1․ Յայնմ ժամանակի լուա՛ւ Հերովդէս չորրորդապետ զլուր Յիսուսի:
2․ Եւ ասէ ցծառայս իւր. Նա՞ է Յովհաննէս մկրտիչ, նա՞ յարեաւ ի մեռելոց, եւ վասն այնորիկ զաւրութիւնք լինին նովաւ:
3․ Քանզի Հերովդէս կալա՛ւ զՅովհաննէս՝ կապեա՛ց զնա՝ եւ եդ ի բանտի՝ վասն Հերովդիա՛յ կնոջ Փիլիպպոսի եղբաւր նորա:
4․ Զի ասէր ցնա Յովհաննէս. Չէ՛ արժան քեզ ունել զդա:
5․ Եւ կամէր զնա սպանանե՛լ, բայց երկնչէ՛ր ի ժողովրդենէ անտի. քանզի իբրեւ զմարգարէ՛ ունէին զնա:
6․ Եւ իբրեւ եղեն ծնունդք Հերովդի, կաքաւեա՛ց դուստրն Հերովդիա՛յ ի մէջ բազմականին. եւ հաճո՛յ թուեցաւ Հերովդի.
7․ ուստի եւ երդմամբ խոստացաւ տա՛լ նմա զինչ եւ խնդրեսցէ:
8․ Եւ նա յառաջագոյն խրատեա՛լ ի մաւրէ իւրմէ, տո՛ւր ինձ ասէ այսր՝ ի վերայ սկտեղ զգլուխն Յովհաննու մկրտչի:
9․ Եւ տրտմեցա՛ւ թագաւորն. բայց վասն երդմանցն, եւ բարձակցացն՝ հրամայեաց տա՛լ նմա:
10․ Եւ առաքեաց գլխատեա՛ց զՅովհաննէս ի բանտի:
11․ Եւ բերա՛ւ գլուխն նորա սկտեղբ՝ եւ տուա՛ւ աղջկանն, եւ տարաւ առ մայր իւր:
12․ Եւ մատուցեալ աշակերտքն նորա՝ բարձին զմարմինն եւ թաղեցին. եւ եկեալ պատմեցին Յիսուսի:
13․ Եւ իբրեւ լուաւ Յիսուս, գնա՛ց անտի նաւու յանապատ տեղի առանձինն: Իբրեւ լուան ժողովուրդքն՝ գնացին զհետ նորա հետի ի քաղաքաց անտի:
14․ Եւ իբրեւ ել, ետես ժողովուրդ բազում, գթացաւ ի նոսա, եւ բժշկեա՛ց զհիւանդս նոցա:
15․ Իբրեւ ընդ երեկս եղեւ, մատեան առ նա աշակերտքն՝ եւ ասեն. Տեղիս անապա՛տ է, եւ աւրս՝ տարաժամեա՛լ, արձակեա՛ զժողովուրդսդ՝ զի երթիցեն շո՛ւրջ ի շէնսն, գնեսցեն իւրեանց կերակո՛ւրս:
16․ Եւ ասէ Յիսուս. Ո՛չինչ պիտոյ է դոցա երթալ. դո՛ւք տո՛ւք դոցա ուտել:
17․ Եւ նոքա ասեն ցնա. Ո՛չինչ ունիմք աստ, բայց հինգ նկանակ եւ երկուս ձկունս:
18․ Եւ ասէ ցնոսա. Բերէ՛ք այսր զայն:
19․ Եւ հրամայեաց բազմեցուցանե՛լ զժողովուրդն ի վերայ խոտոյ: Եւ առեալ զհինգ նկանակն եւ զերկուս ձկունս՝ հայեցա՛ւ յերկինս, աւրհնեա՛ց. եւ եբե՛կ՝ եւ ետ ցաշակերտսն զնկանակսն, եւ աշակերտքն ժողովրդոցն:
20․ Կերան ամենեքեան՝ եւ յագեցա՛ն, եւ բարձին զնշխարս կոտորոցն երկոտասան սակառի՛ լի:
21․ Եւ որք կերանն՝ էին արք իբրեւ հինգ հազար. թո՛ղ զկանայս եւ զմանկտի:
22․ Եւ ստիպեաց վաղվաղակի զաշակերտսն մտանե՛լ ի նաւ, եւ յառաջե՛լ յայնկոյս, մինչ ինքն զժողովուրդսն արձակիցէ:
23․ Եւ իբրեւ արձակեաց զժողովուրդսն՝ ե՛լ ի լեառն առանձինն կալ յաղաւթս: Եւ իբրեւ ընդ երեկս եղեւ, ա՛նդ էր միայն:
24․ Եւ նաւն մեկնեալ էր ի ցամաքէն բազում ասպարիսաւք՝ ծփեալ յալեացն. քանզի ընդդէ՛մ էր հողմնն:
25․ Եւ ի չորրորդում պահու գիշերոյն եկն առ նոսա Յիսուս գնալով ի վերայ ծովուն:
26․ Իբրեւ տեսին զնա աշակերտքն զի գնայր ի վերայ ծովուն՝ խռովեցա՛ն, եւ ասեն թէ առաչա՛ւք ինչ իցէ. եւ առ ահին՝ աղաղակեցին:
27․ Եւ վաղվաղակի խաւսեցա՛ւ ընդ նոսա Յիսուս՝ եւ ասէ. Քաջալերեցարո՛ւք, ե՛ս եմ մի երկնչիք:
28․ Պատասխանի ետ նմա Պե՛տրոս՝ եւ ասէ. Տէր՝ եթէ դո՛ւ ես, հրամայեա՛ ինձ գա՛լ առ քեզ ի վերայ ջրոյս:
29․ Եւ նա ասէ. Ե՛կ: Եւ իջեալ ի նաւէն Պետրոս՝ գնա՛ց ի վերայ ջուրցն, եւ ե՛կն առ Յիսուս:
30․ Եւ տեսեալ զհողմն սաստիկ՝ երկեա՛ւ. եւ իբրեւ սկսաւ ընկղմել՝ աղաղակեա՛ց՝ եւ ասէ. Տէր՝ փրկեա՛ զիս:
31․ Եւ վաղվաղակի Յիսուս ձգեաց զձեռն իւր կալա՛ւ զնա եւ ասէ. Թերահաւատ՝ ընդէ՞ր երկմտեցեր:
32․ Եւ իբրեւ ելին ի նաւն՝ հանդարտեա՛ց հողմն:
33․ Եւ որ ի նաւին էին՝ մատեա՛ն երկի՛րպագին նմա՝ եւ ասեն. Արդարեւ որդի Աստուծոյ ես դու:
34․ Եւ անցեալ եկին ի ցամաք ի Գեննեսարեթ:
35․ Եւ իբրեւ ծանեան զնա արք տեղւոյն այնորիկ, առաքեցին ընդ ամենայն գաւառն՝ եւ ածի՛ն առ նա զամենայն հիւանդս:
36․ Եւ աղաչէին զնա, զի գոնէ՝ միայն ի քղա՛նցս հանդերձի նորա մերձեսցին. եւ որ միանգամ մերձեցանն՝ փրկեցա՛ն:
Հաղորդում կայքում սխալի վերաբերյալ
Տվյալ հատվածում առկա է սխալ: