1. Եւ յետ այսորիկ եկին հասին որդիք Մովաբայ եւ որդիքն Ամովնայ, եւ ընդ նոսա որդիքն Ամանիիմ յորդւոցն Սէիր ի վերա Յովսափատու ի գործ պատերազմի:
2. Ապա եկին պատմեցին Յուսափատու եւ ասեն. Եկն եհասաւասիկ բազմութիւն բազում ի վերայ քոյ յայնկոյս ծովու յԱսորոց, եւ ահաւասիկ եկն յԱսասանթամար, այսինքն է Ենգաբիր,
3. եւ երկեաւ Յուսափատ յոյժ, եւ արար դէմ ի Տէր խնդրել ի նմանէ, եւ հրամայեաց քարոզել պահս ընդ ամենայն Յուդայ:
4. Եւ եկին ժողովեցան ամենեքեան յամենայն քաղաքացն խնդրել ի Տեառնէ:
5. ապա եկն եկաց Յուսափատ ի մէջ ժողովրդոցն յԵրուսաղէմ ի տան Տեառն ի մէջ սրահին նորոյ.
6. եւ ասէ. Տէր Աստուած հարցն մերոց, դու այն ես որ յերկինս եւ ի վերայ երկրի ստորէ եւ իշխես դու ի վերայ ամենայն թագաւորութեանց հեթանոսաց եւ ի ձեռն քո է ամենայն բարութիւն եւ հաստատութիւն եւ չիք այն ոք որ համեմատէ քեզ:
7. Դու այն ես տէր Աստուած որ սատակեցեր զամենայն բնակիչս երկրիս այսորիկ յերեսաց ժողովրդեան քո Իսրայէղի, եւ ետուր դու զայս Աբրահամեան զաւակին բարեկամի քո յաւիտեանս ժամանակաց,
8. եւ բնակեցին ի նմա նուիրեալք անուան քո, որ ասէին.
9. թէ Եկեսցէ ի վերայ մեր չարիք սով կամ սուր կամ մարախ կամ մարդամահ, եկեսցուք կացցուք ի տանս յայսմիկ առաջի քո զի անուն քո կոչեցեալ է ի վերայ սորայ, եւ գոչեսցուք մեք առ քեզ ի նեղութեան մերում լուիցես մեզ,
10. արդ` աւասիկ որդիքն Ամովնայ եւ Մովաբ, եւ լեառն Սէիր, որ ոչ ետուր դու մտանել Իսրայէղի անցանել ընդ նա ի ժամանակին զի ելեալ գային նոքա յերկրէն Եգիպտացւոց այլ խուսեցին ի նոցանէն եւ ոչ սատակեցին զնոսա,
11. արդ` աւասիկ դիմեալ գան, հանել զմեզ յերկրէս ժառանգութեանս մերոյ զոր ետուր մեզ:
12. Տէր Աստուած մեր այց արա մեզ, զի ոչ ուստեք է մեզ կալ ունել զդէմ բազմութեանն այնորիկ որ եկեալ են ի վերայ մեր, զի ոչ գիտեմք զինչ արասցուք մեք, զի ի քեզ են աչք մեր,
13. եւ ամենայն Յուդայ կային յանդիման Տեառն. ամբոխ բազում արք եւ կանայք եւ որդիք իւրեանց:
14. եւ Յէզիէլ Զաքարիանց որդւոյ Բանեայ որդւոյ Յէիէլ որդւոյ Մաթենեայ Ղեւտացի յորդւոցն Ասափ եւ եղեւ ի վերայ նորա ոգի Տեառն ի մէջ ժողովրդեանն:
15. եւ ասէ. Լուարուք ամենայն Յուդայ եւ ամենայն բնակիչք Երուսաղէմի եւ արքայդ Յովսափատ: Այսպէս ասէ Տէր ձեր. Մի երկընչիջիք դուք յերեսաց ամբոխիդ այդորիկ, զի ոչ եթէ ընդ ձեզ է գործ պատերազմիդ այդորիկ, այլ ընտ տեառն Աստուծոյ,
16. վաղիւ իջիք դուք ի վերայ նոցա, եւ ապա ելանիցեն նոքա զառ ի վեր ակն սարակին Աթշիշ: Եւ գտջիք զնոսա յայն կոյս հեղեղատին, ընդ դէմ անապատին Յէրիէլ,
17. զի ոչ եթէ ընդ ձեզ տացեն պատերազմ, բայց դուք կացջիք միայն եւ տեսջիք զփրկութիւն Տեառն որ ընդ ձեզ եւ ընդ Յուդայ յԵրուսաղէմ: Մի երկնչիջիք եւ մի զարհուրիջիք ելանել վաղիւ ընդ առաջ նորա, եւ Տէր ընդ ձեզ է:
18. եւ խոնարհէր Յուսափատ ի խոնարհ երկիր պագանէր ի վերայ երեսաց իւրոց, եւ ամենայն Յուդայ եւ բնակիչք Երուսաղէմի, անկեալ խոնարհ երկիր պագանէին տեառն Աստուծոյ:
19. Ապա յոտն կացին Ղեւտացիքն յորդւոցն Կաաթու, եւ յորդւոցն Կորեա: Աւրհնել զտէր Աստուած ի ձայն մեծ բարբառով,
20. եւ կանխեցին ընդ առաւաւտն եւ ելին յանապատն Թեկուլ, եւ իբրեւ ելին նոքա, եկաց ի մէջ Յովսափատ ի ձայն բարձր աղաղակեաց եւ ասէ. Լուարուք ինձ Յուդայ եւ բնակիչք Երուսաղէմի հաուատացէք դուք ի տէր Աստուած մեր, եւ հաւատարիմ լինիջիք դուք նմա, հաւատասջիք դուք ի մարգարէս եւ յաջողեսցի:
21. Եւ իբրեւ խորհեցաւ նա ընդ ժողովրդեանն կացոյց արս որ փողս հարկանէին խոստովանութեամբ առաջի զաւրացն եւ ասէին. Խոստովան եղերուք Տեառն զի յաւիտեան է ողորմ նորա,
22. եւ իբրեւ սկսան նոքա զաւրհնութիւնսն զոր ետ Տէր, եւ դարանամուտք ոմն էին ի պատերազմի անդ որդւոցն Ամովնայ, Մովաբու լեառն Սէիր որ ելեալ եկեալ էին ի վերայ Յուդայ. ի փախուստ դարձան,
23. եւ յարեան որդիքն Ամովնայ, եւ Մովաբ ի վերա բնակչացն Սէիր, սատակել զնոսա եւ վանել: Եւ իբրեւ վախճանեցին զբնակիչն Սէիր յարեան ի վերայ միմեանց եւ բուռն հարկանէր այր զընկերէ իւրմէ սատակել զնա
24. եւ եկն ել Յուդայ ի դիտանոց անդր որ է յանապատի անդ, եւ հայեցաւ ետես զբազմութիւն գնդաց, եւ ետես զի ամենեքին մեռեալք եւ սպառեալք դնէին յերկրի եւ ոչ գոյր ի նոսա կենդանի:
25. Եւ եկն Յուսափատ եւ զաւրք իւր կողոպտել զդիակունս նոցա եւ գտին անդ խաշինս բազումս կահս եւ կարասի, եւ գանձ ցանկալի յոյժ, եւ մերկացին զնոսա, եւ եղեն աւուրք երեք ընդ մերկանալ զդիակունսն զի բազում էր:
26. եւ յաւուրն չորրորդի ժողովեցան ի հովիտսն աւրհնութեան զի անդ աւրհնեցին զՏէր վասն այնորիկ կոչեցաւ անուն տեղւոյն այնորիկ հովիտ Աւրհնութեան մինչչեւ ցայսաւր ժամանակի,
27. եւ դարձան ամենայն այր Յուդայ յԵրուսաղէմ, եւ Յովսափատ առաջնորդնորդ նոցա դարձաւ յԵրուսաղէմ ուրախութեամբ բազմաւ, զի ուրախ արար զնոսա Տէր ի թշնամեաց նոցա,
28. եւ մտանէին զաւրքն յԵրուսաղէմ ի փող եւ ի քնար, եւ ի սրինգ եւ ի թմբուկ ի տուն Տեառն,
29. եւ եղեն զարմանալիք Տեառն ի վերայ ամենայն թագաւորութեանց երկրի ի լսել նոցա եթէ Տէր տա պատերազմ ընդ ամենայն թշնամիս որդւոցն Իսրայէղի:
30. Եւ դադարեցաւ թագաւորութիւնն Յովսափատու: Եւ արար տէր Աստուած խաղաղութիւն շուրջ զնովաւ,
31. եւ թագաւորեաց Յովսափատ ի վերայ Յուդայ, զի էր նա երեսուն ամի, եւ եղեն ամք թագաւորութեան նորա յԵրուսաղէմ քսան եւ հինգ ամ, եւ անուն մաւր նորա Ոզաբայ դուստր Սեղեայ,
32. եւ գնաց նայ ընդ ամենայն ճանապարհաց Ասայի հաւր իւրոյ եւ ոչ թիւրեցաւ ի նոցանէ, եթէ գործեաց այլ լաւագոյն ինչ գործ առաջի Տեառն,
33. եւ սակայն զբարձունսն ոչ ջնջեաց ի տեղւոջէ, զի տակաւին ժողովուրդն ոչ ուղղէին առաջի տեառն Աստուծոյ հարցն իւրեանց,
34. եւ այլ բանք Յովսափատա առաջինք եւ վերջինք ահաւանիկ գրեալ են ի ճառս Յովհանայ Անանիանց որ գրեաց ի մատեանս թագաւորացն Իսրայէղացւոց:
35. եւ յետ այսորիկ հաղորդեցաւ Յովսափատ արքայ Յուդայ ընդ Ոխոզեա արքայի Իսրայէղացւոց եւ նա ինքն անաւրինեցաւ գործել չարիս առաջի Տեառն,
36. եւ գնաց նա առ նա եւ հաղորդեցաւ նմա, առնել նաւս զի երթիցեն ի Թարշիշ, եւ արար նա նաւ մի Գեսովնգաբեր:
37. Մարգարէացաւ Եզիեզեր Դովդեանց ի Մարեսայ ի վերայ Յովսափատու եւ ասէ. Փոխանակ զի բարեկամացար դու ընդ Ոխոզիայ, եւ հաւանեցար ընդ նմա խզեաց Տէր զգործս քո, եւ փշրեցան նաւքն եւ ոչ կարացին գնալ ի Թարշիշ:
Հաղորդում կայքում սխալի վերաբերյալ
Տվյալ հատվածում առկա է սխալ: