1․ Այր ամաց տասն, եւ յիսունեւթն ամ թագաւորեաց:
2․ Եւ արար նա չարիս առաջի Տեառն, ըստ ամենայն պղծութեանց հեթանոսաց, եւ ջնջեաց Տէր յերեսաց որդւոցն Իսրայէղի,
3․ դարձաւ Մանասէ եւ շինեաց բարձունս զոր կործանեաց Եզեկիայ հայր նորա, եւ կանգնեաց զարձանս Բահաղիմ, եւ երկիր պագանէր ամենայն զաւրութեանցն երկնից, եւ ծառայէր նոցա,
4․ եւ շինեաց Մանասէ բագինս ի տան Տեառն,
5․ եւ սեղանս սեղանս կանգնեաց ամենայն զաւրութեանցն երկնից ի սրահս տանն Տեառն,
6․ եւ ինքնին անցուցանէր զորդիսն իւր զբոցով ի Նգեբենովմ եւ առնէր հաւհմայս, եւ հրամայէր եւ դիւթէր, եւ ածէր վոհուկս բազմացուցանէր թովիչս եւ յաճախեաց Մանասէ առնել զչարիս առաջի Տեառն, զի բարկացուսցէ զնա,
7․ եւ դնէր նա զկուռսն ձուլածոյս եւ զկռածոյսն, եւ զքանդակեալս ի տան Տեառն, յորում ասաց Տէրն ցԴաւիթ եւ ցՍողոմովն որդի նորա, ասէ ի տանս յայսմիկ եւ յԵրուսաղէմ ընտրեցից ամենայն ազգացն Իսրայէղի դնել զանուն իմ ի վերայ սորայ մինչչեւ յաւիտեանս ժամանակաց,
8․ եւ ոչ եւս յաճախեցից շարժել զոտն Իսրայէղի յերկրէ զոր խոստացա տալ հարց նոցա, բայց միայն թէ զգուշասցին նոքա պահել զամենայն պատուիրանս իմ, զոր պատուիրեցի ես նոցա, ըստ ամենայն հրամանաց աւրինացն եւ իրաւանցն զոր ետու ի ձեռն Մովսէսի:
9․ եւ մոլորեցոյց Մանասէ զՅուդայ եւ զբնակիչսն Երուսաղէմի առնել զչարիս չարիս քան զամենայն հեթանոսս զոր ջնջեաց Տէր յերեսաց որդւոցն Իսրայէղի:
10․ Եւ խաւսեցաւ Տէր ընդ Մանասէի եւ ընդ ամենայն ժողովրդեանն իւրում եւ ոչ լուան նմա,
11․ ապա ած Տէր ի վերայ նոցա զիշխանս զաւրացն թագաւորացն Ասորեստանեաց, եւ եկին հասին ի վերայ Մանասէի կապեցին զնա ի կապանս ոտից եւ ձեռաց եւ առին գնացին զնա ի Բաբելոն,
12․ եւ իբրեւ տառապեցաւ տագնապեցաւ Մանասէ խոնարհեցաւ յոյժ առաջի երեսաց տեառն Աստուծոյ հարցն իւրեանց:
13․ եւ եկաց յաղաւթս առ նա: Ապա լուաւ նմա եւ լուաւ ձայնի բարբառոյ նորա, եւ դարձոյց զնա անդրէն յԵրուսաղէմ եւ ի նոյն թագ արքայութեան կացոյց,
14․ եւ յետ այսորիկ շինեաց Մանասէ պարիսպս արտաքոյ քաղաքին Դաւթի յարեւմտից եւ հարաւակողմ կոյս ի վերայ հեղեղատին յելս դրանն Ձիոյ շուրջ զՈփաղաւն եւ բարձրացոյց յոյժ, եւ կացոյց իշխանս զաւրութեանց ընդ ամենայն քաղաքս պարսպաւորս Յուդա:
15․ Եւ քակեաց ջնջեաց ի միջոյ զամենայն կուռս եւ քանդակեալս, եւ ձուլածոյս ի տանէ Տեառն, եւ զամենայն բագինսն զոր շինեալ էր ի ներքս ի տան Տեառն եւ յԵրուսաղէմ ի բաց ջնջեաց,
16․ եւ ուղղեաց նա զսեղանն Տեառն, եւ անդ մատոյց խունկս եւ ողջակէզս զքաւութեանն ի վերայ նորա, եւ ետ հրաման պատուիրանի Մանասէ Յուդայ, եւ ամենայն տանն Երուսաղէմի ծառայել տեառն Աստուծոյ Իսրայէղի,
17․ բայց սակայն ժողովուրդն տակաւին ի բարձունս պաշտէին,
18․ եւ այլ բանք որ ինչ էին Մանասէի եւ աղաւթք որ առ Աստուած էին, եւ մարգարէիցն բանքն որ ինչ խաւսէին ընդ նմա յանուն Աստուծոյ Իսրայէղի այս ամենայն գրեալ են ի ճառս
19․ աղաւթից նորայ, եւ որպէս լուան նմա վասն ամենայն մեղաց նորա, եւ ապստամբութեան նորա, եւ վասն տեղեաց տեղեաց որ շինեաց նա ի բարձունս եւ որպէս կացոյց անդ անտառս, եւ կուռս քանդակեալս մինչ չեւ էր դարձեալ այլ ամենայն գրեալ է ի ճառս տեսանողացն,
20․ եւ ննջեաց Մանասէ առ հարս իւր, եւ թաղեցին զնա ի դրախտի անդ տան իւրոյ: ԻԷ Եւ թագաւորեաց Ամովն որդի նորա փոխանակ նորա,
21․ եւ այր իբրեւ քսաներկու ամաց եւ կալաւ զթագաւորութիւնն ի վերայ Երուսաղէմի երկու ամ:
22․ եւ արար նա չարիս չարիս առաջի Տեառն որպէս եւ արար Մանասէ հայր նորա, եւ պագանէր երկիր ամենայն կռոց զոր կանգնեաց հայր նորա, եւ ծառայէր նոցա:
23․ Եւ ոչ խոնարհեցոյց զանձն իւր առաջի Տեառն որպէս եւ խոնարհեցոյց զանձն իւր Մանասէ հայր նորա, այլ յաճախեաց դնել մեղս ի մեղաց վերայ,
24․ եւ յարեան ի վերայ նորա ծառայք իւր եւ սատակեցին զնա ի ներքս ի տան իւրում,
25․ եւ եկին հասին զաւրքն ի վերայ այնոցիկ որք սպանին զթագաւորն եւ սատակեցին զնոսա: Եւ առին ամենայն ժողովք երկրին, զՅովսիայ որդի նորա, թագաւորեցուցին փոխանակ նորա:
Հաղորդում կայքում սխալի վերաբերյալ
Տվյալ հատվածում առկա է սխալ: