1. Պատգամ ի վերայ Դամասկոսի: Ահաւասիկ Դամասկոս բարձցի ի քաղաքաց, եւ եղիցի ի կործանումն:
2. լքեալ յաւիտեան. ի մակաղատեղս հաւտից, եւ ի հանգրուանս անդւոց. եւ ոչ ոք իցէ որ հալածիցէ:
3. Եւ ոչ եւս եղիցի ամուր ապաստանի Եփրեմի. եւ ոչ եւս կացցէ թագաւորութիւն ի Դամասկոս, եւ ոչ մնասցեն մնացորդք ասորւոց. զի ոչ դու լաւ ես քան զորդիսն Իսրայէլի եւ զփառս նոցա: Այսպէս ասէ Տէր զաւրութեանց.
4. եղիցի յաւուր յայնմիկ պակասութիւն փառացն Յակովբայ, եւ յաճախութիւն փառաց նորա շարժեսցի:
5. Եւ եղիցի որպէս ոք զի ժողովէ որայ կանգուն ի գիրկս իւր, եւ շրջիցի հասկաքաղ զկնի նորա: եւ եղիցի որպէս քաղիցէ ոք հասկ ի ձորն հաստատութեան.
6. եւ մնասցէ ի նմա խոզան: եւ կամ իբրեւ զպտուղս ձիթենւոյ երկուս կամ երիս ի բարձրութեան ծայրիցն, կամ չորք կամ հինգ յոստսն մնայցեն: Այսպէս ասէ Տէր Աստուած Իսրայէլի.
7. յաւուր յայնմիկ յուսացեալ եղիցի մարդն յարարիչ իւր. եւ աչք նորա ի սուրբն Իսրայէլի հայեսցին:
8. Եւ մի եւս յուսացեալ եղիցին ի մեհեանս, եւ մի ի գործս ձեռաց իւրեանց զոր արարին մատունք նոցա: այլ եղիցին յուսացեալ ի սուրբն Իսրայէլի. եւ ոչ եւս հայեսցին յանտառս իւրեանց, եւ ոչ ի գարշելիսն իւրեանց:
9. Յաւուր յայնմիկ եղիցին քաղաքք քո լքեալք. զոր աւրինակ լքան ամուրհացիքն եւ խեւացիքն յերեսաց որդւոցն Իսրայէլի, եւ եղիցին աւերակք.
10. փոխանակ զի թողեր զԱստուած զփրկիչ քո, եւ զՏէր զաւգնական քո ոչ յիշեցեր: վասն այսորիկ տնկեսցես տունկ անհաւատ, եւ սերմն անհաւատ:
11. յաւուր յորում տնկեսեցես, վրիպեսցիս: Ընդ առաւաւտս եթէ սերմանեսցես, ծաղկեսցէ յամառն: յաւուր յորում ժառանգեցուսցես` որպէս հայր զի թողուցու զժառանգութիւն որդւոց իւրոց:
12. Վայ բազմութեան ազգաց բազմաց. իբրեւ զծով ալեաւք կուտակեալ այնպէս խռովեսջիք. եւ մկանունք ազգաց բազմաց իբրեւ զջուր գոչեսցեն:
13. Իբրեւ զջուրս բազումս ազգք բազումք. իբրեւ ջուրց բազմաց բռնութիւն հոսանաց. եւ վտտեսցէ զնոսա, եւ բացուստ ի բաց հալածեսցէ: Իբրեւ զունդ յարդի հոսեալ յերեսաց հողմոյ, եւ իբրեւ զփոշի անուոյ ի փոթորկէ մրրկեալ:
14. Ընդ երեկոյս սուգ առցեն. յառաջ քան զառաւաւտն` եւ այլ ոչ եւս իցեն: այս է բաժին աւարառուացն ձերոց, եւ ժառանգութիւն որ զձեզն ժառանգէին:
Հաղորդում կայքում սխալի վերաբերյալ
Տվյալ հատվածում առկա է սխալ: