1. Լուարուք ինձ կղզիք, եւ ունկն դիք հեթանոսք: յետ բազում ժամանակաց հաստատեսցի այդ ասէ Տէր: Յարգանդէ կոչեաց զիս, եւ յորովայնէ մաւր իմոյ կարդաց զանուն իմ:
2. եդ զբերան իմ իբրեւ զսուսեր սուր, եւ ընդ հովանեաւ ձեռին իւրոյ թաքոյց զիս: եւ եդ զիս իբրեւ զնետ մի ընտիր, եւ ի կապարճս իւր թաքոյց զիս:
3. եւ ասէ ցիս. ծառայ իմ ես դու Իսրայէլ, եւ ի քեզ փառաւորեցայց:
4. Եւ ասեմ, զուր ուրեմն վաստակէի տարապարտուց, յոչինչ ետու զզաւրութիւն իմ: վասն այսորիկ իրաւունք իմ ի Տեառնէ, եւ վաստակ իմ առաջի Աստուծոյ իմոյ:
5. Եւ արդ` այսպէս ասէ Տէր որ ստեղծ զիս յորովայնէ ծառայ իւր, ժողովել զՅակովբ եւ զԻսրայէլ առ ինքն. եւ ժողովեցայց եւ փառաւորեցայց առաջի Տեառն, եւ Աստուած իմ է ինձ զաւրութիւն:
6. Եւ ասէ ցիս. մեծ է քեզ այդ, կոչել զքեզ ծառայ իմ. հաստատել զազգսն Յակովբայ` եւ զցրուեալսն Իսրայէլի դարձուցանել: Ահաւասիկ եդի զքեզ յուխտ ազգի եւ ի լոյս հեթանոսաց, լինել փրկութիւն մինչչեւ ի ծագս երկրի:
7. Այսպէս ասէ Տէր որ փրկեացն զքեզ Աստուած Իսրայէլի. սրբեցէք զայն որ խոտէն զանձն իւր, զաղարտեալն յազգաց ի ծառայիցն իշխանաց: թագաւորք տեսցեն զնա` եւ յոտն կացցեն. իշխանք` եւ երկիր պագցեն նմա վասն Տեառն. զի հաւատարիմ է սուրբն Իսրայէլի` եւ որ ընտրեաց զքեզ:
8. Այսպէս ասէ Տէր ցԻսրայէլ ի ժամանակի ընդունելութեան լուայ քեզ, եւ յաւուր փրկութեան աւգնեցի քեզ, եւ ստեղծի զքեզ, եւ ետու զքեզ յուխտ հեթանոսաց հաստատել զերկիր, եւ ժառանգեցուցանել զժառանգութիւնս աւերակ:
9. ասել կապելոց` թէ ելէք, եւ որ ի խաւարին իցեն` թէ յայտնեցարուք: Յամենայն ճանապարհս արածեսցին, եւ յամենայն շաւիղս ճարակք նոցա:
10. ոչ քաղցիցեն եւ ոչ ծարաւեսցին, եւ ոչ խորշակահար լիցին յարեւու. այլ որ ողորմելոցն է մխիթարեսցէ զնոսա, եւ ընդ աղբիւրակունս ածցէ զնոսա:
11. եւ եդից զամենայն լերինս ի ճանապարհ, եւ զամենայն շաւիղս յարաւտս նոցա:
12. Ահաւասիկ ոմանք եկեսցեն ի հեռաստանէ, ոմանք ի հիւսւսոյ եւ ի ծովէ, եւ ոմանք յերկրէ պարսից:
13. Ուրախ լերուք երկինք` եւ ցնծասցէ երկիր. գոչեսցեն լերինք զցնծութիւն, եւ բլուրք զարդարութիւն. զի ողորմեցաւ Աստուած ժողովրդեան իւրում, եւ զխոնարհս ժողովրդեան իւրոյ մխիթարեաց:
14. Բայց Սիովն ասաց. եթող զիս Տէր եւ մոռացաւ զիս Աստուած:
15. Միթէ մոռանայցէ՞ կին զմանուկ իւր, կամ ո՞չ գթասցի ի ծնունդս որովայնի իւրոյ: եւ եթէ մոռանայցէ զայն կին` սակայն ես ոչ մոռացայց զքեզ ասէ Տէր:
16. Ահաւասիկ ի վերայ ձեռաց իմոց նկարեցի զպարիսպ քո. եւ առաջի իմ ես դու յամենայն ժամ:
17. եւ արագ շինեսջիր յայնցանէ որ քակեցին զքեզ, եւ որ աւերեցինն զքեզ` ի քէն ի բաց մերժեսցին:
18. Ամբարձ շուրջ զքեւ զաչս քո, եւ տես զամենեսին. զի ահաւասիկ ժողովեցան եւ եկին առ քեզ: կենդանի եմ ես ասէ Տէր. զի զամենեսին զնոսա իբրեւ զպատմուճան զգեցցիս, եւ արկցես զնոսա զքեւ իբրեւ զզարդ հարսին:
19. Զի աւերակքն եւ ապականեալքն` եւ կործանեալքն քո, արդ նեղեսցին ի բնակչացն իւրեանց: եւ հեռասցին ի քէն` որ կլանէինն զքեզ:
20. Զի ասասցեն յականջս քո որդիքն քո զորս կորուսեր. նեղ է մեզ տեղիս, ընդարձակեա մեզ զի բնակեսցուք:
21. Եւ ասասցես ի սրտի քում. ո՞ ծնաւ ինձ զսոսա. զի ես անզաւակ եւ այրի էի , պանդուխտ եւ արգելական. եւ զսոսա ինձ ո՞ սնոյց, զի ես միայն մնացեալ էի, եւ սոքա ու՞ր էին:
22. Այսպէս ասէ Տէր Տէր. ահաւադիկ ամբարձից զձեռս իմ ի վերայ ազգաց, եւ ի կղզիս կանգնեցից զնշան իմ, եւ ածցեն զորդիս քո ի ծոցս իւրեանց, եւ զդստերս քո ի վերայ ուսոց իւրեանց բարձեալ բերիցեն:
23. Եւ եղիցին թագաւորք դայեակք քո, եւ կանայք նոցա մանկակալք քո. ի վերայ երեսաց երկրի երկիր պագանիցեն քեզ, եւ զհող ոտից քոց լիզեսցեն. եւ ծանիցես թէ ես եմ Տէր. եւ ոչ ամաչեսցեն ոյք սպասեն ինձ:
24. Միթէ հանիցէ՞ ոք զկողոպտած սկայի. կամ վարիցէ՞ ոք տարապարտուց գերի` եւ ապրիցի՞:
25. Այսպէս ասէ Տէր. եթէ ոք վարիցէ զսկայ գերի, առցէ զաւար նորա. եւ քաջ ապրէ` որ առնուցու զաւար սկայի: Այլ ես զդատաստան իմ դատեցայց, եւ զորդիս իմ փրկեցից:
26. եւ կերիցեն նեղիչք քո զմարմինս իւրեանց, եւ արբցեն իբրեւ զգինի նոր զարիւնս իւրեանց` եւ արբեսցին. եւ ծանիցէ ամենայն մարմին եթէ ես եմ Տէր` որ փրկեցի զքեզ, եւ աւգնեցի քեզ եւ զաւրացուցի զՅակովբ:
Հաղորդում կայքում սխալի վերաբերյալ
Տվյալ հատվածում առկա է սխալ: