1․ Այր ամաց քսան եւ հնգից. եւ քսան եւ ինն ամ թագաւորեաց յԵրուսաղէմ, եւ անուն մաւր նորայ Աբիայ դուստր Զաքարիայ:
2․ եւ արար ուղղութիւն Եզեկիայ առաջի Տեառն ըստ ամենայնի որ ինչ արար Դաւիթ հայր նորա:
3․ Եւ եղեւ իբրեւ հաստատեցաւ Եզեկիայ յարքայութեան իւրում, յամսեանն առաջնում բանայր նա զդրունս տանն Տեառն, եւ զարդարէր զնոսա,
4․ եւ ածէր ի ներքս զքահանայսն եւ զՂեւտացիս եւ կացուցանէր զնոսա ի կողման արեւելիցն:
5․ եւ ասէ ցնոսա. Լուարուք Ղեւտացիք, արդ` սրբեցարուք եւ սրբեցէք զտուն տեառն Աստուծոյ հարցն մերոց, եւ ի բաց հանէք զամենայն պղծութիւնս ի սրբութենէ այտի,
6․ զի յետս կացին հարքն մեր եւ արարին չարիս առաջի տեառն Աստուծոյ մերոյ, եւ թողին զնայ եւ դարձուցին զերեսս իւրեանց ի վրանէն վկայութեանց Տեառն,
7․ եւ փակեցին զդրունս տաճարին, եւ շիջուցին զճրագունսն եւ խունկս ոչ խնգեցին նոքա, եւ ողջակէզս ոչ մատուցին Աստուծոյ սրբոյն Իսրայէղի:
8․ եւ եղեւ սրտմտութիւն բարկութեան Տեառն ի վերայ Յուդայ եւ ի վերայ Երուսաղէմի, եւ մատնեաց զնոսա յիմարութիւնն եւ յապականութիւն եւ ի զարմանալիս եւ շչիւն որպէս եւ դուք իսկ տեսանէք աչաւք ձերովք,
9․ եւ ահաւասիկ անկան հարքն ձեր ի սուր եւ որդիքն ձեր եւ դստերք ձեր ի գերութիւն մատնեցան յերկիր որ ոչ իւրեանց էր:
10․ Վասն այսր ամենայնի եդ ի մտի իմում դնել զուխտս զայս ընդ տեառն Աստուծոյ Իսրայէղի զի դարձուսցէ ի մէնջ զսրտմտութիւն բարկութեան իւրոյ,
11․ եւ արդ` մի պակասիցէք առնել առաջի Տեառն, կանխել կալ դուք առաջի նորա պաշտել խունկս արկանել.
12․ յոտն կացին վաղվաղակի Ղեւտացիքն: Մաաթ Ամասենց, եւ Յովելն Ազարիանց յորդւոցն Մերարեա, եւ Կիսն Աբայեանց եւ Ազարիայն, Յաղացեղեանցն եւ յորդւոցն Գերսովնեա Յուդայ Աղեմայեանց եւ Յովադան Յովաքեանց:
13․ եւ յորդւոցն Եղիսափան Ամարի եւ Յէիէլ, եւ յորդւոցն Ասափայ Զաքարիայ եւ Մաքթանիայ:
14․ եւ յորդւոցն Եմանա Յէիէլ եւ Սէմէի, եւ յորդւոցն Իդիթովմ, Սամաիայ եւ Ոզիէլ.
15․ եւ ժողովեցին զեղբարսն իւրեանց եւ սրբեցան եւ սրբեցին ըստ պատուիրանին Եզեկիա արքայի ի հրաման Տեառն զի սրբեսցեն զտուն տեառն Աստուծոյ:
16․ եւ եկին մտին քահանայքն ի տուն տեառն Աստուծոյ սրբել զնա եւ հանին անտի զամենայն պղծութիւնսն զոր գտին ի ներքս ի սրահի անդ, եւ պեղեցին հանին անտի արտաքս ի հեղեղատն ի Կեդրովն:
17․ Եւ յաւուրն առաջնում ամսոյն առաջնոյ, սրբեցին եւ յաւուրն ութերրորդի եկին մտին ի ներքս ի տաճար անդր Տեառն եւ սրբեցին զտունն Տեառն աւուրս ութ: Եւ յաւուրն վեշտասաներրորդի յամսեանն առաջնում կատարեկին,
18․ եւ եկին մտին ի ներքս, առ Եզեկիայ արքայ, եւ ասեն ցնայ. Սրբեցաք մեք զամենայն ինչ որ ի տանն Տեառն էր, եւ սեղանն ողջակիզացն, եւ զամենայն սպաս նորա, եւ զսեղան հանապազորդացն եւ զամենայն սպաս նորա:
19․ եւ զամենայն կահն եւ զկարասին զոր առաքեաց յարքայութեան իւրում ի յետս կալն իւրում, կազմեցաք սրբեցաք մեք անդրէն, եւ ահաւասիկ եդեալ դնի առաջի սեղանոյ Տեառն:
20․ Եւ կանխեաց ընդ առաւաւտն Եզեկիայ արքայ, եւ ժողովեաց նա զիշխանս քաղաքին, եւ եկն ել ի տաճարն Տեառն:
21․ եւ անտ մատուցանէր զողջակէզս պատարագացն զուարակս եւթն, եւ խոյս եւթն եւ գառինս եւթն, եւ նոխազս եւթն եւ զվասն մեղաց արքային, եւ զվասն սրբութեանն Իսրայէղի: Խաւսել սկսաւ Եզեկիայ ընդ որդիսն Ահարոնի եւ ընդ քահանայսն, զի մատուսցեն զպատարագս ի սեղան Տեառն,
22․ եւ մատեան զենուլ քահանայքն զզուարակսն, եւ ընկալան զարիւնն, եւ հեղուին առ սեղանովն, եւ զենուին զխոյսն եւ հեղուին զարիւնն ի վերայ սեղանոյն:
23․ եւ զենուին զգառինսն որ վասն մեղացն էր, առաջի թագաւորին եւ ժողովրդեանն, եւ դնէին զձեռս իւրեանց ի վերայ նոցա,
24․ եւ ցանէին զարիւն նոցա առ սեղանովն, եւ ի վերայ ժողովրդեանն, առ ի քաւութենէ ամենայն Իսրայէղացւոցն, զի վասն ամենայն Իսրայէղացւոցն պատուիրեաց թագաւորն մատուցանել զողջակէզսն եւս վասն մեղացն:
25․ Եւ կացոյց զՂեւտացիսն ի տաճարին Տեառն ի փողս եւ ի քնարս, եւ թմբուկս ըստ պատուիրանին Դաւթի արքայի եւ զԳադ տեսանողն արքայի, եւ զՆաթան մարգարէ պատուիրանաւն Տեառն հրաման էր ի ձեռն մարգարէիցն նորա,
26․ եւ Ղեւտացիքն ի սրինգս իւրեանց եւ քահանայքն ի փողս իւրեանց,
27․ եւ հրաման ետ Եզեկիայ ելուզանել դնել զողջակէզն ի վերա սեղանոյն:
28․ Իբրեւ սկսան մատուցանել զողջակէզն պատարագացն, սկսան աւրհնել ի ձայն փողոյն, եւ ի ձայն սրնգին արքային Իսրայէղացւոց,
29․ եւ ամենայն ժողովուրդն անկեալ երկիր պագանէին եւ աւրհնիչքն աւրհնէին, եւ փողքն գոչէին մինչ ի կատարել պատարագացն իբր ելուզին ի վեր զպատարագսն, խոնարհեցաւ թագաւորն երկիր պագանէր, եւ ամենայն ժողովուրդն նմայ:
30․ Եւ ասէ Եզեկիայ արքայ եւ իշխանքն ցՂեւտացիսն. Զի աւրհնեսցեն բանիւ ըստ աւրհնութեանն Դաւթի, եւ Ասափա մարգարէի, եւ աւրհնէին ցնծութեամբ, եւ ուրախութեամբ եւ անկանէին ամենեքեան խոնարհ երկիր պագանէին:
31․ Ապա խաւսել սկսաւ Եզեկիա եւ ասէ. Այժմիկ կատարեցէք զձեռս ձեր, արդ` բերէք եւ դուք մատուցէք պատարագս աւրհնութեան ի տուն Տեառն եւ ամենեքին յաւժարութեամբ սրտիւ բերին մատուցանել զպատարագս,
32․ եւ եղեւ թիւ ողջակիզացն զոր ժողովուրդքն մատուցանէին զուարակք եւթանասուն խոյք իբրեւ հարիւր, գառինք երկերիւր յողջակէզս պատարագաց Տեառն,
33․ եւ որ նուիրեալ զուարակքն էին վեց հարիւր եւ ոչխարք երեք հազարարք:
34․ սակայն եւ քահանայքն սակաւք էին եւ ոչ էին բաւական առ այնչափ ողջակէզս պատարագաց, ապա յաւգնականութիւն եկին նոցա եղբարք իւրեանց, Ղեւտացիքն մինչչեւ առին մատուցին զպատարագսն: Եւ կատարեցաւ գործ ողջակիզացն մինչչեւ սրբեցան նուիրեցան եւ քահանայքն զի Ղեւտացիքն յառաջագոյն եւս սրբեցան քան զքահանայսն,
35․ եւ ողջակէզք պատարագացն բազում էին յոյժ ճարպովքն կատարելովք եւ զոհիւքն ողջակիզացն եւ կազմեցաւ պատրաստեցաւ գործն ի տան Տեառն:
36․ եւ ուրախ եղեւ Եզեկիայ եւ ամենայն ժողովուրդն վասն պատրաստութեան սպասուն Տեառն, զի յանկարծակի իմն կատարեցան բանն հրամանին:
Հաղորդում կայքում սխալի վերաբերյալ
Տվյալ հատվածում առկա է սխալ: