1․ Եւ իբրեւ կատարեցին զայն ամենայն, ելին ամենայն Իսրայէղացիքն որ գտան ի քաղաքսն Յուդայ, սկսան խորտակել զարձանսն եւ կոտորել զանտառս, եւ կործանել զբարձունս, եւ տապալել զբագինս յամենայն երկրէն Հրէաստանի եւ Բենիամէն, եւ յԵփրեմ եւ Մանասէ մինչչեւ ի վախճան, եւ գնացին այր Իսրայէղեան յիւրաքանչիւր ժառանգութիւն եւ ի քաղաքս իւրեանց:
2․ Ապա կարգեաց Եզեկիայ զկարգս շաբաթաւորաց քահանայիցն եւ Ղեւտացւոց եւ զիւրաքանչիւր կարգս սպասուց պաշտամանց իւրեանց յողջակէզս եւ ի պատարագս, յաւրհնել եւ ի պաշտել եւ ի խոստովան լինել դրանց սրահիցն տան Տեառն,
3․ եւ մասն արքային որ հասանէր բերել յընչից իւրոց իբրեւ յողջակէզս պատարագաց ի ժամանակս առաւաւտինս եւ երեկուն եւ յողջակեզս շաբաթուցն ի գլուխս ամսոցն եւ ի տաւնս տարեկանացն, ըստ գրոյն աւրինակի որպէս եւ գրեալ է յաւրէնս Տեառն:
4․ Ահա հրաման ետ Եզեկիայ ժողովրդեանն որ բնակեալ էին յԵրուսաղէմ երեւեցուցանել զատանել տալ զմասն քահանայիցն եւ Ղեւտացւոց զի հզաւրասցին, եւ կարասցեն բաւական լինել սպասու պաշտամանն Տեառն:
5․ Եւ իբրեւ ել հրաման բանին Եզեկիայ յաճախեցին որդիքն Իսրայէղի բերել կուտել զերախայրիսն պտղոյ ցորենոյ գինոյ ձիթոյ մեղու ամենայն ընդոց արմտեաց ծնընդեան երկրին, բերին կուտեցին բազմութիւն յոյժ,
6․ եւ որ բնակեալ էին ի քաղաքսն Յուդայ, եւ նոքա եկին բերին զտասանորդս զարջառի եւ զոչխարի յայծեաց զաւդեաց առ հասարակ ի նուէրս սրբութեան տեառն Աստուծոյ իւրեանց, եւ եկին բերին եդին կուտեցին շեղջս շեղջս ի սրահս:
7․ Եւ եղեւ զի սկսան հիմն արկանել շեղջիցն շեղջից յամսեանն երորդի, եւ կատարեցին զշեղջսն յամսեանն եւթներորդի,
8․ եւ եկն Եզէկիայ եւ ժողովուրդքն ամենայն, եւ տեսին զշեղջսն կուտեալս, եւ աւրհնեցին զԱստուած Իսրայէղի,
9․ սկսաւ հարցանել Եզեկիայ ցքահանայապետսն եւ ցՂեւտացիսն վասն շեղջոցն:
10․ եւ ետ պատասխանի Ազարիա քահանայապետ տանն Սադովկայ եւ ասէ. Յորմէ հետէ սկսան մտանել երախայրիք ի տուն Տեառն, կերաք մեք եւ արբաք բազում ուրախութեամբ, եւ մնացորդք այդ որ մնացին, այդչափ յոյժ կուտեցան զի աւրհնեաց Տէր զժողովուրդ իւր: Եւ կուտեցան մնացորդքդ այդ աւադիկ շեղջեալք եւ կուտեալք:
11․ ապա ետ հրաման Եզեկիայ առնել կազմել պատրաստել շտեմարանս ի տան Տեառն,
12․ եւ արարին կազմեցին պատրաստեցին տարան ի ներքս զերախայրիսն զգուշութեամբ, եւ ի վերայ նոցա վարդապետ, Քոնոնիայ Ղեւտացի եւ Սէմէի եղբայր նորա ի ձեռանէ,
13․ եւ Յէիէլ եւ Ոզիայ եւ Նաաթ եւ Ասաէլ եւ Յերիմովթ, եւ Յովզաբատ եւ Սամաքիայ եւ Սեքենիա, եւ Թեսովն, եւ Ղասկ եւ Բանէաս, եւ որդիք նորա պատրաստականք ի ձեռանէ Քոնէնիայ, եւ Սեմեա եղբաւր նորա որպէս եւ հրաման ետ Եզեկիայ արքայ եւ Ազարիա հրամանատար տան Տեառն,
14․ եւ Կորեշ Յեմնայեանց Ղեւտացի դարապետ կողմանցն արեւելից եւ ի վերայ ընտանեաց տալ զերախայրիսն Տեառն,
15․ եւ զնուէրս սրբոցն ի ձեռանէ Յադար, եւ Բենիամին, եւ Յէշով եւ Շեմեա, եւ Ամարիայ, եւ Սէքէնիայ ի քաղաքսն ի ձեռն քահանայիցն հաւատարմութեամբ եղբարցն իւրոց ըստ կարգս շաբաթամտացն ըստ չափոյ մեծին եւ փոքու.
16․ բայց ի տղայածին մանկոյն, այլ արու մանկան յերէմենից եւ ի վեր, ամենայնի որ մտանէին ի տուն Տեառն ի բան համարոյ աւրստաւրէ իւրեանց ի պաշտաւն աւրամտի հրամանի կարգաց իւրեանց:
17․ Եւ այս հաշիւ քահանայիցն ըստ ազգատոհմի իւրեանց, եւ Ղեւտացիքն ըստ աւրմտի իւրեանց, ի քսանամենից եւ ի վեր ըստ հաշիւս իւրեանց,
18․ ըստ ամենայնի դիպի իւրեանց որդւոցն իւրեանց, եւ դստերացն իւրեանց, ըստ բազմութեան իւրեանց զի հաւատարմութեամբ նուիրեսցին նուէրք իւրեանց, եւ որդւոցն Ահարովնի որ կայցեն յագարակս, եւ ի քաղաքս իւրեանց, ըստ ամենայն քաղաքի քաղաքի արք որ յանուանէ անուանեալ իցեն տալ նոցա մասն, ամենայն արու ի մանկան,
19․ որ քահանայիցն սակի իցեն, եւ ամենայնի որ թուիցին ի թիւս Ղեւտացւոց:
20․ Եւ արար Եզեկիայ այսպէս յանդիման ամենայն Հրէաստանի, եւ արար Եզեկիայ զբարին եւ զիրաւունս եւ զուղղութիւն, եւ ճշմարտութիւն առաջի տեառն Աստուծոյ.
21․ եւ զամենայն զգործս զոր սկսաւ գործել ի տան Տեառն յաւրէնս ի հրամանս, եւ ի պատուիրանս եւ ի խնդրել զտէր Աստուած իւր յամենայն սրտէ իւրմէ եւ արար կատարեաց եւ աջողեցաւ նմա:
Հաղորդում կայքում սխալի վերաբերյալ
Տվյալ հատվածում առկա է սխալ: