Գլուխ 3

   
1․ Ահաւասիկ Տէր Տէր զաւրութեանց բարձցէ ի Հրէաստանէ եւ յԵրուսաղէմէ զայր հզաւր` եւ զկին զաւրաւոր, զզաւրութիւն հացի, եւ զզաւրութիւն ջրոյ:

2․ զհսկայն եւ զզաւրաւորն, եւ զայր պատերազմաւղ, եւ զդատաւոր, եւ զմարգարէ, եւ զքննիչ, եւ զծեր.

3․ եւ զյիսնապետ, եւ զսքանչելի խորհրդական, եւ զիմաստուն ճարտարապետ, եւ զհանճարեղն զունկնդիր:

4․ Եւ կացուցից ի վերայ նոցա մանկունս իշխանս. եւ խաբեբայք տիրեսցեն նոցա:

5․ Եւ անկցի ժողովուրդն` այր ընդ այր, եւ այր ընդ ընկերի իւրում: ընդ հարցի մանուկն ընդ ծերոյն, եւ անարգն ընդ պատուականին:

6․ Զի բուռն հարկանիցէ այր զեղբաւրէ իւրմէ, կամ զընտանւոյ հաւր իւրոյ, եւ ասիցէ. հանդերձք գոն քո, լեր մեր իշխան. եւ կերակուր մեր ընդ քեզ լիցի:

7․ Տացէ պատասխանի յաւուր յայնմիկ` եւ ասասցէ. ոչ եղէց իշխան, զի ոչ գոյ ի տան իմում հաց` եւ ոչ հանդերձ. եւ ոչ եղէց իշխան ժողովրդեանս այսմիկ:

8․ Զի լքաւ Երուսաղէմ, եւ Հրէաստան կործանեցաւ. եւ լեզուք նոցա անաւրէնութեամբ ի Տեառնէ ապստամբեցին:

9․ Վասն որոյ խոնարհեցան փառք նոցա, եւ ամաւթ երեսաց նոցա ծածկեաց զնոսա. զի զամպ փառաց նորա թշնամանեցին. եւ զմեղս իւրեանց իբրեւ զսոդոմացւոցն պատմեցին եւ յայտ արարին: Վա՞յ անձանց նոցա զի խորհեցան խորհուրդ չար առանձինն`

10․ եւ ասեն. կապեսցուք զարդարն` զի դժպհի եղեւ մեզ: Այսուհետեւ զարդիւնս գործոց իւրեանց կերիցեն:

11․ Վայ անաւրինին: չարիք ըստ գործոց ձեռաց իւրոց անցցեն ընդ նա:

12․ Ժողովուրդ իմ` հարկահանք ձեր ճռաքաղ առնեն զձեզ, եւ պահանջաւղք տիրեն ձեզ: ժողովուրդ իմ որ երանենդ ձեզ` խաբեն զձեզ, եւ զշաւիղս ոստից ձերոց խռովեցուցանեն:

13․ Այլ արդ հասցէ Տէր ի դատաստան, եւ կացուսցէ յայտնի զժողովուրդ իւր.

14․ ինքնին Տէր ի դատ եկեսցէ ընդ ծերս ժողովրդեան իւրոյ` եւ ընդ իշխանս նոցա: դուք զի՞ հրկէզ արարէք զայգի իմ. եւ յափշտակութիւն տնանկին է ի տունս ձեր:

15․ դուք զի՞ զրկէք զժողովուրդ իմ, եւ զերեսս տնանկաց լի առնէք ամաւթով, ասէ Տէր Տէր զաւրութեանց:

16․ Այսպէս ասէ Տէր: փոխանակ զի հպարտացան դստերք Սիովնի, եւ գնացին ի բարձր պարանոց. յաւնիւքն ակնարկէին, եւ ի գնացս իւրեանց քարշէին զստորոտս իւրեանց, եւ ոտիւքն կաքաւէին:

17․ Եւ խոնարհեցուսցէ Աստուած զիշխանս դստեր Սիոնի, եւ մերկասցէ Տէր զզարդ նոցա

18․ յաւուր յայնմիկ: եւ հանցէ Տէր զփառս հանդերձից նոցա, եւ զպատմուճանս նոցա.

19․ եւ զհեւսս, զծամակալս, եւ զպսակակալս,

20․ եւ զմահիկս, եւ զզարդ երեսաց նոցա, եւ զպատճուճանս զարդու փառաց նոցա, եւ զքաւղէս, եւ զապարանջանս, եւ զմեհեւանդս, եւ զգինդս.

21․ եւ զմատանիս, եւ զկշտապանակս նոցա, զդիպակս, եւ զճեղանակս:

22․ Զեզրածիրանին, եւ զմիջնածիրանին, զառտնին արկանելի, եւ զերեւելի լակոնացին:

23․ զբեհեզն, եւ զերկնագոյն, եւ զկարմիր շղաշատեռն, եւ զճամկաւորն, եւ զոսկեճամուկն, եւ զոսկէտտունն:

24․ Եւ եղիցի փոխանակ հոտոցն անուշից` փոշի. եւ փոխանակ կամարացն` չուան գաւտի. եւ փոխանակ ոսկեզարդու գլխոյն կնդութիւն` վասն գործոց քոց. եւ փոխանակ ոսկեհուռ դիպակին` քուրձ զգեցցիս:

25․ Եւ որդիդ քո սիրելի զոր սիրես` սրով մեռցի. եւ իշխանք ձեր սրով անկցին:

26․ եւ թշուառասցին, եւ սուգ զգեցցին սապատք զարդուց ձերոց: եւ մնասջիր միայն, եւ յերկիր կործանեսջիր: