1. Յայտնի եղէ այնոցիկ որ զինէն ոչ հարցանէին. գտայ այնոցիկ որ զիսն ոչ խնդրէին: ասացի` աւասիկ եմ, ցազգն ցայն, որ զանուն իմ ոչ կարդացին:
2. Զաւր հանապազ ձգեցի զձեռն իմ առ ժողովուրդն անհաւան եւ հակառակաւղ. որ գնային զճանապարհ որ ոչ էր բարւոք, այլ զհետ մեղացն իւրեանց:
3. Ժողովուրդս այս որ բարկացուցանէր զիս. առաջի իմ զաւր հանապազ զոհէին ի պարտէզս իւրեանց, եւ արկանէին խունկս յաղիւսեայս իւրեանց
4. դիւացն որք չէին ի յիշատակս իւրեանց: Եւ յայրս կողմանեալ ննջին վասն երազ տեսանելոյ. որք ուտէին զխոզենին եւ զարգանակ զոհիցն, եւ ամենայն անաւթք նոցա պղծեալ էին:
5. որք ասէին ի բաց կաց յինէն` մի մերձենար յիս զի սուրբ եմ: Այս է ծուխ բարկութեան իմոյ` յորում հուր բորբոքեալ է զամենայն աւուրս:
6. Ահաւասիկ գրեալ է առաջի իմ. ոչ լռեցից` մինչչեւ հատուցից ի ծոցս նոցա
7. զմեղս նոցա. եւ զմեղս հարց նոցա ի միասին` ասէ Տէր: որք արկանէին խունկս ի վերայ լերանց, եւ ի վերայ բլրոց ուր նախատէինն զիս. հատուցից զգործս նոցա յառաջագոյն ի ծոցս նոցա:
8. Այսպէս ասէ Տէր. զոր աւրինակ եթէ գտանիցի ճիռ ի մէջ ողկուզոց, եւ ասիցեն. մի ապականեր զդա զի աւրհնութիւն Տեառն գոյ ի դմա. այնպէս արարից վասն ծառային իմոյ, վասն որոյ ոչ կորուսից զամենեսեան:
9. Եւ հանից զզաւակ Յակովբայ եւ Յուդայ, եւ ժառանգեսցեն զլեառն սրբութեան իմոյ. եւ ժառանգեսցեն ընտրեալք իմ եւ ծառայք իմ. եւ բնակեսցեն ի նմա:
10. Եւ եղիցի յանտառին մակաղատեղք հովուաց, եւ ձորն Աքովրայ հանգիստ անդւոց, ժողովրդեան իմոյ որ խնդրեցինն զիս:
11. Այլ դուք որ թողէք զիս, եւ մոռացարուք զլեառն սրբութեան իմոյ: եւ կազմէիք դիւաց սեղան, եւ խառնէիք խառնելիս բախտից:
12. Ես մատնեցից զձեզ սուր, եւ ամենեքեան կոտորեսջիք: զի կոչեցի զձեզ` եւ ոչ լուարուք. խաւսեցայ` եւ ստունգանեցէք. եւ արարէք չար առաջի իմ. եւ զոր ոչ կամէի` ընտրեցէք:
13. Վասն այսորիկ այսպէս ասէ Տէր. ահաւասիկ որ ծառայենն ինձ կերիցեն, եւ դուք քաղցիջիք. ահաւասիկ որ ծառայենն ինձ արբցեն, եւ դուք ծարաւեսջիք. ահաւասիկ որ ծառայենն ինձ, ուրախ լիցին եւ դուք ամաչեսջիք:
14. ահաւասիկ որ ծառայենն ինձ ցնծասցեն ուրախութեամբ սրտից, եւ դուք աղաղակեսջիք առ ցաւս սրտից ձերոց, եւ առ բեկումն ոգւոց ձերոց ողբասջիք:
15. զի թողջիք զանուն ձեր ի յագուրդ ընտրելոց իմոց, եւ զձեզ Տէր սատակեսցէ: Եւ ծառայիցն իմոց կոչեցից անուն նոր,
16. որ աւրհնեսցի ի վերայ երկրի. զի աւրհնեսցեն զԱստուած ճշմարիտ. եւ որ երդնուցուն ի վերայ երկրի` երդուիցեն յԱստուած ճշմարիտ: զի մոռասցին զնեղութիւնս առաջինս, եւ ոչ եւս անկցի ի սիրտս նոցա:
17. Զի եղիցին երկինք նոր եւ երկիր նոր, եւ ոչ եւս յիշեսցեն զառաջինսն. եւ ոչ եւս անկցի ի սիրտս նոցա:
18. այլ ուրախութիւն եւ ցնծութիւն գտցեն ի նմա, զոր ես հաստատեցից: Զի ահաւասիկ ես առնեմ զԵրուսաղէմ ցնծութիւն, եւ զժողովուրդ իմ ուրախութիւն:
19. եւ ցնծացայց ի վերայ Երուսաղէմի, եւ ուրախ եղէց ի վերայ ժողովրդեան իմոյ: եւ ոչ եւս լուիցի ի նմա ձայն լալոյ` եւ ձայն գուժի:
20. Եւ մի լիցի անդ տարաժամ աւուրց. եւ ծեր` որոյ ոչ իցէ լցեալ զժամանակս իւր: զի եղիցի կրտսեր որդին հարիւրեմեան. եւ որ հարիւրեմեանն մեռանիցի, մեղաւոր եւ անիծեալ կոչեսցի:
21. Շինեսցեն տունս` եւ ինքեանք բնակեսցեն. տնկեսցեն այգիս` եւ ինքեանք կերիցեն զպտուղ նոցա:
22. եւ մի եւս նոքա շինեսցեն` եւ այլք բնակեսցեն, եւ նոքա տնկեսցեն` եւ այլք կերիցեն: Ըստ աւուրց փայտի կենաց եղիցին աւուրք ժողովրդեան իմոյ. գործք ձեռաց նոցա հնասցին:
23. Եւ ընտրեալք իմ մի եւս վաստակեսցեն ընդունայն. եւ ոչ եւս ծնանիցին որդիս յանէծս, զի զաւակ աւրհնեալ են յԱստուածոյ` եւ ծնունդք նոցա ընդ նոսա:
24. Եւ եղիցի մինչչեւ կարդացեալ իցէ նոցա` ես լուայց նոցա. եւ մինչդեռ խաւսեսցին, ասացից` թէ զինչ խնդրէք:
25. Յայնմ ժամանակի գայլք եւ գառինք ի միասին ճարակեսցին, եւ առեւծ` իբրեւ զեզն յարդ կերիցէ, եւ աւձ` զհող իբրեւ զհաց կերիցէ. մի մեղիցեն եւ մի վնասեսցեն ի լերին սրբութեան իմոյ ասէ Տէր:
Հաղորդում կայքում սխալի վերաբերյալ
Տվյալ հատվածում առկա է սխալ: