1․ Բայց ի միաշաբաթուն վաղ՝ քաջ ընդ առաւաւտն, եկի՛ն ի գերեզմանն. բերին զխունկսն զոր պատրաստեցին. եւ ա՛յլ կանայք ընդ նոսա:
2․ Եւ գտին զվէմն թաւալեցուցեա՛լ ի գերեզմանէ անտի:
3․ Եւ մտեալ ի ներքս՝ ո՛չ գտին զմարմինն Տեառն Յիսուսի:
4․ Եւ եղեւ ընդ հիանալն նոցա վասն այնորիկ, եւ ահա՛ արք երկու հասին առ նոսա ի հանդերձս լուսաւորս:
5․ Եւ իբրեւ զահի հարան՝ եւ խոնարհեցուցի՛ն զերեսս իւրեանց յերկիր, ասեն ցնոսա. Զի՞ խնդրէք զկենդանին ընդ մեռեալս՝
6․ չէ՛ աստ, այլ յարեա՛ւ: Յիշեցէ՛ք որպէս խաւսեցաւ ընդ ձեզ մինչ է՛րն ի Գալիլեա,
7․ եւ ասէր՝ թէ պա՛րտ է որդւոյ մարդոյ մատնել ի ձեռս մարդոց մեղաւորաց, եւ ի խա՛չ ելանել, եւ յերրորդ աւուր յառնել:
8․ Եւ յիշեցին զբանսն նորա:
9․ Եւ դարձան պատմեցի՛ն զայս ամենայն մետասանիցն, եւ այլո՛ցն ամենեցուն:
10․ Եւ էին Մարիամ Մագդաղենացի, եւ Յովհաննա, եւ Մարիամ Յակովբայ, եւ ա՛յլք ընդ նոսա՝ որ պատմեցին զայս առաքելոցն:
11․ Եւ երեւեցան առաջի նոցա շաղփաղփութիւն բանքն նոցա՝ եւ չհաւատային նոցա:
12․ Բայց Պե՛տրոս յարուցեալ՝ ընթացաւ ի գերեզմանն, եւ հայեցեալ՝ տեսանէ զկտա՛ւսն լոկ՝ զի կային. եւ գնա՛ց ընդ միտս զարմացեալ, թէ զինչ եղեւ:
13․ Եւ ահա՝ երկուք ի նոցանէ երթային ի նմին աւուր ի գեղ մի, որ հեռի՛ էր յԵրուսաղէմէ հարեւր եւ վաթսուն ասպարիսաւ. եւ էր անուն նորա Եմմաւո՛ւս:
14․ Եւ նոքա խաւսէի՛ն ընդ միմեանս վասն ամենայն անցիցն անցելոց:
15․ Եւ եղեւ ընդ խաւսելն նոցա եւ ընդ վիճել, եւ ինքն իսկ Յիսուս մերձեցաւ՝ եւ երթա՛յր ընդ նոսա:
16․ Եւ նոցա աչք՝ կալեա՛լ էին առ ի չճանաչելոյ զնա:
17․ Եւ ասէ ցնոսա. Զի՞նչ են բանքդ՝ վասն որոյ վիճիքդ ընդ միմեանս՝ մինչ դեռ գնայքդ, եւ տրտմեա՛լ էք:
18․ Պատասխանի ետ մի ոմն ի նոցանէ՝ որում անուն էր Կղէո՛վպաս, եւ ասէ ցնա. Դու՝ միա՛յն կաս յԵրուսաղէմ, որ ոչ գիտացեր զինչ գործեցաւ ի նմա յաւուրսս յայսոսիկ:
19․ Եւ ասէ ցնոսա. Զի՞նչ: Եւ նոքա՛ ասեն. զՅիսուսէ՛ Նազովրացւոյ. որ եղեւ այր մարգարէ, հզա՛ւր արդեամբք եւ բանիւք առաջի Աստուծոյ, եւ ամենայն ժողովրդեանն:
20․ Որպէս մատնեցին զնա քահանայապետքն՝ եւ իշխանքն մեր ի դատաստան մահու, եւ հանին զնա ի խաչ:
21․ Մեք՝ ա՛կն ունէաք թէ նա՛ է որ փրկելոցն է զԻսրայէլ: Այլ եւ հանդերձ այսո՛ւ ամենայնիւ, այս՝ երրո՛րդ աւր է յորմէ հետէ այն գործեցաւ:
22․ Այլ եւ կանայք ոմանք ի մէնջ զարմացուցին զմեզ. Որք կանխեալ ընդ առաւաւտս չոգա՛ն ի գերեզմանն,
23․ եւ ո՛չ գտին զմարմինն նորա. եկին եւ ասեն, թէ եւ տեսի՛լ եւս հրեշտակաց տեսին, որք ասէին զնմանէ թէ կենդանի է:
24․ Եւ գնացին ոմանք ի մէնջ ի գերեզմանն, եւ գտին նո՛յնպէս՝ որպէս կանայքն ասացին. բայց զնա ո՛չ տեսին
25․ Եւ նա՝ ասէ ցնոսա. Ո՞վ անմիտք եւ հեղգասիրտք ի հաւատալ: Յամենայնի, զոր խաւսեցան մարգարէքն.
26․ ո՞չ զնոյնս պա՛րտ էր չարչարել Քրիստոսի, եւ մտանել ի փառս իւր:
27․ Եւ սկսեալ ի Մովսիսէ եւ յամենայն մարգարէիցն, մեկնէ՛ր նոցա՝ որ ինչ յամենայն գիրս գրեալ է զնմանէ:
28․ Իբրեւ մերձեցա՛ն ի գեղն յոր երթային, եւ նա պատճառէր՝ հեռագո՛յն եւս ուրեք երթալ:
29․ Եւ բռնադատեցին զնա՝ եւ ասեն. Առ մե՛զ ագիր, զի ընդ երե՛կս է, եւ տարաժամեա՛լ է աւրս: Եւ եմո՛ւտ՝ ագանե՛լ անդ ընդ նոսա:
30․ Եւ եղեւ ի բազմելն նորա ընդ նոսա, առեալ զհացն՝ աւրհնեա՛ց, եբեկ՝ եւ ե՛տ նոցա:
31․ Եւ նոցա՝ բացա՛ն աչք, եւ ծանեա՛ն զնա. եւ նա՝ եղեւ ի նոցանէ աներեւո՛յթ:
32․ Եւ ասեն ցմիմեանս. Ո՞չ իսկ եւ սիրտք մեր ճմլէին ի մեզ, մինչ խաւսէրն ընդ մեզ զճանապարհայն. եւ ո՛րպէս բանայր մեզ զգիրս:
33․ Եւ յարուցեալ նոյնժամայն՝ դարձա՛ն յԵրուսաղէմ, եւ գտին ժողովեա՛լ զմետասանսն՝ եւ զորս ընդ նոսայն էին,
34․ եւ ասեն՝ թէ արդարեւ յարեա՛ւ Տէր՝ եւ երեւեցա՛ւ Սիմովնի:
35․ Եւ նոքա պատմէի՛ն զայն որ առ ճանապարհայնն, եւ թէ զիա՛րդ ետ ծանաւթս նոցա ի բեկանել հացին:
36․ Մինչդեռ զայն խաւսէին, ի՛նքն իսկ Յիսուս եկաց ի մէջ նոցա՝ եւ ասէ ցնոսա. Խաղաղութի՛ւն ընդ ե՛ս եմ՝ մի՛ երկնչիք:
37․ Եւ զահի հարեալ՝ երկնչէին. եւ համարէին ոգի՛ ինչ տեսանել:
38․ Եւ ասէ ցնոսա. Զի՞ խռովեալ էք, եւ ընդէ՞ր խորհուրդք ելանեն ի սիրտս ձեր:
39․ Տեսէ՛ք զձեռս իմ եւ զոտս, զի ես՝ նո՛յն եմ. շաւշափեցէ՛ք զիս՝ եւ տեսէ՛ք. զի ոգի՝ մարմին եւ ոսկերս ո՛չ ունի, որպէս զիսս տեսանէք զի ունիմ:
40․ Եւ զայս ասացեալ՝ եցոյց նոցա զձեռսն եւ զոտս: ՁԴ
41․ Եւ մինչդեռ տակաւին չհաւատային ի խնդութենէն, եւ զարմացեալ էին, ասէ ցնոսա. Ունի՞ք ինչ կերակուր աստ:
42․ Եւ նոքա ետուն նմա ձկան խորովելոյ մասն. եւ խորի՛սխ մեղու:
43․ Եւ առ՝ եկե՛ր առաջի նոցա, եւ զմնացորդսն ե՛տ ցնոսա:
44․ Եւ ասէ ցնոսա. Ա՛յս բանք են զոր խաւսեցայ ընդ ձեզ, մինչ առ ձեզն էի, թէ պա՛րտ է՝ լնո՛ւլ ամենայն գրելոցն յաւրէնսն Մովսիսի, եւ ի մարգարէս, եւ ի սաղմոսն վասն իմ:
45․ Յայնժամ եբաց զմիտս նոցա՝ իմանալ զգիրս:
46․ Եւ ասէ ցնոսա, ա՛յսպէս պա՛րտ էր չարչարել Քրիստոսի, եւ յառնել ի մեռելոց յաւուր երրորդի.
47․ եւ քարոզել յանուն նորա ապաշխարութիւն եւ թողութիւն մեղաց յամենայն ազգս՝ սկսեալ յԵրուսաղեմէ.
48․ եւ դո՛ւք էք վկայք այսոցիկ:
49․ Եւ ահա ես առաքե՛մ զաւետիս հաւր իմոյ ի եւ դուք՝ նստարո՛ւք ի քաղաքիս յԵրուսաղէմ, մինչեւ զգենուցո՛ւք զաւրութիւն ի բարձանց:
50․ Եհա՛ն զնոսա՝ մինչեւ ի Բեթանիա. եւ ամբարձեալ զձեռս իւր աւրհնեա՛ց զնոսա:
51․ Եւ եղեւ յաւրհնելն նորա զնոսա, մեկնեցաւ ի նոցանէ, եւ վերանա՛յր յերկինս:
52․ Եւ նոցա երկի՛ր պագեալ նմա՝ դարձա՛ն յԵրուսաղէմ ուրախութեամբ մեծաւ:
53․ Եւ էին հանապա՛զ ի տաճարին, գովէին եւ աւրհնէի՛ն զԱստուած:
Հաղորդում կայքում սխալի վերաբերյալ
Տվյալ հատվածում առկա է սխալ: