1. Եւ դարձաւ Յովսափատ արքայ խաղաղութեամբ ի տուն իւր յԵրուսաղէմ:
2. եւ ել ընդ առաջ նորա Իյու Անանիանց մարգարէ եւ ասէ ցնա. Արքայ Յուսափատ եթէ մեղաւորի յաւգնականութիւն ելեր դու, եւ կամ ընդ ատեցելոյ ի Տեառնէ բարեկամացար դու վասն այսորիկ եղեւ բարկութիւն Տեառն ի վերայ քո,
3. բայց սակայն քանզի բանք բարիք գտանի քեզ, զի սատակեցէր դու զամենայն անտառս զերկրիդ Յուդայ եւ ուղղեցէր դու զսիրտ քո խնդրել զտէր Աստուած քո:
4. Արդ` բնակեսցես դու յԵրուսաղէմ դարձեալ Յովսափատ շրջել զաշխարհաւ զԲերսաբէէ մինչչեւ ի լեառն յԱփրիմ:
5. Եւ կացոյց իշխանս ընդ ամենայն քաղաքսն Յուդայ ընդ ամրացեալս:
6. եւ ասէ նա ցիշխանսն. Տեսեք զինչ գործ գործէք զգուշութեամբ գործիջիք զի ոչ եթէ զմարդկութեան այլ զտեառն Աստուծոյ զի ընդ ձեզ են բանք դատաստանի,
7. եւ արդ` եղիցի ահ եւ երկիւղ Տեառն ի վերայ ձեր, եւ պահեսջիք զգոյշ լինիջիք դուք, զի ոչ գոյ ի տան մերում Աստուծոյ անիրաւութիւն եւ ոչ ակնառութիւն առաջի նորա եւ ոչ առնուլ կաշառոց:
8. Դարձաւ Յուսափատ կացոյց յԵրուսաղէմ ի Ղեւտացւոց անտի, եւ ի քահանայից անտի ի դատաւորս Տեառն, առնել իրաւունս Տեառն ի դատել զդատաստանս ի վերայ բնակչացն Երուսաղէմի:
9. Եւ ետ պատուէր նոցա եւ ասէ. Այսպէս արասջիք դուք երկեղիւ Տեառն սրտիւ կատարեալ ճշմարտութեամբ
10. ամենայն մարդ ինչ դատաստան եղբաւր իւրոյ որ հասցէ ի քաղաքաց անտի դատեսցի ի մէջ արեան եւ արեան, եւ ի մէջ հրամանին եւ պատուիրանացն արդարութեամբք եւ իրաւամբք վճարեսջիք նոցա, զի մի մեղիցեն նոքա ի Տէր, եւ մի լիցի բարկութիւն ի վերայ ձեր եւ ի վերայ եղբարց ձերոց զայս այսպէս արասջիք եւ մի մեղանչիցէք,
11. եւ ահաւասիկ Ամարիայ քահանայապետ առաջնորդ ձեզ յամենայն պատգամս Տեառն եւ Զաբատիայ որդի Մերայէլի առաջնորդ տանն Յուդայ յամենայն պատգամս արքունի, եւ դպիրք եւ Ղեւտացիք առաջի ձեր, զաւրացարուք եւ գործեցէք եւ եղիցի Տէր ընդ բարոյն:
Հաղորդում կայքում սխալի վերաբերյալ
Տվյալ հատվածում առկա է սխալ: