Պատգամ Տիւրոսի:
1․ Ողբացէք նաւք կարքէդովնացւոց, զի կորեան եւ ոչ եւս գայցեն յերկրէն կիտացւոց. վարեցան ի գերութեան:
2․ Ու՞մ նմանեցան բնակիչք կղզոյդ այդորիկ: վաճառականք փիւնիկեցւոց որ անցանեն ընդ ծով, ընդ ջուրս բազումս.
3․ զաւակ գնողիցն իբրեւ զարդիւնս ամարայնոյ ամփոփելոյ վաճառականք ազգացն:
4․ Յամաւթ լեր Սիդոն` ասէ ծով. եւ զաւրութիւն ծովու ասասցէ, ո՞չ երկնեցի, եւ ո՞չ ծնայ, եւ ո՞չ սնուցի երիտասարդս, եւ ո՞չ բարձրացուցի կուսանս:
5․ Իսկ յորժամ լուր լիցի, յերկիրն Եգիպտացւոց, եւ ցաւք կալցին զնա վասն Տիւրոսի:
6․ Երթայք ի Կարքեդոն. ողբացէք բնակիչք կղզւոյդ այդորիկ:
7․ Ո՞չ այդ իսկ էր ամբարտաւանութիւն ձեր ի սկզբանէ, մինչչեւ մատնեալ էր նորա. եւ վարեսցի նա յոտից իւրոց ի պանդխտութիւն հեռաւոր:
8․ Իսկ ո՞ խորհեցաւ զայս ի վերայ Տիւրոսի. միթէ ի վա՞յր ինչ ոք էր` կամ տկա՞ր ոք. նա` վաճառականք նորա փառաւորք Քանանացւոց, եւ առ գնաւղք նորա իշխանք երկրի:
9․ Տէր զաւրութեանց խորհեցաւ քակել զամենայն ամբարտաւանութիւն փառաւորաց. եւ անարգել զամենայն պատուական ի վերայ երեսաց երկրի:
10․ Գործեա զերկիր քո, զի այսուհետեւ ոչ եւս գան նաւք ի Կարքեդոնայ:
11․ եւ ձեռն քո ոչ եւս զաւրասցի ի վերայ ծովու. որ զայրացուցանէիր զթագաւորս: Տէր զաւրութեանց հրամայեաց վասն Քանանու` կորուսանել զզաւրութիւն նորա:
12․ Եւ ասասցեն` եթէ այսուհետեւ մի եւս յաւելուցուք թշնամանել եւ զրկել զկոյս դուստր Սիովնի. այլ յոտն կաց` եւ անց ընդ ծով. եւ թէպէտ եւ դիմեսցես ի կիտիիս, եւ ոչ անդ լիցի քեզ հանգիստ:
13․ Եւ եթէ յերկիրն Քաղդէացւոց. սակայն եւ այն աւերեալ է յԱսորեստանեայց. եւ անդ դուլ եւ դադար քեզ ոչ գտանիցի: Արկ զհիմն նորա Սիհիմ, ¡ կանգնեաց զմահարձանս նորա, եւ յարոյց զաշտարակս նորա. արդ անկաւ կործանեցաւ պարիսպ նորա:
14․ Ողբացէք նաւք կարքեդոնացւոց, զի կորեաւ ամրութիւն ձեր:
15․ Եւ եղիցի յաւուր յայնմիկ, լքեալ լիցի Տիւրոս ամս եւթանասուն իբրեւ զժամանակ թագաւորի միոյ, եւ իբրեւ զժամանակ կենաց մարդոյ միոյ: եւ յետ ամացն եւթանասնից եղիցի Տիւրոս իբրեւ երգ պոռնկի միոջ:
16․ Առ քնար, յածեաց, կոծեաց լքեալ քաղաք պոռնկութեան, քաջ հար. յաճախեա երգել` զի քո յիշատակ մնասցէ:
17․ Եւ եղիցի յետ ամացն եւթանասնից, այց արասցէ Տէր Տիւրոսի. եւ միւս անգամ անդրէն ի նոյն յառաջին կարգն հաստատեսցի: եւ եղիցի ի նմա վաճառ ամենայն թագաւորաց տիեզերաց ընդ ամենայն երեսս երկրի:
18․ Եւ եղիցի վարձ վաճառի նորա Տեառն նուիրեալ: ոչ անձանց ինչ ժողովեսցեն, այլ բնակելոցն առաջի Տեառն եղիցին ամենայն վաճառք նորա, ուտել ըմպել` եւ ուրախ լինել ի նշան յիշատակաց առաջի Տեառն:
Հաղորդում կայքում սխալի վերաբերյալ
Տվյալ հատվածում առկա է սխալ: