Գլուխ 24

   
1․ Ահաւադիկ Տէր ապականեսցէ զտիեզերս. եւ աւերեսցէ զնա, եւ տապալեսցէ զատակս նորա. եւ ցրուեսցէ զբնակեալսն ի նմա:

2․ Եւ եղիցի ժողովուրդն իբրեւ զքահանայն, եւ ծառայն իբրեւ զտէրն, եւ աղախինն իբրեւ զտիկինն: եւ եղիցի գնաւղն իբրեւ զվաճառականն, եւ փոխատուն իբրեւ զփոխառուն, եւ պարտապանն իբրեւ զպարտատէրն:

3․ Ապականելով ապականեսցի երկիր¡, եւ յափշտակութեամբ յափշտակեսցի երկիր. զի բերան Տեառն խաւսեցաւ զայս:

4․ Սուգ առ` կործանեցաւ երկիր¡. կործանեցան եւ ապականեցան տիեզերք: սուգ առին բարձունք երկրի:

5․ Քանզի երկիր անաւրինեցաւ բնակչաւք իւրովք. վասն զի անցին զաւրինաւքն Տեառն, եւ կոխեցին զհրամանս նորա¡, եւ ցրեցին զուխտն յաւիտենից:

6․ Վասն այսորիկ նզովք կերիցեն զերկիր. զի մեղան բնակիչք նորա: վասն այսորիկ տնանկք եղիցին բնակիչք նորա, եւ մնասցեն մարդք սակաւաւորք:

7․ Սուգ առցէ գինի, սուգ առցէ այգի. յոգոց հանցեն ամենայն խրախճանք յանձինս իւրեանց:

8․ Լռեցին ուրախութիւնք թմբկաց, լռեցին հպարտութիւնք եւ մեծութիւնք ամպարշտաց. լռեցին ձայնք քնարաց:

9․ յամաւթ եղեն եւ ոչ ըմպէին գինի. դառնացաւ ցքի ըմպելեաց:

10․ Աւերեցան ամենայն քաղաքք. դրունք ապարանից կարկեցան, զի ոչ ոք էր որ մտանէր:

11․ Ողբացէք ի վերայ գինւոյ ընդ ամենայն տեղիս. լռեաց ամենայն ուրախութիւն. պարտեցաւ ուրախութիւն երկրի:

12․ լքցին քաղաքք աւերակք, եւ ապարանք մնացեալք կորիցեն:

13․ Այս ամենայն եղիցի յերկրի ի մէջ հեթանոսաց: Զոր աւրինակ եթէ ճռաքաղ ոք առնիցէ զձիթենի, այնպէս ճռաքաղ առնիցեն զնոսա. եւ եթէ դադարեսցեն կութք,

14․ նոքա մեծաձայն աղաղակեսցեն: Բայց մնացեալքն յերկրի` ուրախ լինիցին միանգամայն փառաւքն Տեառն, եւ խռովեսցին ջուրք ծովու:

15․ Վասն այսորիկ փառք Տեառն ի կղզիս ծովու, եւ անուն Տեառն փառաւոր եղիցի: Տէր Աստուած Իսրայէլի.
16. ի ծագաց երկրի արուեստս լուաք. յոյս բարեպաշտին, եւ ասիցեն  խորհուրդ իմ ինձ. խորհուրդ իմ ինձ եւ իմոցն: վայ արհամարհողաց որ արհամարհեն, եւ արհամարհանաւք արհամարհիցեն զաւրէնս:

17․ Ահ, գուբ, եւ որոգայթ ի վերայ ձեր բնակիչք երկրի:

18․ Եւ եղիցի որ փախիցէ յահէ անտի` անկցի ի գուբն. եւ որ ելանիցէ ի գբոյն, ըմբռնեսցի յորոգայթն: Զի պատուհանք բացան յերկնից, շարժեսցին հիմունք երկրի:

19․ Խռովութեամբ խռովեսցի երկիր, եւ տարակուսելով տարակուսեսցի երկիր. խոնարհեցաւ:

20․ Շարժելով շարժեսցի երկիր, իբրեւ զտաղաւար մրգապահաց. իբրեւ զարբեալն եւ զսխալակ, գլորեսցի եւ մի կարասցէ կանգնել. զի սաստկացաւ ի վերայ նորա անաւրէնութիւն:

21․ Եւ եղիցի յաւուր յայնմիկ, ածցէ Աստուած ի վերայ զարդուն երկնից զձեռն իւր. եւ ի վերայ թագաւորաց երկրի` որ ի վերայ երկրի:

22․ Եւ ժողովեսցեն զժողովս նորա ի կապանս, եւ պաշարեսցեն յամուրս. եւ յետ բազում ազգաց այցելութիւն
եղիցի նոցա:

23․ Եւ հալեսցի աղիւսն, եւ կործանեսցի պարիսպն. զի թագաւորեսցէ Տէր ի լերին Սիովնի եւ յԵրուսաղէմ, եւ առաջի ծերոց փառաւորեսցի: