1․ Եւ ննջեաց Աբիայ առ հարս իւր, եւ թաղեցին զնա ի քաղաքին Դաւթի: Եւ թագաւորեաց Ասայ որդի նորա փոխանակ նորա: Յաւուրս Ասայի հանտարտեցաւ երկիր Յուդայ ամս տասն:
2․ եւ արար Ասայ բարի եւ ուղղութիւն առաջի տեառն Աստուծոյ իւրոյ.
3․ եւ ի բաց կործանեաց զբագինս մեհենացն աւտարոտւոց զբարձունսն սատակեաց եւ զարձանսն խորտակեաց եւ զանտառսն կոտորեաց,
4․ եւ պատուէր ետ ընդ ամենայն երկիրն Յուդայ, զի խնդրեսցեն զտէր Աստուած հարցն իւրեանց, հաստատուն կայցեն յաւրէնսն եւ պահեսցեն զպատուիրանսն:
5․ Եւ ի բաց կործանեաց յամենայն քաղաքացն Յուդայ զբագինսն եւ զկուռս նոցա:
6․ Եւ հանդարտեաց խաղաղացաւ թագաւորութիւն նորա առաջի նորա,
7․ եւ շինեաց նա քաղաքս պարսպաւորս յերկրին Յուդայ, եւ ոչ գոյր ամենեւին գործ պատերազմի յամսն յայնս, զի դադարեցոյց տէր Աստուած զամենայն թշնամիս նոցա:
8․ Խաւսել կալաւ Ասայ ընդ Յուդայ եւ ասէ. Եկայք շինեսցուք մեզ զքաղաքս զայս եւ արասցուք զնոքաւք պարիսպս ամրացեալս, եւ աշտարակս բարձրացեալս, դրունս հաստատեալս եւ դռնափակս զաւրացեալս զի որպէս խնդրեցաք մեք զԱստուած հարցն մերոց ել ի խնդիր նա մեր, եւ ետ մեզ հանգիստ ի թշնամեաց մերոց շուրջ զմեւք եւ շինեցին զայն ամենայն եւ յաջողեցաւ նոցա, եւ եղեն արքայ ի զաւրք բազում սպառազէն վառեալք, նիզակաւորք եւ վահանաւորք որ յերկրէն Յուդայ երեք հարիւր հազար եւ որ ի Բենիամէն ասպարաւորք եւ աղեղնաւորք երկու հարիւր վաթսուն հազար ամենեքին սոքա արք ընդիրք զաւրաւորք որդիք զաւրութեան:
9․ Եւ եկն ել յանկարծակի ի վերայ նոցա Զարայ արքայ Հնդկաց մեծաց զաւրութեամբ հազար հազարաւք, եւ երեսուն հազար կառաւք եւ եկն եհաս մինչ ի Մարեսայ,
10․ եւ ել Ասայ ընդ առաջ նորա: Եւ կազմեցաւ ճակատեցաւ ի պատերազմի ձորն ի կողմանցն հիւսւսոյ ի Մարեսայ:
11․ Ապա բողոք եբարձ Ասայ առ տէր Աստուած իւր, եւ ասէ. Տէր Աստուած ոչ ինչ էր խտիր առաջի քո բազմաց եւ սակաւուց որոց ոչ գոյ զաւրութիւն նոցա, արդ` արի Տէր դու աւգնեա մեզ զի ի քեզ յուսացաք: Եւ յանուն քո հասաք ի տեղիս յայս: ի վերայ բազմութեանս այսորիկ, տէր Աստուած մեր դու ես Աստուած, մի յաղթահարեսցէ զքեզ մարդիկ:
12․ Եւ եհաս սատակեաց տէր Աստուած զՀնդիկսն առաջի Յուդայ:
13․ եւ հալածեաց զնոսա Ասա զաւրաւքն իւրովք մինչ ի Գերաբայ եւ անկան կործանեցան Հնդիկքն իբրեւ չեղեալք, զի բեկան կործանեցան առաջի Տեառն եւ առաջի զաւրութեան նորա, եւ կողոպտեցին առին զաւարն յոյժ,
14․ եւ հարին կործանեցին զքաղաքս նոցա շուրջ զԳերաւ զի եղեւ ահ սաստիկ Տեառն ի վերայ նոցա, եւ յափշտակեցին զքաղաքս նոցա, զի բազում աւար կայր ի նոսա, որ եկն ի ձեռն նոցա,
15․ եւ բանակս առին խաշնտեսաց, եւ անդ հարին կոտորեցին զամազոնսն, եւ առին զհաւտսն բազումս եւ զուղտ երամակսն եւ դարձան անդրէն յԵրուսաղէմ:
Հաղորդում կայքում սխալի վերաբերյալ
Տվյալ հատվածում առկա է սխալ: