Գլուխ 8

   
1․ Եւ եղեւ յամին քսաներորդի յորում շինեաց Սողոմովն զտուն Տեառն եւ զտուն արքայութեան իւրոյ,

2․ եւ զքաղաքսն զոր ետ Խիրամ Սողոմովնի շինեաց զնոսա եւ բնակեցոյց ի նոսա զորդիսն Իսրայէղի:

3․ Եւ եկն Սողոմովն յԵմաթ Սուրա եւ զաւրացաւ ի վերայ նորայ,

4․ եւ շինեաց նա զԹոմրինն յանապատի եւ զամենայն քաղաքսն հզաւրս հարկի շինեաց նա Նմաթ:

5․ եւ շինեաց զԲեթորոն վերին եւ զԲեթորոն ներքին քաղաքս հզաւրս պարսպաւորս եւ ամրացոյց զնոսա դրամբք, եւ դռնափակաւք:

6․ եւ զԲաղաաթն եւ զամենայն քաղաքս հզաւրս որ էին հարկի առ արքայի Սողոմոնի եւ զամենայն քաղաքս կառացն եւ զերիւարացն եւ զքաղաքսն զառն եւ զձիոյ, որ ինչ մի անգամ ցանգացաւ Սողոմովն ի սրտի իւրում շինել յԵրուսաղէմ եւ ի Լիբանան եւ յամենայն տեղիս երկրի թագաւորութեանն իւրոյ եւ յամենայն իշխանութեան իւրում, եւ աջողեցաւ նմա:

7․ եւ զամենայն մնացորդս ժողովրդոցն զՔետացին եւ զԱմուրհացին եւ զՓերեզացւոց զԽեւացւոց եւ զՅեբուսացւոց որ ոչն էին յԻսրայէղացւոց անտի, որ թողին զնոսա,

8․ եւ ոչ սատակեցին զնոսա որդիքն Իսրայէղի ած եհան զնոսա Սողոմովն, եւ խառնեաց ի հարկ մինչչեւ ցայսաւր ժամանակաց:

9․ Բայց յորդիոցն Իսրայէղացւոց անդի ոչ զոք ետ ի հարկ ծառայութեան յամենայն ի գործ տերութեան իւրոյ, բայց միայն կային նոքա ի գունդս առն եւ ձիոյ ի հարկ զաւրականի կառաց եւ երիւարաց եւ այլոց վառելոց, իշխանս զաւրագլուխս, ի կառս յերիւարս եւ ի գունդս հեծելոց:

10․ եւ այս իշխանք Սողոմովնի արքայի խրատել ուսուցանել, երկերիւր յիսուն այր ի վերա տան Իսրայէղի,

11․ զդուստրն փարաւովնի, ած էհան ի քաղաքէ Դաւթի ի տունն, զոր շինեաց նմա զի ոչ արժանի համարեցաւ բնակել կնոջ իւրում ի տան Դաւթի արքային Իսրայէղացւոց, զի սուրբ էր նա ուր եկն տապանակն կտակարանաց տեառն Աստուծոյ Իսրայէղի:

12․ Յայնմ ժամանակի բերէր Սողոմովն զկահ եւ զկարասի զգանձս ողջակիզացն առ սեղանն զոր շինեաց առաջի տաճարին:

13․ եւ ըստ բանիցն Մովսէսի, ըստ շաբաթուցն, ըստ ամս ըստ տաւնից տարեկանացն բաղարջակերացն, եւ տաւնից եւթներորդացն:

14․ Եւ հաստատեաց կացոյց զամենայն իրաւունս եւ դատաստանս ըստ իրաւունս Դաւթի հաւր իւրոյ: Եւ դասս դասս քահանայից ըստ պաշտաման նոցա եւ զՂեւտացիսն դասս ի պահս իւրեանց, առաջի քահանայիցն ըստ բանի աւուրն յորում եւ զդարապանսն ի դասս խառնէր դռնապանացն զի այսպէս էր պատուիրան Դաւթի առն Աստուծոյ:

15․ ոչ անցին ըստ պատուիրան Դաւթի արքայի վասն քահանայից եւ Ղեւտացւոցն եւ յամենայն բանս հրամանի գանձիցն գործոյ:

16․ պատրաստեաց Սողոմովն յաւրէ ժամանակէ յորմէ հետէ եդաւ հիմն տանն Տեառն:

17․ Յայնմ ժամանակի գնաց ի Գեսղովմ Գաբեր յերկիրն Այիդ առ ծովեզերի յերկիր յԵդոմայ

18․ եւ առաքեաց Խիրամ Սողոմովնի ի ձեռն ծառայից իւրոց նաւս եւ նաւավարս տեղեկացեալս ծովու: Եւ գնացին ծառայքն Սողոմովնի ընդ ծառայսն Խիրամայ, գնացին նոքա յՈվփիր, եւ առին անտի չորեք արիւր քանքար ոսկի, եւ բերին առ Սողոմովն: