՛նն իսկ. եւ զՅիսուս մատնեա՛ց կամացն նոցա:
26․ Իբրեւ առին գնացին զնա, ըմբռնեցին զոմն Սի՛մովն կիւրենացի՝ որ գայր յանդէ. եդին ի վերայ նորա զխաչն՝ բերե՛լ զկնի Յիսուսի:
27․ Եւ երթ՛այր զհետ նորա բազմութիւն ժողովրդեանն, եւ կանանց՝ որ կոծէին եւ աշխարէին զնա:
28․ Դարձաւ Յիսուս եւ ասէ՛ ցնոսա. Դստերք Երուսաղէմի՝ մի՛ լայք ի վերայ իմ, այլ լացէ՛ք ի վերայ անձա՛նց եւ ի վերայ որդւոց ձերոց:
29․ Զի եկեսցեն աւուրք յորս ասիցեն, թէ երանի՛ ամլոց եւ որովայնից՝ որ ո՛չ ծնան, եւ ստեանց՝ որ ո՛չ դիեցուցին:
30․ Յայնժամ սկսանիցին ասել լերանց՝ թէ անկերո՛ւք ի վերայ մեր, եւ բլրոց՝ թէ ծածկեցէ՛ք զմեզ:
31․ Զի եթէ ընդ փայտ դալար՝ զա՛յս առնեն, ընդ չորն՝ զի՞նչ լինիցի:
32․ Ածին եւ ա՛յլ երկուս չարագործս՝ սպանանե՛լ ընդ նմա:
33․ Իբրեւ չոգա՛ն ի տեղին՝ կոչեցեալ գագաթն, ա՛նդ հանին զնա ի խաչ: Եւ զչարագործսն՝ զոմն ընդ աջմէ՝ եւ զոմն ընդ ձախմէ՛ խաչեցին:
34․ Եւ Յիսուս ասէ. Հայր՝ թո՛ղ դոցա՝ զի ոչ գիտեն զինչ գործեն: Եւ ի բաժանել զհանդերձս նորա, արկին վիճա՛կս:
35․ Եւ կայր ժողովուրդն հայեցեա՛լ: Անգոսնէին զնա իշխա՛նքն հանդերձ նոքաւք՝ եւ ասէին. Զայլս ապրեցոյց, ապրեցուսցէ՛ եւ զանձն՝ եթէ դա՛ է Քրիստոս որդի Աստուծոյ ընտրեալն:
36․ Ա՛յպն առնէին զնա եւ զինուորքն, եկեալ առաջի՝ մատուցանէի՛ն նմա քացախ,
37․ եւ ասէին. Եթէ դու ես թագաւորն հրէից՝ փրկեա՛ զանձն քո:
38․ Եւ էր գի՛ր գրեալ ի վերայ նորա, յունարէն՝ եւ դաղմատերէն՝ եւ եբրայեցերէն գրով, թէ՝ սա՛ է արքայն հրէից:
39․ Իսկ մի ոմն՝ ի կախելոց չարագործացն հայհոյէ՛ր զնա՝ եւ ասէր. Ո՞չ դու ես Քրիստոսն, փրկեա՛ զանձն քո եւ զմեզ:
40․ Պատասխանի՛ ետ ընկերն սաստելո՛վ նմա՝ եւ ասէ. Չերկնչի՞ս դու յԱստուծոյ՝ զի ի նմի՛ն պատժի կաս:
41․ Եւ մեք՝ յիրաւի, զի արժանի՛ որոց գործեցաքն՝ առնումք զհատուցումն. եւ սա՝ ապիրա՛տ ինչ՝ ո՛չ գործեաց:
42․ Եւ ասէ ցՅիսուս. Յիշեա՛ զիս Տէր՝ յորժամ գայցես արքայութեամբ քով:
43․ Եւ ասէ ցնա Յիսուս. Ամէն ասեմ քեզ. այսաւր ընդ ի՛ս իցես ի դրախտին:
44․ Եւ էր իբրեւ վեցերո՛րդ ժամ. եւ խաւա՛ր եղեւ ի վերայ ամենայն երկրի մինչեւ ցիններո՛րդ ժամն. խաւարեցա՛ւ արեգակն:
45․ Եւ հերձա՛ւ վարագոյր տաճարին ընդ մէջ:
46․ Եւ կարդաց Յիսուս ի ձայն մեծ՝ եւ ասէ. Հայր՝ ի ձեռս քո աւանդեմ զհոգի իմ: Զայս իբրեւ ասաց՝ եհա՛ն զոգի:
47․ Եւ տեսեալ հարիւրապետին զոր ինչ եղեւն, փառաւո՛ր արար զԱստուած՝ եւ ասէ. Արդարեւ՝ ա՛յրս այս՝ արդա՛ր էր:
48․ Եւ ամենայն ժողովուրդքն որ եկեալ էին, եւ տեսանէին զտեսիլն զայն՝ եւ զգործ, բախէին զկուրծս՝ եւ դառնայի՛ն:
49․ Կային եւ ամենայն ծանաւթքն նորա ի հեռաստանէ. եւ կանայք որ եկեա՛լ էին զհետ նորա ի Գալիլեէ՝ եւ տեսանէին զայն:
50․ Եւ ահա այր մի, անուն Յովսէփ, որ էր նախարար՝ այր բարեգո՛րծ եւ արդար.
51․ սա՝ չէ՛ր միաբանեալ ընդ խորհուրդս եւ ընդ գործս նոցա. յԱրիմաթեա՛յ քաղաքէ հրէից, որ եւ ի՛նքն իսկ՝ ա՛կն ունէր արքայութեան Աստուծոյ:
52․ Սա՝ մատուցեալ առ Պեղատոս՝ խնդրեա՛ց զմարմինն Յիսուսի:
53․ Եւ իջուցեալ զնա՝ պատեա՛ց պաստառակալաւ, եւ ե՛դ ի կռածոյ գերեզմանի. ուր չէ՛ր զոք բնաւ եդեալ:
54․ Եւ աւրն էր ուրբա՛թ, եւ շաբա՛թ լուսանայր:
55․ Եւ երթային զհետ նորա կանայք՝ որ եկեալ էին ընդ նմա ի Գալիլեէ. տեսի՛ն զգերեզմանն, եւ որպէս եդաւ մարմինն նորա:
56․ Դարձան, եւ պատրաստեցին խունկս եւ եւղս. եւ ի շաբաթուն հանդարտեցին վասն պատուիրանին:
Հաղորդում կայքում սխալի վերաբերյալ
Տվյալ հատվածում առկա է սխալ: