1. Եւ թագաւորեաց Յովսափաթ որդի նորա եւ զաւրացաւ Յովսափաթ ի վերայ Իսրայէղի,
2. եւ կացոյց նա զաւրս բազումս ի քաղաքսն ամրացեալս, եւ կացոյց զաւրագլուխս ի վերայ քաղաքացն Յուդայ, եւ ի վերա քաղաքացն Եփրեմի զոր հասեալ կալեալ էր Ասայի հաւր նորա,
3. եւ եղեւ տէր Աստուած ընդ Յովսափաթայ, զի գնայր նա ըստ ճանապարհացն Դաւթի հաւր իւրոյ զառաջնեացն եւ ոչ էր ի խնդիր կռոցն.
4. այլ ի խնդիր էր տեառն Աստուծոյ հաւրն իւրեանց, եւ գնայր նա ըստ պատուիրանաց նորա, եւ ոչ ըստ գործոց որդւոցն Իսրայէղի:
5. Եւ յաջողեաց տէր Աստուած զթագաւորութիւնն ի ձեռին նորա, եւ եկին բերին Յուսափատու ամենայն տունն Յուդայ պատարագս, եւ եղեւ նմա մեծութիւն յոյժ եւ փառք մեծ,
6. եւ բարձրացաւ սիրտ նորա ի ճանապարհս Տեառն, եւ սկսաւ կործանել զկուռս որ կային, եւ կոտորեաց անտառս յերկրէն Հրէաստանի:
7. Ապա յամին երրորդի թագաւորութեանն Յուսափատու առաքեաց նա զիշխանս զաւրաց իւրոց զորդիս զաւրաւորաց, եւ զորդի Նահիայ եւ զԱբդիայ եւ Զաքարիայ եւ զՆաթանայէլ եւ զՄիքայ, զի ուսուսցեն քաղաքս քաղաքս Յուդայ,
8. եւ ընդ նոսա զՂեւտացիս Սասիայ եւ Նաթանիայ եւ զԱբդիայ եւ Ասիէլ եւ Սեմէրիմամովթ եւ Յունաթան եւ Տովբիայ եւ Աղովնիայ եւ Տովրիաս եւ Տովբաղովնիայ: Արդ` Ղեւտացիք եւ ընդ նոսա Եղիշամա եւ Յորամ քահանայք եւ նստէին քաղաքաց քաղաքաց:
9. եւ ուսուցանէին գիրս պատգամաց Տեառն, եւ շրջէին ընդ քաղաքս քաղաքս Յուդայ, եւ ուսուցանէին ժողովուրդս:
10. եւ եղեն զարմանալիք մեծ Տեառն ի վերայ ամենայն թագաւորութեան երկրին, եւ ոչ գոյր պատերազմ նոցա ընդ Յովսափատու:
11. նաեւ յայլ ազգեաց անտի բերէին Յովսափատու պատարագս, ոսկի եւ արծաթ, եւ այլ գահամունս նաեւ Արաբացիքն եւս բերին նմա խոյս խաշանց եւթն հազար եւ եւթն հարիւր,
12. եւ երթալով երթայր Յուսափատ մեծանայր եւ բարձրանայր յոյժ, եւ շինեաց նա ի մէջ Յուդայ եւ այլ քաղաքս,
13. եւ գործ բազում գործեցաւ ի նմա յերկրին Հրէաստանի, եւ արք պատերազմողք հզաւրք յԵրուսաղէմ,
14. եւ այս թիւք անուանց ըստ ազգս ազգաց, նահապետաց ազգատոհմին իւրեանց առ Յուդայ հազարաւորք, Եդեաս զաւրագլուխ եւ ընդ նմա որդիք զաւրավարաց, արք հզաւրք երեք հարիւր հազար, եւ զկնի նոցա Յովանան զաւրագլուխ, եւ ընդ նմա երկերիւր, եւ ութսուն հազար:
15. եւ յետ նոցա Մասիա Զամբրեանց կամակարեալ Տեառն,
16. եւ ընդ նմա երկերիւր եւ ութսուն հազար եւ յետ նոցա զաւրք զաւրացեալ,
17. եւ Բենիամէն գնդէ զաւրաւք զաւրութեամբ Եղիադայ եւ ընդ նմա աղեղնաւորք վառեալք երկերիւր հազար,
18. եւ զհետ նոցա Յովսափատ, եւ ընդ նմա հարիւր եւ ութսուն հազար զաւրք զաւրացեալք:
19. այս ամենայն ի սպաս կային թագաւորին թող զայն զամենայն որ գումարեալ կային ի քաղաքս քաղաքս եւ յամուրս ամուրս ամենայն Հրէաստանի:
Հաղորդում կայքում սխալի վերաբերյալ
Տվյալ հատվածում առկա է սխալ: