1. Եւ բղխեսցէ գաւազան յարմատոյն յԵսսեա. եւ ելցէ ծաղիկ յարմատոյ անտի:
2. Եւ հանգիցէ ի վերայ նորա հոգի Աստուծոյ. հոգի իմաստութեան եւ հանճարոյ. հոգի խորհրդոյ եւ զաւրութեան. հոգի գիտութեան եւ աստուածպաշտութեան:
3. եւ լցցէ զնա հոգի երկիւղի Աստուծոյ: Ոչ ի կարծ դատեսցի, եւ ոչ ըստ խաւսից յանդիմանեսցէ:
4. Այլ արասցէ իրաւունս տնանկին, եւ յանդիմանեսցէ զխոնարհս երկրի: եւ հարցէ զերկիր բանիւ բերանոյ իւրոյ. եւ հոգւով շրթանց իւրոց սատակեսցէ զամպարիշտս:
5. Եւ եղիցի արդարութիւն ածեալ ընդ մէջ իւր, եւ ճշմարտութեամբ պատեալ զկողս իւր:
6. Եւ ճարակեսցէ գայլ ընդ գառին. եւ ինծ` առ ուլու մակաղեսցի. եւ որթ, եւ ցուլ, եւ առեւծ` ի միասին ճարակեսցին: եւ մանուկ մատաղ` ածցէ զնոսա:
7. Եզն եւ արջ ի միասին ճարակեսցին. եւ որդեակք նոցա խառն շրջեսցին: եւ առեւծ իբրեւ զեզն յարդ կերիցէ:
8. Եւ մանուկ մատաղ ի ծակ իժից եւ ի բոյն կորեանց իժից արկցէ զձեռն իւր.
9. եւ ոչ մեղիցեն, եւ ոչ կարասցեն հարկանել զոք ի լերին սրբութեան իմոյ. զի լցաւ երկիր ամենայն` գիտութեամբ Տեառն` իբրեւ զջուրս բազումս որ ծածկեն զծովս:
10. Եւ եղիցի յաւուր յայնմիկ արմատն Յեսսեայ, եւ որ կանգնելոցն է` իշխան հեթանոսաց. ի նա հեթանոսք յուսասցին: եւ եղիցի հանգիստ նորա պատուով:
11. Եւ եղիցի յաւուր յայնմիկ, յաւելցէ Տէր ցուցանել զձեռն իւր. նախանձելիս առնել զմնացորդս ժողովրդեան իւրոյ որ մնացեալ իցեն յԱսորեստանեայց` եւ յԵգիպտացւոց` եւ ի Բաբելացւոց` եւ յԵթւովպացւոց` եւ յԵլամացւոց` եւ յելիցն արեւու` եւ յարաբացւոց , եւ ի կղզեաց ծովու:
12. Եւ բարձրացուսցէ նշան ի հեթանոսս, եւ ժողովեսցէ զկորուսեալսն Իսրայէլի. եւ զցրուեալսն Յուդայ ժողովեսցէ ի չորից անկեանց երկրի:
13. Եւ բարձցի նախանձն Եփրեմի. եւ թշնամիքն Յուդայ կորիցեն: Եփրեմ ոչ նախանձեսցի ընդ Յուդայ, եւ Յուդայ` ոչ նախանձեսցի ընդ Եփրեմայ:
14. Եւ թռիցեն նաւք այլազգեաց. եւ առցեն աւար միանգամայն զծովակողմն եւ զարեւելեայսն, եւ զեդովմայեցիսն: արկցեն զձեռս իւրեանց նախ ի Մովաբ. եւ որդիքն Ամովնայ յառաջագոյն հնազանդեսցին:
15. Եւ փլուսցէ Տէր զծովն Եգիպտացւոց. եւ արկցէ զձեռն իւր ի վերայ գետոյն հոգւով սաստկութեամբ, եւ հարցէ զեւթնաձորն. զի համարձակ լիցի գնալ ընդ նա եւ ագելոյն:
16. Եւ եղիցի անց մնացելոց ժողովրդեան իմոյ որ յԵգիպտոս. եւ եղիցի Իսրայէլ որպէս յաւուրսն յորում ել յերկրէն Եգիպտացւոց:
Հաղորդում կայքում սխալի վերաբերյալ
Տվյալ հատվածում առկա է սխալ: