1․ Եւ թագաւորեաց Յովսիա այր իբրեւ ութ ամի եւ երեսուներկու ամ կալաւ զթագաւորութիւնն ի վերայ Երուսաղէմի:
2․ Եւ արար Յովսիա զուղղութիւնն եւ զիրաւունս առաջի Տեառն: Եւ գնայր նա ընդ ամենայն ճանապարհացն հաւր իւրոյ Դաւթի, եւ ոչ թիւրեցաւ նա ոչ յաջ եւ ոչ յահեակ:
3․ Եւ յամին ութերորդի թագաւորութեան իւրում, ինքն մանուկ էր եւ սկսաւ խնդրել զտէր Աստուած Դաւթի հաւր իւրոյ: Եւ յամին երկոտասաներորդի թագաւորութեան իւրոյ սկսաւ սրբել նա զՅուդայ, եւ զԵրուսաղէմ յամենայն բարձանց եւ յամենայն բագնաց, եւ յամենայն կռոց քանդակեալ ձուլածոյիցն,
4․ եւ քանդէր զամենայն բագինս որ առաջի Բահղիմն կանգնեալ էր եւ զամենայն բարձունս որ ի վերայ նորա էին, եւ կոտորէր զամենայն անտառս եւ զկուռսն ձուլածոյս փշրէր եւ մանրէր եւ ընկենոյր առաջի գերեզմանացն զոհչաց նոցա:
5․ Եւ զոսկերս քրմացն այրէր ի վերայ կործանեալ բագնաց նոցա, եւ սրբեաց Յովսիայ զՅուդայ եւ զԵրուսաղէմ:
6․ եւ զամենայն քաղաքս Եփրեմի եւ Մանասէի, եւ Նեփթաղիմայ, եւ ամենայն որ շուրջ զնոքաւք էին,
7․ եւ կոտորէր զամենայն անտառսն, եւ կործանէր զամենայն կուռսն եւ խորտակէր, եւ զբարձունսն կործանէր յամենայն երկրէն Իսրայէղի եւ ինքն դառնայր յԵրուսաղէմ:
8․ Եւ յամին ութեւտասներորդի թագաւորութեանն իւրոյ հրաման ետ թագաւորն սրբել զտաճարն եւ զերկիրն: Եւ առաքեաց Յովսիա զՍափան զորդի Եսայեա, եւ զՄաասի քաղաքապետն եւ զՅովաս որդի Յովաքազայ զյիշատակաց դպիրն հաստատել զհրաման տան տեառն Աստուծոյ իւրոյ,
9․ եւ եկն եհաս նա առ Քեղկիա քահանայապետն մեծ, եւ ետուն նոքա զարծաթն որ մտեալ էր ի տուն Տեառն զոր ժողովեալ էր Ղեւտացւոցն որ պահէին զդրունն ի ձեռանէ Մանասէի եւ Եփրեմի, եւ իշխանացն յամենայն գնդացն Իսրայէղի յամենայն Յուդայ, Բենիամին եւ որ բնակեալ էին յԵրուսաղէմ,
10․ եւ ետուն զնա ի ձեռն այնոցիկ որ գործէին զգործ տան Տեառն,
11․ եւ առցեն նորոգեսցեն զամենայն գործ հիւսանց, գործ շինաւղաց, եւ դնեսցեն վէմս արդեալս չորեք կուսիս, եւ փայտս հեծանոցուս զոր ջնջեցին բարձին թագաւորքն Յուդայ,
12․ եւ արքն որ էին հաւատարիմք ի վերա գործոցն Յայեթ եւ Աբդիա Ղեւտացիք յորդւոցն Մերարեա, եւ Զաքարիա եւ Մեսաղամ յորդւոցն Կաաթու ճեպաւղք եւ ամենայն որդիք Ղեւտացւոցն ի սրինգս երգոց:
13․ ի վերա բեռնակիր ստանձնեաուորաց, վարդապետք որ գործեցին զգործ ճեպելով, եւ ի Ղեւտացւոց անդի դպիրք եւ դատաւորք եւ դարապանք:
14․ եւ մինչ բերէին ի ներքս զարծաթն զմուտս տանն Տեառն անդ գտանէր Քեղկիա քահանայապետ զմատեանն աւրինաց Տեառն որ ի ձեռն Մովսէսի տուեալ էր:
15․ Եւ խաւսել սկսաւ Քեղկիա եւ ասէ ցՍափան դպրապետ. Գիր գտի ասէ զաւրինաց ի տան Տեառն:
16․ եւ բերին զգիրն զայն ետուն ի ձեռս արքային եւ եդ բանս ընդ արքայի եւ ասէ. Զամենայն արծաթ որ տուեալ է ի ձեռս ծառայից քոց ոյք առնէին զգործն:
17․ զամենայն արծաթն ձուլեցին որ գտեալ էր ի տան Տեառն, եւ ետուն զնա ի ձեռս ոստիկանացն,
18․ եւ պատմեաց զայն Սափան դպրապետ արքայի եւ ասէ. Գիր մի ետ ցիս ասէ Քեղկիա քահանայապետ, եւ մատեաւ վաղվաղակի ընթերցաւ զայն յունկն արքայի,
19․ եւ եղեւ իբրեւ լուաւ արքայ զբանս աւրինացն, ձեռ զաւձաւք արկանէր զպատմուճանն պատառէր:
20․ տայր պատուէր թագաւորն Քեղկեա, եւ Աքիկամա որդիոյն Սափանայ, եւ Յաբղովնայ որդւոյն Միքեայ, եւ Սափանա դպրապետի, եւ յԵսեայ որդւոյն արքայի.
21․ Երթայք գնացէք խնդրեցէք դուք ի Տեառնէ ի վերայ իմ եւ ի վերայ մնացորդացն Իսրայէղի եւ Յուդայ վասն բանից գրոյդ որ գտաւ զի մեծ է սրտմտութիւն բարկութեան Տեառն որ վառել է ի վերայ մեր: Փոխանակ զի ոչ լուան հարքն մեր բանի Տեառն առնել զամենայն որ ինչ գրեալ է ի գիրդ յայդմ:
22․ եւ գնացին Քեղկիա քահանայապետ եւ որում հրաման ետ թագաւորն ընդ նմա, առ Ոողդա մարգարէ զի էր նա կին Սեղեմեա որդւոյ Թեկուայ որդւոյ Ասերայ պատմուճակի, եւ պահէր զպատուիրանն Տեառն, եւ նա ինքն էր բնակեալ յԵրուսաղէմ, ի Մասենայ եւ խաւսեցան ընդ նմա ըստ բանիցն որ ասաց թագաւորն:
23․ Ապա ետ պատասխանի նոցա եւ ասէ. Այսպէս ասէ տէր Աստուած Իսրայէղի. Ասասջիք դուք ցայրն ցայն որ առաքեաց զձեզ առ իս գոգջիք.
24․ այսպէս ասէ տէր Աստուած. Ահաւասիկ ես ածեմ չարիս ի վերայ տեղւոդ այդորիկ ըստ ամենայն բանիցդ որ գրեալ են ի գրիդ յայդմիկ որ ընթերցայք դուք առաջի թագաւորին Յուդայ.
25․ փոխանակ զի թողին զիս եւ արկանէին խունկս դիցն դիցն աւտարոտոց զի բարկացուսցեն զիս յամենայն գործս ձեռաց իւրեանց որովք բորբոքեցին զսրտմտութիւն բարկութեան իմում ի տեղւոջդ յայդմիկ եւ այլ ոչ եւս շիջցի:
26․ բայց թագաւորն որ առաքեաց զձեզ առ իս խնդրելով ի Տեառնէ: Այսպէս ասասջիք դուք ցնա, այսպէս ասէ տէր Աստուած Իսրայէղի զբանս զոր լուար դու.
27․ եւ զանգիտեաց սիրտ քո եւ խոնարհեցար դու ի սրտի քում առաջի իմ, զի լուար դու զբանս իմ ի վերայ տեղւոյդ այդորիկ, եւ ի վերայ բնակչաց դորա, եւ խոնարհեցար դու ի սիրտ քո առաջի իմ, եւ պատառեցեր դու զպատմուճան քո, եւ լացեր դու առաջի իմ եւ ես լուա ձայնի բարբառոյ քո ասէ Տէր,
28․ արդ` աւասիկ մատուցից զքեզ առ հարս քո խաղաղութեամբ ի հանգիստ գերեզմանաց քոց, եւ ոչ տեսցեն աչք քո զամենայն չարիս զոր ածելոցն իցեմ ի վերայ տեղւոյս այսորիկ, եւ ի վերայ բնակչաց սորա, եւ բերին անդրէն պատասխանի:
29․ Եւ առաքեաց Յովսիայ արքայ եւ ժողովեաց զծերս ժողովրդեանն Յուդայ եւ Երուսաղէմի:
30․ եւ եկն արքայ եմուտ ի տուն Տեառն, եւ ամենայն բնակիչքն Յուդայ եւ ծերինն Երուսաղէմի եւ քահանայքն եւ Ղեւտացիքն, եւ ամենայն ժողովուրդքն ի մեծէ մինչ ի փոքր եւ ընթերցաւ նա յականջս ժողովրդեանն զամենայն բան գրոյն զոր գրեալ էին ի գրի անդ աւրինաց կտակարանի որ գտեալ էին ի տան Տեառն.
31․ զի եկն եկաց արքայ Յովսիայ ի վերայ սեանն, եդ ուխտ պատուիրանի գնալ առաջի Տեառն պահել զպատուիրանս նորա եւ զվկայութիւնս նորա եւ զհրամանս նորա յամենայն սրտէ եւ յամենայն մտաց առնել կատարել զամենայն պատգամս պատուիրանին որ գրեալ են ի գրին յայնմիկ,
32․ եւ հաստատեաց զամենեսին որ յԵրուսաղէմ եւ Յուդայ, եւ ի Բէնիամին էին, եկին եւ մտին նոքա յուխտ պատուիրանին, ըստ ուխտին տեառն Աստուծոյ հարցն իւրեանց:
33․ եւ կործանեցին ջնջեցին զամենայն պաշտամունս պղծութեան յերկրէն իւրեանց, եւ հաստատեցին ծառայել տեառն Աստուծոյ հարցն իւրեանց զամենայն աւուրս կենաց իւրեանց, զի մի եւս խոտորեսցին ի ճանապարհաց տեառն Աստուծոյ իւրեանց:
Հաղորդում կայքում սխալի վերաբերյալ
Տվյալ հատվածում առկա է սխալ: