1․ Բայց արդ լուր Յակովբ ծառայ իմ, եւ Իսրայէլ զոր ընտրեցիդ:
2․ Այսպէս ասէ Տէր Աստուած որ արար զքեզ, եւ որ ստեղծ զքեզ յորովայնէ, եւ տակաւին աւգնականութիւն գտցես: Մի երկնչիր ծառայ իմ Յակոբ` եւ սիրեցեալդ իմ Իսրայէլ զոր ընտրեցի:
3․ զի ես տաց ջուր ի ծարաւ` որոց գնան յանջրդւոջ. եդից զոգի իմ ի վերայ զաւակի քո` եւ զաւրհնութիւնս իմ ի վերայ որդւոց քոց:
4․ Եւ զուարճասցին իբրեւ զխոտ ջրարբի,եւ որպէս զուռ ի մէջ ջրոց գնացից:
5․ Մին ասասցէ` Աստուծոյ եմ ես. եւ մեւսն խրախոյս բարձցէ յանուն Աստուծոյ Յակովբայ. եւ մեւսն գիր հանցէ ձեռամբ իւրով` թէ Աստուծոյ եմ ես, եւ յանուն Իսրայէլի խրախոյս բարձցէ:
6․ Այսպէս ասէ Աստուած թագաւորն Իսրայէլի, եւ որ փրկեացն զնա Աստուած զաւրութեանց. ես առաջին` եւ ես առ յապայ. բաց յինէն այլ ոչ գոյ Աստուած:
7․ Ո՞վ է իբրեւ զիս, յառաջ կացցէ, ձայն տացէ. պատմեսցէ եւ պատրաստեսցի ինձ` յորմէ հետէ արարի զմարդն յաւիտեան. եւ որ ինչ գալոցն իցէ, մինչչեւ եկեալ իցէ պատմեսցեն ձեզ:
8․ Մի զարմանայք եւ մի պատկառէք. ոչ ապաքէն ի սկզբանէ՞ լուարուք` եւ պատմեցի ձեզ: դուք ձեզէն իսկ վկայէք ինձ, թէ գուցէ՞ այլ Աստուած բաց յինէն: Եւ յայնժամ իսկ ոչ ինչ էին ամենեքեան.
9․ որ ստեղծանէին եւ դրաւշէին զսնոտիսն. որ առնէին ըստ ցանկութեան իւրեանց, որք ոչ աւգնիցեն նոցա. եւ վկայք դուք էք նոցա, զի ոչ տեսանեն եւ ոչ իմանան: Զի ամաչեսցէ
10․ որ ստեղծանէ զստեղծուածն, եւ ձուլէ զդրաւշեալն յանաւգուտ.
11․ եւ ամենեքին որ հաղորդեսցին նմա: Այլ ամաչեսցեն ամենեքեան որ ստեղծանեն կուռս, եւ դրաւշեն զանաւգուտսն. եւ ամենեքեան ուստի եղենն` ցամաքեցան, խլացեալք ի մարդկանէ: ժողովեսցին ամենեքեան` յանդիման կացցեն ի միասին. ամաչեսցեն եւ յամաւթ լիցին առհասարակ:
12․ Զի թեքեաց հեւսն զգործի իւր. ուրագ սրեաց, եւ կոփեաց նովաւ. դրով գործեաց եւ դրաւշեաց զնա, եւ զաւրութեամբ բազկի իւրոյ կանգնեաց զնա. քաղցիցէ եւ տկարասցի, եւ ոչ արբցէ ջուր:
13․ Ընտրեաց հեւսն փայտ. չափով կշռեաց զնա` եւ դրաւշեաց ի նմանութիւն պատկերի. գրով կարգեաց զնա, եւ մածոյց զնա սոսնձով, եւ արար ի պատկեր առն, եւ ի զարդ գեղոյ երեսաց մարդոյ. հաստատեաց զնա ի տան իւրում:
14․ Զայն փայտ զոր եհատն. զսարոյն` կամ զսաւսն, զկաղնին կամ զթեղաւշն. զոր տնկեաց Տէր` եւ աճեցոյց անձրեւ,
15․ զի իցէ մարդկան այրելի. առեալ ի նմանէ այրեաց եւ ջեռաւ. եւ ի կիսոյն արար հաց, եւ զկէսն արար պատկեր. եւ երկիր եպագ նոցա: եւ զոր իւրովին պատկեր գործեաց, անկեալ առաջի այնմ երկիր պագանէ:
16․ Զորոյ զկէսն այրեաց ի խարուկի, եւ եփեաց կայծակամբք նորա հաց` եւ խորովեաց միս. կերաւ եւ յագեցաւ եւ ջեռաւ, եւ ասէ` վաշ ինձ զի ջեռայ` եւ տեսի զկրակ:
17․ Եւ զկէսն արար յԱստուած դրաւշեալ, եւ խոնարհեալ երկիր եպագ նմա. յաղաւթս կայ առ նա` եւ ասէ. փրկեա զիս զի Աստուած իմ ես դու:
18․ Ոչ առին ի միտ իմանալ, զի շլացան տեսանել աչաւք իւրեանց, եւ իմանալ սրտիւք իւրեանց:
19․ Եւ ոչ ածին զմտաւ, զի ոչ ծանեան խորհրդովք` թէ զկէս փայտին այրեցին ի հուր, եւ ի վերայ կայծականց նորա հաց արարին, եւ միս խորովեցին` եւ կերան. եւ զկէսն ի նմանէ արարին պատկեր` եւ երկիր պագանեն նմա:
20․ Գիտասջիր զի մոխիր է սիրտ նոցա, եւ մոլորեալ են. եւ ոչ ոք ի նոցանէ կարէ փրկել զանձինս նոցա: տեսէք եւ ոչ ասացէք` թէ խաբէութիւն է ի ձեռս ձեր:
21․ Յուշ լիցի քեզ այդ Յակովբ, եւ Իսրայէլ զի ծառայ իմ ես դու. ինձ ստեղծի զքեզ ի ծառայութիւն. եւ Իսրայէլ` մի մոռանար զիս:
22․ զի ահաւասիկ ջնջեցից իբրեւ զամպ զանաւրէնութիւնս քո, եւ իբրեւ զմէգ զմեղս քո. դարձ առ իս` եւ փրկեցից զքեզ:
23․ Ուրախ եղիցին երկինք` զի ողորմեցաւ Աստուած Իսրայէլի: փող հարէք հիմունք երկրի. գոչեցէք լերինք զուրախութիւն, բլուրք եւ ամենայն ծառք որ ի նոսա. զի փրկեաց Աստուած զՅակովբ, եւ Իսրայէլ փառաւորեսցի:
24․ Այսպէս ասէ Տէր որ փրկեացն զքեզ, եւ ստեղծ զքեզ յորովայնէ. ես եմ Տէր որ առնեմ, կատարեմ զամենայն. ձգեցի զերկինս միայն, եւ հաստատեցի զերկիր:
25․ Ո՞ այլոք ցրեաց զնշանս վոհկաց, եւ զըղձութիւնս ի սրտից: ո՞ դարձուցանէ զիմաստունս յետս, եւ զխորհուրդս նոցա յիմարեցուցանէ:
26․ եւ հաստատէ զբանս ծառայից իւրոց. եւ զխորհուրդս հրեշտակաց իւրոց արդարացուցանէ: Ես եմ որ ասեմ ցԵրուսաղէմ թէ բնակեսջիր. եւ ցքաղաքս Հրէաստանի` թէ շինեսջիք վերստին, եւ զաւերակս նորա կանգնեցից:
27․ Որ ասեմ ցանդունդս թէ աւերեսջիր, եւ զգետս նորա ցամաքեցուցից:
28․ որ ասեմ ցԿիւրոս թէ իմաստնասջիր, եւ զամենայն կամս իմ արասցես: որ ասեմ ցԵրուսաղէմ թէ շինեսջիր, եւ զտաճարն իմ սուրբ` հաստատեցից:
Հաղորդում կայքում սխալի վերաբերյալ
Տվյալ հատվածում առկա է սխալ: