Գլուխ 16

   
1. Ապա յամին քսաներորդի վեցերորդի թագաւորութեանն Ասայի, եկն ել Բաասայ արքայ յԻսրայէղացւոց ի վերայ Յուդայ,

2. եւ առ Ասա ոսկի, եւ արծաթ ի տանէ Տեառն եւ ի տանէ թագաւորացն, եւ առաքեաց առ որդի Ադերայ արքայ Ասորւոց որ բնակեալ էր ի Դամասկոս, եւ ասէ.

3. Դիր ընդ իս ուխտ, զի լիցի ի մէջ իմ եւ ի մէջ քո ի մէջ հաւր իմ եւ ի մէջ հաւր քո, արդ` աւադիկ առաքեցի քեզ ոսկի եւ արծաթ զի ցրեսցես դու զուխտն զայն որ ընդ Բաասայ արքայի Իսրայէղացւոցն էր զի թափեսցի նա յինէն:

4. եւ լուաւ որդի Ադերայ արքայ Ասորոց Ասայի, եւ արձակեաց նա զիշխանս զաւրաց իւրոց, ի վերայ քաղաքացն Իսրայէղացւոց, հարկանէր վանէր նա զԵղոմն եւ զԴան եւ զԵբաղմայի եւ որ շուրջ զգաւառաւք էին զՆեփթաղիմաւ:

5. եւ եղեւ իբրեւ լուաւ Բաասայ եւ եթող էլիք զգործն զոր գործէր,

6. եւ Ասա արքայ զամենայն գունդն Յուդայ, եւ եկն հոսեաց նա զամենայն քարինսն եւ զփայտս շինածոյ զոր շինէր նոքաւք զԳաբաան եւ զՄասփա:

7. Ի ժամանակի յայնմիկ եկն Անանիայ առ Ասա արքայ Յուդայ եւ ասէ ցնա. Փոխանակ զի յուսացար դու յարքայն Ասորոց, եւ ոչ յուսացար դու ի տէր Աստուած քո վասն այսորիկ ապրեցան զաւրքն արքային Իսրայէղացոց ի ձեռաց քոց:

8. եւ ոչ Հնդիկքն եւ Լիբէացիքն եկին ի վերայ քո քաջալերեալ կառաւք եւ երիւարաւք ամենայն բազմութեամբ: Եւ յորժամ յուսացար դու ի տէր Աստուած մատնեաց զնոսա ի ձեռս քո,

9. զի աչք Տեառն հային ի վերայ ամենայն երկրիս, զաւրացուցանել զամենայն սիրտս կատարեալս զայս, զի արդ` ոչ գիտացէր յայսմ հետէ լիցի միշտ պատերազմ նորա ընդ քեզ:

10. Եւ բարկացաւ Ասայ ի վերայ մարգարէին եւ ետ զնա ի տուն բանդին զի բարկացաւ նա ի վերայ բանիցն եւ սկսաւ զլանալ, եւ զրկել զժողովուրդն ի ժամանակի յայնմանէ:

11. եւ ահաւասիկ բանք Ասայի վերջինք եւ միջինք եւ առաջինք գրեալ են ի գիրս ճառիցն թագաւորացն Յուդայ եւ Իսրայէղի:

12. եւ անկաւ Ասայ յախտ հիւանդութեան: Յամին երեսներորդի, իններորդի արքայութեան իւրոյ, անկաւ յախտոտից իւրոց, եւ ի հիւանդութեան անդ իւրում ոչ խնդրեաց նա զտէր Աստուած այլ այց առնէր նա բժշկաց:

13. Եւ ննջեաց Ասայ առ հարս իւր, եւ մեռաւ Ասա յամին քառասներորդի առաջնում ամի արքայութեան իւրում,

14. եւ թաղեցին զնա ի գերեզմանի անդ, զոր բրեաց իւր ի քաղաքին Դաւթի, եւ ննջեցուցին զնա ի գահոյս իւր, եւ լցին զնա խնգաւք եւ ազգի ազգի իւղովք իւղեփեցաց եւ արարին նմա ուղերկութիւն մեծ եւ լացին զնա լալեաւք մեծաւ յոյժ: