1․ Եւ տիկինն հարաւու լուաւ զիմաստութիւնն Սողոմովնի եւ եկն փորձել զնա առակն աւրինակաց յԵրուսաղէմ եւ եկն առ Սողոմովն եւ խաւսեցաւ զամենայն զոր ինչ կայր ի սրտի նորա:
2․ եւ պատմեաց Սողովմովն զամենայն բանս նորա անդրէն եւ ոչ վրիպեցաւ բան զոր ոչ մեկնեաց Սողոմովն անդրէն:
3․ Եւ ետես տիկինն հարաւու զամենայն իմաստութիւն Սողոմովնի եւ զտունն զոր շինեաց.
4․ եւ զծախս սեղանոցն, եւ զաթոռս մանկանց իւրոց եւ զկագս պաշաման նորա, զհանդերձ պատմուճանի նորա, եւ զբերանապարիշտսն եւ զհանդերձ իւրեանց եւ զողջակէզսն զոր մատուցանէր, զարմացեալ էր եւ ոչ կային ոգիքն իւր առ իւր:
5․ Ապա խաւսել կալաւ թագաւորին եւ ասէ. Ճշմարիտ էր բանն զոր լսէի ես յերկրի իմում վասն քո եւ բանից քոց,
6․ մինչչեւ եկի եւ տեսի աչաւք իմովք եւ ահաւասիկ տեսանեմ, զի կիսոյ կէս ոչ էր զոր պատմէինն վասն իմաստութեան քո, զի աւելի է զոր տեսանեմս քան զայն զոր լուայն:
7․ Երանի է կանանց քոց եւ երանի է մանգանց քոց, եւ երանի արանցս որ կան առաջի լսել զամենայն բանս իմաստութեան քո,
8․ եւ եղիցի տէր Աստուած քո աւրհնեալ որ հաճեցաւ ընդ քեզ տալ քեզ զաթոռ թագաւորութեան իւրոյ ի վերայ ժողովրդեան իւրոյ առ ի սիրել տեառն Աստուծոյ քո զԻսրայէղ, հաստատել զնա յաւիտեանս եւ ետ զքեզ ի վերայ նոցա թագաւոր առնել զիրաւունս եւ զարդարութիւն:
9․ Եւ ետ տիկինն արքայի հարիւր քսան քանքար ոսկւոյ, եւ խունկս բազում յոյժ եւ ականս պատուականս, ոչ գոյր իբրեւ զխունկսն զայնս զոր ետ տիկինն հարաւու Սաղոմովնի արքայի:
10․ Եւ ծառայքն Խիրամայ եւ ծառայքն Սողոմոնի բերէին ոսկի ի Սովփերայ Սողոմոնի:
11․ Եւ փայտս ածէին անկոփս եւ ականս պատուականս յոյժ, եւ արար ելանելիս տանն Տեառն եւ տանն արքունի, եւ փողս երգչաց եւ ոչ գտաւ երբեք յառաջ յերկրին Յուդայ գործք այնպիսիք:
12․ Եւ արքայ Սողոմոն ետ տիկնոջն հարաւու զամենայն որ զինչ խնդրեաց նա, բայց յայնմանէ որ նորա իսկ բերեալ էր նմա եւ գնաց նա անդրէն յաշխարհ իւր,
13․ եւ էր կշիռ ոսկոյն որ բերին Սողովմոնի ամէ յամ վեց հարիւր վաթսունվեց քանքար ոսկի
14․ թող զծախս արանց վաճառականաց եւ զպատարագսն զոր բերին: Եւ որ ամենայն թագաւորքն Արաբացւոց եւ ամենայն զաւրավարք երկրին բերէին ոսկի եւ արծաթ Սողոմոնի արքայի:
15․ Եւ արար արքայ Սողոմովն վահան երեք հարիւր ոսկի կուռ, զի ի վեց հարիւր կշռոյ ոսկոյ սրբոյ ի մի վահան:
16․ եւ նիզակս երեք հարիւր. յերեք հարիւր երեք արիւր կշռոյ ոսկւոյ եւ ետ զնոսա արքայի տուն մայրեացն Լիբանանու:
17․ Եւ արար արքայ զաթոռն փղոսկրեայ եւ պատեաց զնա ոսկւով քաջաւ.
18․ եւ վեց աստիճան աթոռոյն ոսկւով պատեալ եւ անոտնիա մի ոսկի աթոռոյն եւ բազուկք աթոռոյն աստի անտի ոսկիք.
19․ եւ երկու առիւծք աստի անտի բազկացն, եւ երկուտասան առիւծ վեց աստիճանացն աստի անդի:
20․ Եւ արար զամենայն սպաս կահ եւ կարասի տան թագաւորին ոսկի, եւ ոչ էր արծաթ համարեալ ամենեւին յամս Սողոմովնի արքայի:
21․ զի նաւ արքունի երթայր ի Թարշիշ ընդ ծառայն Խիրամայ եւ յերեամ միանգամ դառնայր անդրէն լի ոսկւով եւ արծաթով, եւ ժանեաւ փղի եւ կապկաւք եւ սիրամարգաւք:
22․ Եւ մեծացաւ Սողոմովն քան զամենայն թագաւորս երկրի, մեծութեամբ եւ իմաստութեամբ,
23․ եւ ամենայն թագաւորք երկրի խնդրէին տեսանել զերեսս Սողոմովնի, լսել զձայն իմաստութեան նորա զոր ետ նմա Աստուած ի սիրտ նորա,
24․ եւ բերէին նմա պատարագս ոսկի, եւ արծաթ եւ զէն եւ հանդերձ պատուական ստաշխն եւ զխունկս եւ զերիւարս եւ զջորիս:
25․ Եւ էին Սողոմովնի քառասուն հազար մատակ ձի կուտի, եւ երիւարք կառաց երկուտասն հազար եւ կացոյց զնոսա ի քաղաքսն կառապանաց եւ ինքն յԵրուսաղէմ:
26․ էր գլուխ թագաւորացն ի գետոյն Եւփրատայ մինչչեւ յերկիրն այլազգեաց, եւ մինչչեւ ի սահմանս Եգիպտացւոց:
27․ Եւ ետ արքայ Սողոմովն զոսկի եւ զարծաթ յԵրուսաղէմ իբրեւ զքարինս առ ապարի, իբրեւ զփայտ մայր եւ իբրեւ զթուփ դաշտի բազմութեամբ,
28․ եւ էր ելքն երիւարացն Սողոմովնի յերկրէն Եգիպտացւոց,
29․ եւ յայլմէ յամենայն երկրէ եւ այլ բանք Սողոմովնի առաջինք եւ վերջինք որ գրեցան ի պատգամս Նաթանայ մարգարէի եւ ի բանս Աքիայ Սիղոմացւոց, եւ ի տեսիլս Յովելա տեսանողի, ըստ Յերոբովամա որդւոյ Նաբատայ:
30․ եւ թագաւորեաց Սողոմովն արքայ ի վերայ Իսրայէղի ամս քառասուն:
31․ եւ ննջեաց Սողոմովն առ հարս իւր, եւ թաղեցին զնա ի քաղաքին Դաւթի հաւր իւրոյ: Եւ թագաւորեաց Հռոբովամ որդի նորա փոխանակ նորա:
Հաղորդում կայքում սխալի վերաբերյալ
Տվյալ հատվածում առկա է սխալ: