Գլուխ 8

   
1․ Եւ ասէ ցիս Տէր, առ դու քեզ տոմս մի նոր մեծ. եւ գրեսցես ի նմա` գրչաւ առն ճարտարի, արագ արագ զաւար հարկանել` եւ վաղվաղակի զապուռ ժողովել. քանզի հասեալ է:

2․ Եւ վկայս կացուսցես ինձ արս հաւատարիմս, զՈւրիա քահանայ` եւ զԶաքարիա որդի Բարաքեայ:

3․ Եւ մերձեցայ առ կինն իմ մարգարէ, եւ յղացաւ եւ ծնաւ որդի: եւ ասէ ցիս Տէր, կոչեա զանուն նորա արագ արագ կապտեսջիր` եւ վաղվաղակի աւար հարկանիջիր:

4․ քանզի մինչչեւ ծանուցեալ իցէ մանկանն կոչել զհայր կամ զմայր, առցէ զզաւրութիւն Դամասկոսի, եւ զաւար Սամարեայ, յանդիման թագաւորին Ասորեստանեայց:

5․ Եւ յաւել եւս խաւսել ընդ իս Տէր` եւ ասէ.

6․ փոխանակ զի ոչ ախորժեաց ժողովուրդդ այդ զջուրն Սելովայ` որ գնայ խաղաղ.  այլ կամեցան առնել իւրեանց թագաւորս զՌասիմ զորդին Ռոմելա:

7․ Վասն այդորիկ ահաւադիկ ածցէ Տէր ի վերայ ձեր զջուր գետոյն զհզաւրն եւ զյորդ` զարքայն Ասորեստանի եւ զփառս նորա: Եւ եկեսցէ եւ հասցէ յամենայն ձորս ձեր, եւ ճեմեսցի ի վերայ պարսպաց ձերոց:

8․ եւ հանցէ յերկրէդ Հրէաստանէ զայր որ կարաւղ իցէ ամբառնալ զգլուխ իւր, եւ զզաւրաւորն որ կարիցէ գործել ինչ. եւ եղիցի բանակ նորա լնուլ զլայնութիւն երկրիդ քո:

9․ Ընդ մեզ Աստուած` գիտացէք հեթանոսք` եւ պարտեցարուք. լսելի արարէք մինչչեւ ի ծագս երկրի. հզաւրացեալքդ պարտեցարուք: Զի թէպէտ եւ դարձեալ զաւրանայցէք` դարձեալ ի պարտութիւն մատնեսջիք:

10․ Եւ զոր խորհուրդ եւ խորհիցիք` ցրուեսցէ Տէր. եւ զոր բան եւ խաւսիցիք` մի հաստատեսցի առ ձեզ. քանզի ընդ մեզ Տէր Աստուած:

11․ Այսպէս ասէ Տէր առ այնոսիկ որ զաւրութեամբ ձեռին նորա ընդդէմ դառնան ըստ գնացից ճանապարհի ժողովրդեանս այսորիկ. եւ ասեն

12․ թէ ոչ երբէք խաւսիցին խստութիւն: զի ամենայն զոր ինչ խաւսի ժողովուրդդ այդ` խստութիւն է: եւ յերկիւղէ նոցա մի երկնչիցիք, եւ մի խռովիջիք:

13․ ԶՏէր զաւրութեանց զնոյն սուրբ արարէք, եւ նա եղիցի քեզ յերկեւղ: եւ եթէ ի նա յուսացեալ իցես,

14․ եղիցի քեզ ի սրբութիւն: եւ ոտն քո զքարի ոչ հարկանիցի, եւ գայթագղութիւն քեզ ոչ պատահիցէ: Բայց տուն Յակովբու յորոգայթ եւ ի ծործորս դարանակալաց Երուսաղէմի:

15․ Վասն այնորիկ տկարասցին ի նմա բազումք. անկցին եւ խորտակեսցին. եւ մերձեսցին ի պաշարումն ¡ մարդիկ որ ի շինութեան իցեն:

16․ Յայնմ ժամանակի յայտնեսցին որ կնքիցեն զաւրենս, զի մի ոք ուսանիցի,

17․ եւ ասիցէ. կացից մնացից Աստուծոյ որ դարձոյց  զերեսս իւր ի տանէն Յակովբու, եւ եղէց յուսացեալ ի նա:

18․ Ահաւասիկ ես եւ մանկունք իմ զոր ետ ինձ Աստուած. եւ եղիցին նշանք եւ արուեստք ի վերայ տանն Իսրայէլի, ի Սաբաւովթ Տեառնէ` որ բնակեալ է ի լերին Սիովնի:

19․ Եւ եթէ ասիցեն ցձեզ. խնդրեցէք զվհուկս եւ զգետնակոչս եւ զրախաւսս, եւ զորովայնակոչս. ոչ իբրեւ զազգ ոք որ յԱստուծոյ իւրմէ խնդրիցէ: Զի՞նչ խնդրիցեն վասն կենդանեաց ի մեռելոց անտի:

20․ զի զաւրէնս յաւգնականութիւն ետ. զի ասիցեն թէ ոչ իբրեւ զբանս զայս, վասն որոյ չիք կաշառս տալ վասն նորա:

21․ Եւ եկեսցէ ի վերայ ձեր սով խստութեամբ. եւ եղիցի իբրեւ քաղցիցէք` տրտմեսջիք, եւ հայհոյեսջիք զիշխանս եւ զաշխարհ: Եւ ամբարձցեն զաչս իւրեանց յերկինս ի վեր`

22․ եւ հայեսցին յերկիր ի խոնարհ, եւ ահա կարաւտութիւն` եւ տառապանք` եւ խաւար, նեղութիւն եւ անձկութիւն եւ մութ. զի ոչ ոք կարիցէ տեսանել. եւ որ իցէ ի նեղութեանն` մի նուազեսցի մինչչեւ ի ժամանակն: