1. Այսպէս ասէ Տէր. երկինք աթոռ իմ են` եւ երկիր պատուանդան ոտից իմոց: ո՞րպիսի տուն շինիցէք ինձ ասէ Տէր, կամ ո՞րպիսի ինչ իցէ այն տեղի հանգստեան իմոյ:
2. զի զայս ամենայն ձեռն իմ արար, եւ իմ է ամենայն ասէ Տէր: Եւ ես յո՞ հայեցայց, եթէ ոչ ի հեզս եւ ի խոնարհս, եւ որ դողան ի բանից իմոց:
3. Բայց անաւրէնն որ մատուցանէ ինձ եզն պատարագ` այնպէս է որպէս թէ որպէս թէ հարկանիցէ ոք զկառափն մարդոյ. եւ որ մատուցանէ զոչխար պատարագ, այնպէս է որպէս թէ զշուն ոք մորթիցէ. եւ որ մատուցանէ ոք նաշիհ, այնպէս է որպէս թէ հեղուցու ոք զարիւն խոզի. եւ որ տայցէ զկնդրուկն ի խունկս յիշատակաց, այնպէս է` որպէս զհայհոյիչն: եւ ինքեանք ընտրեցին զճանապարհս իւրեանց, եւ զգարշելիս իւրեանց զոր անձինք իւրեանց ախորժեցին:
4. Եւ ես առի ի ձեռն զխաբէութիւնս նոցա, եւ ըստ մեղաց նոցա հատուցից նոցա. զի կոչեցի զնոսա` եւ ոչ լուան ինձ, խաւսեցայ` եւ ոչ անսացին. եւ արարին չար առաջի իմ, եւ զոր ոչն կամէի ընտրեցին:
5. Լուարուք զպատգամս Տեառն, եւ որ դողայք ի բանից նորա: խաւսեցարուք եղբարք մեր ընդ ատելիս ձեր եւ ընդ գարշեցուցիչս. զի անուն Տեառն փառաւորեսցի, եւ երեւեսցի յուրախութեանն ձերում` եւ նոքա ամաչեսցեն:
6. Ձայն բարբառոյ ի քաղաքէ. ձայն ի տաճարէ. ձայն Տեառն հատուցանէ զհատուցումն հակառակորդաց:
7. եւ մինչ չեւ իցէ յղւոյն ծնեալ, եւ մինչ չեւ հասեալ իցեն ցաւք երկանց, ապրեցաւ եւ ծնաւ արու:
8. Ո՞ լուաւ, ո՞ ետես այսպիսի ինչ. եթէ երկնեաց երկիր ի միում աւուր, եւ ծնաւ ազգ մի ողջոյն միանգամայն. զի երկնեաց Սիովն, եւ ծնաւ զմանկունս իւր:
9. ես ետու քեզ զյոյսդ զայդ, եւ դու ոչ յիշեցեր զիս` ասէ Տէր: ո՞չ ապաքէն զամուլն եւ զծննդականն ես արարի` ասէ Աստուած քո:
10. Ուրախ լեր Երուսաղէմ, եւ ժողովեցարուք առնել տաւն ի դմա. ամենեքեան ոյք սիրէք զդա, խնդացէք եւ ուրախ լերուք ի միասին որ նստէիք ի սուգ վասն դորա:
11. զի դիիցէք եւ յագիցիք ի ստեանց մխիթարութեան դորա. եւ կշտապինդ վայելիցէք ի գալստենէ փառաց դորա:
12. Զի այսպէս ասէ Տէր. ահաւասիկ ես դարձուցանեմ ի դոսա իբրեւ զգետ զխաղաղութիւն, եւ իբրեւ զհեղեղատ յորդեալ զփառս հեթանոսաց. զմանկունս դոցա ի վերայ ուսոց իւրեանց բարձեալ բերիցեն, եւ ի վերայ ծնգաց իւրեանց գգուիցեն:
13. որպէս մայր որ զմանուկ իւր գգուիցէ, այնպէս գգուեցից զձեզ: եւ յԵրուսաղէմ մխիթարեսջիք.
14. եւ տեսջիք եւ խնդասցեն սիրտք ձեր, եւ ոսկերք ձեր իբրեւ զդալարի զուարճասցին. եւ ծանիցի ձեռն Տեառն երկիւղածաց իւրոց, եւ սպառնասցի անհաւատիցն:
15. Զի ահաւասիկ Տէր իբրեւ զհուր եկեսցէ, եւ կառք նորա իբրեւ զմրրիկ. հատուցանել սրտմտութեամբ զհատուցումն իւր, եւ բոցով հրոյ զարհամարհանս իւր:
16. Զի ի հուր Տեառն դատեսցի երկիր ամենայն, եւ ի սուր նորա ամենայն մարմին: Բազումք եղիցին վիրաւորք ի Տեառնէ,
17. որ սրբինն եւ մաքրին ի պարտէզս եւ ի սրահս իւրեանց: որ ուտեն միս խոզենի` եւ զգարշելիսն` եւ զմուկնն, ի միասին սատակեսցին նոքա` ասէ Տէր:
18. Եւ ես զգործս նոցա եւ զխորհուրդս նոցա գիտեմ: Գամ ժողովել զամենայն ազգս եւ զլեզուս. եկեսցեն եւ տեսցեն զփառս իմ:
19. եւ թողից ի վերայ նոցա նշան: Եւ առաքեցից ի նոցանէ փրկեալս յազգս. ի Թարսիս, եւ ի Փուդ, եւ ի Լուդ, եւ ի Մոսոգ, եւ ի Թոբէլ, եւ Յելլադա, եւ ի կղզիս հեռաւորս` որոց չիցէ լուեալ զանուն իմ, եւ ոչ եւս տեսեալ զփառս իմ. եւ պատմեսցեն զփառս իմ եւ զանուն իմ ի մէջ ազգաց:
20. եւ ածցեն զեղբարս իւրեանց յամենայն ազգաց պատարագ Տեառն. հեծեալս կառաւք` հանդերձ պալարակապ երիվարաւք հովանացաւք ի սուրբ քաղաքն Երուսաղէմ, ասէ Տէր: Որպէս մատուցին ինձ որդիքն Իսրայէլի զպատարագս իւրեանց սաղմոսիւք ի տան Տեառն:
21. եւ ի նոցանէ առից ինձ ի քահանայս եւ ի ղեւտացիս` ասէ Տէր:
22. Զոր աւրինակ երկինք նոր` եւ երկիր, նոր զոր եսն առնեմ կալ առաջի իմ, ասէ Տէր. նոյնպէս կացցէ զաւակն ձեր:
23. Եւ եղիցի ամիս յամսոյ` եւ շաբաթ ի շաբաթէ, եկեսցէ ամենայն մարմին երկիր պագանել առաջի իմ յԵրուսաղէմ` ասէ Տէր Աստուած:
24. Եւ ելցեն` եւ տեսցեն զոսկերս մարդկան առ իս յանցուցելոց. զի որդն նոցա ոչ վախճանեսցի, եւ հուր նոցա ոչ շիջցի: եւ եղիցին ի տեսիլ ամենայն մսեղեաց:
Հաղորդում կայքում սխալի վերաբերյալ
Տվյալ հատվածում առկա է սխալ: