Գլուխ 36

   
1․ Եւ արար Յովսիա զպասեքն տեառն Աստուծոյ իւրում եւ մատուցին զպատարագս զպասեքայն եւ զենին զպասեքայն յաւուր տասներրորդի չորրորդի ամսեանն առաջնում,
2․ եւ կացոյց նա զքահանայս պահապանս իւր, եւ զաւրացոյց զնա եւ հաստատեաց ի գործ Տեառն:
3․ ետ պատուէր Ղեւտացւոցն գլխաւորաց զի պատուէր տացեն ամենայն Իսրայէղի սրբել զանձինս իւրեանց ի նուէրս Տեառն զի առցեն զտապանակն կտակարանաց ի տուն Տեառն: Եւ առին եդին զտապանակն կտակարանաց ի տան Տեառն, զոր շինեաց Սողոմովն որդի Դաւթի արքայն Իսրայէղի: Ապա խաւսել սկսաւ արքայն եւ ասէ. Մի ինչ լիցի ամենեւին այլ գործ բեռնաբարձութեան ձերոյ, բայց միայն պաշտաման սպասու սրբութեան ձեզ ի մէջ ժողովրդեանն Իսրայէղացւոց,
4․ արդ` կազմեցարուք ըստ ազգս ազգաց տոհմի ձերոյ: Եւ ըստ կարգս կարգս աւրամտի հրամանի գրոյն Սողովմոնի որդւոյ նորա,
5․ եւ կացէք դուք ի տան Տեառն ըստ վիճակաց դասուց տանց հարցն ձերոց, եւ եղբարցն ձերոց եւ որդւոց ժողովրդեանդ, եւ մասն տան ազգատոհմին Ղեւտացւոց,
6․ եւ զենջիք դուք զպասեքայն եւ պատրաստեսջիք դուք եղբարցն ձերոց եւ որդւոց ժողովրդեանդ, առնել ըստ հրամանին բանի Տեառն որ ի ձեռն Մովսէսի,
7․ եւ կանխեաց սկսաւ Յովսիայ յառաջագոյն որդւոց ժողովրդեանն, գառինս եւ խաշինս, եւ ալոջս եւ ուլս այծիցն զամենայն ի պասեքն ամենայն ինչ որ գտաւ ըստ թուոյն երեսուն հազար, եւ արջառ երիս հազարս այս ի տանէ արքունի,
8․ եւ իշխանքն որ եկին բերին զերախայրիս ժողովրդեանն եւ քահանայիցն եւ Ղեւտացւոցն եւ Քեղկեա եւ Զաքարիա, եւ Յէիէլ իշխանաց տանն Աստուծոյ, եւ ետուն զայն ցքահանայսն ի պասեք անդր որձս եւ որոջս եւ ալոջս երկուս հազարս եւ վեց հարիւր, եւ զուարակս երեք հարիւր:
9․ եւ Քոնենիա, եւ Սամէէ եւ Նաթանայէլ եղբարք իւր, եւ Ասաբիա, եւ Յէիէլ, եւ Յովսափատ իշխանք Ղեւտացոց բերին ի պասեք անդր յորձս հինգ հազար, եւ զուարակս հինգ հարիւր:
10․ եւ ուղղեցաւ աջողեցաւ սպաս պաշտամանն, եւ կացին քահանայքն ի վերայ հաստատութեան իւրեանց եւ Ղեւտացիքն ըստ մասանց մասանց իւրեանց ըստ հրամանի թագաւորին,
11․ եւ զենին զպասեքն եւ առին զարիւնն հեղին ի ձեռաց իւրեանց: Եւ Ղեւտացիքն մորթեցին,
12․ պատրաստեցին զողջակէզս պատարագացն, զի եղիցի այն ըստ մասանց տանց ազգատոհմին իւրեանց որդւոցն Իսրայէղի, զի մատուսցեն ըստ աւրինի Տեառն որպէս եւ գրեալ է ի գիրս Մովսէսի:
13․ եւ ապա ի վաղիւ անդր խորովել զպասեքն հրով ըստ դատաստանին եւ զնուէրսն եփել կատսայիւքն, եւ սանուք եւ աջողեցաւ եւ առին մատուցին յընթաց առ ամենայն որդիս ժողովրդեանն,
14․ եւ ապա յետ այսորիկ պատրաստեսցեն անձանց իւրեանց քահանայքն: Զի քահանայքն որդիքն Ահարովնի մատուցին զողջակէզսն պատրաստս մինչչեւ ցգիշեր գիշեր, եւ Ղեւտացիքն պատրաստէին նոցա եւ եղբարցն իւրեանց որդւոցն Ահարովնի,
15․ եւ սաղմոսասացքն որդիքն Ասափայ իւրեանց հաստատութեան ըստ պատուիրանին Դաւթի Ասափն եւ Եմանն եւ Իդիթովմ մարգարէքն
արքայի եւ դարապետք դրանն զի ոչ գոյր նոցա հանգիստ առ փոքր մի, ի սպասուէ անդի իւրեանց, եւ եղբարք նոցա Ղեւտացիքն պատրաստեցին նոցա, 16 եւ կազմեցաւ պաշտաւն Տեառն յաւուր յայնմիկ զի կատարեսցեն զպասեքն եւ բերցեն զողջակեզսն պատարագացն ի վերայ սեղանոյն Տեառն ըստ պատուիրանի հրամանի արքային Յովսիայ:
17․ եւ արարին որդիքն Իսրայէղի որ գտան անդ զպասեքն ի ժամանակի յայնմիկ եւ զտաւնն տարեկանաց բաղարջակերացն զեւթն աւր,
18․ չեղեւ այնպիսի պասեք երբեք կամ նմա ի մէջ Իսրայէղի յաւուրցն Սամուէլի մարգարէի եւ ամենայն թագաւորացն Իսրայէղի եւ ոչ եղեւ այնպիսի պասեք որպէս արար Յովսիա արքայ եւ քահանայքն եւ Ղեւտացիք բնակիչքն Յուդայ եւ Իսրայէղի որ էին բնակեալ յԵրուսաղէմ ի տան Տեառն,
19․ յամին ութուտասներորդի թագաւորութեանն Յովսիայ եղեւ պասեքս այս որ յետ այսր ամենայնի կազմեաց Յովսիայ զտաճարն, եւ զվոհուկսն եւ զգէտսն, եւ զթերափիսն, եւ զկուռսն եւ զկարասին որ էր յերկրին Յուդայ եւ յԵրուսաղէմ զայն ամենայն այրէր հրով: Եւ արքայն Յովսիա զի հաստատեսցէ զբանս ամենայն որ գրեալ է ի գրին յայնմիկ որ եգիտ Քեղկիա քահանայապետ ի տան Տեառն նման նմա ոչ եղեւ երբեք ոք, եւ ոչ այնպէս դարձուցանել առ Տէր ամեայն սրտիւ իւրով, եւ ամենայն մտաւք իւրովք եւ ամենայն զաւրութեամբ իւրով ըստ ամենայնի աւրինացն Մովսէսի, եւ ոչ յետ նորա յարեաւ նման ոք նմա բայց սակայն ոչ դարձաւ սրտմտութիւն Տեառն մեծն որ բարկացաւ նա սրտմտութեամբ բարկութեամբ իւրով ի վերայ Յուդայ ըստ ամենայն բարկութեան որ բակացոյցն Մանասէ եւ ասէ Տէր. Սակայն զՅուդայ դարձուցից յերեսաց իմոց որպէս դարձուցի զԻսրայէղն, եւ մերժեցից յերեսաց իմոց զքաղաքն զընտրեալ զԵրուսաղէմ, եւ զտունն զոր անուանեցից յանուն իմ,
20․ եւ ել փարաւովն Նեքաւով արքայն Եգիպտացւոց ի վերայ թագաւորաց Ասորեստանեաց առ ափն գետոյն Եփրատա տալ պատերազմ ընդ նմա ի Քարքմիս եւ գնաց ընդ առաջ նորա արքայ Յովսիայ.
21․ ապա յղեաց ընդ առաջ նորա փարաւովն հրեշտակս եւ ասէ. Զի կայ իմ եւ քո արքայդ Հրէաստանի, ոչ եթէ ի քո վերայ ինչ եկեալ եմ այսաւր տալ պատերազմ ընդ քեզ այլ ի տեղիս յայս պատերազմիս հասեալ եմ զի Աստուած ստիպեաց զիս, զգոյշ լեր դու յԱստուծոյ եւ յինէն զի մի ապականեսցիս դու,
22․ եւ ոչ դարձոյց Յովսիայ զերեսս իւր ի նմանէն տալ ընդ նմա պատերազմ, եւ ոչ լուաւ Յովսիայ բանիցն փարաւոնի Նեքովայ ի բերանոյ Աստուծոյ, եւ եկն ընդ դէմ տալ պատերազմ ընդ նմա ի դաշտին Մակեդոն:
23․ Ապա ընդ առաջ մատեան աղեղնաւորք, եւ ձիգ եդեալ նետալից արարին զՅովսիայ: Խաւսել սկսաւ Յովսիայ ընդ ծառայիս իւր եւ ասէ. Հանէք զիս ի տեղւոյդ պատերազմէ զի ապիկարեցայ յոյժ,
24․ եւ առին իջուցին զնա ի կառաց անտի յերկրորդ կառս եւ ածին յԵրուսաղէմ եւ մեռաւ Յովսիա, եւ թաղեցին զնա առ հարս իւր եւ սուգ առին ամենայն Յուդայ եւ Երուսաղէմ ի վերա Յովսիա:
25․ Եւ առ զողբս Երեմիա ի վերայ Յովսիայ եւ ամենայն երգիչքն արք եւ կանայք ողբան զողբս զայս մինչչեւ ցայսաւր ժամանակի, եւ ետուն զնա ի հրամանս Իսրայէղի եւ ահաւասիկ այս ամենայն գրեալ է յողբս մարգարէից: