Գլուխ 28

   
1․ Վայ ի պսակդ հպարտութեան վարձկանացդ Եփրեմի: ծաղիկ թաւթափեալ ի փառաց ի վերայ գլխոյ լերինդ թանձրացելոյ, որ արբեալդ էք եւ ոչ ի գինւոյ:

2․ Ահաւասիկ սաստիկ եւ խիստ բարկութիւն Տեառն, իբրեւ զկարկուտ իջեալ` եւ ոչ գուցէ յարկ: եւ իբրեւ զբռնութիւն հեղեղաց ջուրց բազմաց որ ողողէ զերկիր. եւ արասցէ հանգիստ երկրի ձեռաւք:

3․ Եւ կոխան լիցի պսակն հպարտութեան վարձկանացդ Եփրեմի:

4․ եւ եղիցի ծաղիկն յուսոյ թաւթափեալ ի փառաց անտի` ի վերայ գլխոյ լերինն բարձու, իբրեւ զվաղահասուկն թզոյ. զոր տեսեալ ուրուք մինչչեւ ի ձեռն առեալ կամիցի կլանել:

5․ Յաւուր յայնմիկ եղիցի Տէր զաւրութեանց` պսակ յուսոյ գործեալ ի փառս մնացելոց ժողովրդեանն,

6․ զի մնասցեն ոգւով դատաստանի. եւ դատաստանաւ եւ զաւրութեամբ արգելուցու ի ծուլութենէ:

7․ Զի նոքա գինւով մոլորեալ են, մոլորեցան վասն ցքւոյն. քահանայն եւ մարգարէ յիմարեցան վասն ցքւոյ, ընկղմեցան վասն գինւոյ. դանդաչեցին յարբեցութենէ ցքոյն. մոլորեցան` զի այն ինքն է յիմարութիւն:

8․ Նզովք կերիցեն զխորհուրդն զայն. զի այն խորհուրդ ի յագահութենէ է:

9․ Ո՞ւմ պատմեսցուք զչարիսն, ո՞ւմ գոյժ տացուք. անջատելո՞ցն ի կաթանէ, հատուցելո՞ցն ի ստենէ:

10․ նեղութիւնք ի վերայ նեղութեանց: ընկալ, ընկալ կասկածանս ի վերայ կասկածանաց: Փոքր մեւս եւս. փոքր մեւս եւս վասն անզգամութեան շրթանց,

11․ յաւտար լեզուս խաւսիցին ընդ ժողովրդեանդ ընդ այդմիկ.

12․ եւ ասիցեն ցդոսա. թէ այն է հանգիստ քաղցելոյն, եւ սոյն բեկումն. եւ ոչ կամեցան լսել:

13․ Եւ եղիցի նոցա բանն Տեառն` նեղութիւնք ի վերայ նեղութեանց: ընկալ, ընկալ կասկածանս ի վերայ կասկածանաց:  Փոքր մեւս եւս. փոքր մեւս եւս` մինչ գնասցեն, եւ յետս ընդդէմ կործանեսցին. եւ խորտակեսցին եւ չարչարեսցին եւ սատակեսցին:

14․ Վասն այսորիկ լուարուք զբան Տեառն արք նեղեալք, իշխանք ժողովրդեանդ այդորիկ յԵրուսաղէմ:

15․ Զի ասացէք` եդաք ուխտ ընդ դժոխս, եւ ընդ մահու դաշինս կռեցաք. մրրիկ փոթորկեալ եթէ յարիցէ` ոչ եկեսցէ ի վերայ մեր. զի եդաք սուտ զյոյսն մեր, եւ ստութեամբ ծածկեսցուք:

16․ Վասն այնորիկ այսպէս ասէ Տէր Տէր: Ահաւասիկ ես դնեմ ի հիմունս Սիովնի վէմ բազմապատիկ, զընտիր, զգլուխ անկեան, զպատուականն ի հիմունս նորա. եւ որ հաւատասցէ ի նա` մի ամաչեսցէ:

17․ Եւ եդից զիրաւունս ի յոյս, եւ զողորմութիւն իմ ի կշիռս. եւ ոյք յուսացեալ իցեն զուր ի ստութիւն, թէ ոչ հասցէ առ մեզ մրրիկն.

18․ եւ ոչ բարձցէ զուխտն մեր` որ ընդ մահուն է: Յոյսն ձեր որ ի դժոխս է մի հաստատեսցի. զի մրրիկ փոթորկեալ եթէ գայցէ ի վերայ, եղիջիք նմա ի կոխումն:

19․ Զի յորժամ անցանիցէ` առցէ զձեզ. յառաւաւտէ յառաւաւտ անցցէ, ի տուէ եւ ի գիշերի եղիցի կասկած չարեաց: Ուսարուք լսել նեղեալքդ:

20․ մարտնչել եւս ոչ  կարեմք. քանզի տկարացաք ի ժողովելն մերում

21․ իբրեւ զլեառն ամպարշտաց: Յարիցէ Տէր իբրեւ ի ձորն գաբաւոնացւոց լի բարկութեամբ. գործիցէ զգործ իւր գործ դառնութեան: զի սրտմտութիւն նորա աւտարաբար դատեսցի, եւ դառնութիւն նորա աւտարաբար հասցէ:

22․ Եւ դուք մի ցնծայք, եւ մի զաւրասցին կապանք ձեր. զի իրս հաստատեալս եւ համառաւտս լուայ ի Տեառնէ: Տէր զաւրութեանց զոր առնելոց է ի վերայ ամենայն երկրի:

23․ Ունկն դիք եւ լուարուք բարբառոյ իմոյ. անսացէք եւ լուարուք բանից իմոց:

24․ միթէ զաւրն ամենա՞յն հերկիցէ որ հերկէն, կամ թէ սերմն յառաջագոյն ցանիցէ՞, մինչչեւ զերկիրն գործեալ իցէ:

25․ Ո՞չ ապաքէն նախ կակղէ զերեսս նորա` եւ ապա սերմանէ փոքր մի արջնդեղ եւ չաման. եւ ապա սերմանեսցէ ցորեան եւ գարի` կորեակ եւ հաճար ի սահմանս իւր:

26․ Եւ խրատեսցիս դու իրաւամբք Աստուծոյ քոյ, եւ ուրախ եղիցես:

27․ զի ոչ եթէ խստիւ ինչ սրբի արջնդեղն, եւ ոչ զանիւ կամնասայլին ածեն ի վերայ չամանոյն. այլ գաւազանաւ թափի արջնդեղն,

28․ եւ չամանն հացիւ ուտի: Զի ոչ եթէ յաւիտեան բարկանայցեմ ձեզ, եւ ոչ ձայն դառնութեան իմոյ կոխիցէ զձեզ:

29․ Եւ այս նշանք ելին ի Սաբաւովթ Տեառնէ: արդ խորհեցարուք` բարձէք ի ձէնջ զընդունայն մխիթարութիւնն ձեր: