1․ Եւ եղեւ իբրեւ լուաւ Եզեկիա արքայ, պատառեաց զպատմուճան իւր` եւ քուրձ զգեցաւ, եւ ել ի տուն Տեառն:
2․ Եւ առաքեաց զԵղիակիմ հազարապետն, եւ զՍովմնաս հրովարտակաց դպիր, եւ զծերս ի քահանայից անտի քրձազգածս առ Եսայի մարգարէ որդի Ամովսայ:
3․ Եւ ասէ ցնա. այսպէս ասէ Եզեկիա` այսաւր է աւր նեղութեան եւ նախատանաց, եւ կշտամբութեան եւ բարկութեան. յորում աւուր հասեալ են երկունք ծննդականի` եւ ոչ կարէ ծնանել:
4․ Լուիցէ Տէր Աստուած քո զբանս Ռափսակայ, զոր առաքեաց արքայն Ասորեստանեայց Տէրն նորա նախատել զԱստուած կենդանի. եւ նախատել բանիւք զորս լուաւ Տէր Աստուած քո: եւ արդ խնդրեսցես ի Տեառնէ Աստուծոյ քումմէ վասն մնացելոցս այսոցիկ.
5․ Եւ եկին ծառայքն Եզեկիայի արքայի առ Եսայի:
6․ եւ ասէ ցնոսա Եսայի, զայս ասասջիք ցտէրն ձեր. Այսպէս ասէ Տէր. ոչ երկիցես ի բանիցն զոր լուար, որովք նախատեցին զիս հրեշտակք արքային Ասորեստանեայց:
7․ Ահաւասիկ ես արկանեմ ի նա ոգի խռովութեան. եւ լուեալ համբաւ դարձցի յաշխարհ իւր, եւ անկցի ի սուր յերկրի իւրում:
8․ Եւ դարձեալ անդրէն Ռափսակայ եհաս առ արքայն Ասորեստանեայց, զի պաշարեալ էր զՂոբնան. եւ լուաւ թէ արքայն Ասորեստանեայց չուեաց ի Լաքիսայ:
9․ Եւ ել Թարակ արքայ եթւովպացւոց պաշարել զնա. եւ դարձաւ անդրէն: Եւ առաքեաց հրեշտակս առ Եզեկիա` եւ ասէ.
10․ այսպէս ասացէք ցԵզեկիա արքայ Հրէաստանի. մի խաբեսցէ զքեզ Աստուած` յոր դու յուսացեալ ես. եւ ասիցէ` թէ ոչ մատնեսցի Երուսաղէմ ի ձեռս արքային Ասորեստանեայց:
11․ Արդ` ահա չիցէ՞ լուեալ քո զոր ինչ արարին թագաւորք Ասորեստանեայց ընդ ամենայն երկիր, որպէս սատակեցին զնոսա. իսկ արդ դու ապրելո՞ց իցես:
12․ Միթէ ապրեցուցի՞ն աստուածք ազգացն զայնոսիկ զորս կորուսին հարքն իմ, զգովզան եւ զխառան եւ զհռափեթ, որ են յերկիրն Եմաթայ:
13․ ու՞ր են թագաւորք Եմաթայն եւ Արփաթայ. եւ ու՞ր են թագաւորք քաղաքին Սեփարուիմ, Անայն եւ Գաւայ:
14․ Եւ առ Եզեկիա զհրովարտակն ի ձեռաց հրեշտակացն, ընթերցաւ, եւ եմուտ ի տուն Տեառն, եւ տարածեաց առաջի Տեառն:
15․ Եւ եկաց յաղաւթս Եզեկիա առ Տէր` եւ ասէ:
16․ Տէր Սաբաւովթ. Աստուած Իսրայէլի` որ նստիս ի քրովբէս. դու ես Աստուած միայն` ամենայն թագաւորութեանց տիեզերաց. դու արարեր զերկինս եւ զերկիր:
17․ խոնարհեցո Տէր զունկն քո` եւ լուր. բաց Տէր զաչս քո, նայեաց Տէր. լուր Տէր, եւ տես զպատգամս զոր առաքեաց Սենեքերիմ արքայ Ասորեստանեայց նախատել զԱստուած կենդանի:
18․ Եւ արդարեւ աւերեցին թագաւորքն Ասորեստանի զաշխարհս ամենայն եւ զերկիր նոցա.
19․ եւ հրձիգ արարին զկուռս նոցա. քանզի չէին աստուածք, այլ ձեռագործք մարդկան, փայտեղէնք եւ քարեղէնք, եւ կորուսին զնոսա:
20․ Բայց արդ Տէր Աստուած մեր` ապրեցո զմեզ ի ձեռաց նորա. զի ծանիցեն ամենայն թագաւորութիւնք երկրի` թէ դու միայն ես Աստուած:
21․ Եւ առաքեցաւ Եսայի որդի Ամովսայ առ Եզեկիա` եւ ասէ ցնա. այսպէս ասէ Տէր Աստուած Իսրայէլի. լուայ աղաւթիցն զոր աղաչեցեր առ իս` վասն Սենեքերիմայ արքային Ասորեստանեայց:
22․ արդ այս բան է զոր խաւսեցաւ վասն նորա Աստուած: Անգոսնեա՞ց արհամարհեա՞ց զքեզ դուստր Սիովնի. գլո՞ւխ շարժեաց ի վերայ դուստր Երուսաղէմի:
23․ զո՞ նախատեցեր եւ գրգռեցեր, եւ առ ո՞ բարձրացուցեր զբարբառ քո. եւ ոչ ամբարձեր զաչս ի բարձունս ի սուրբն Իսրայէլի:
24․ զի՞ ի ձեռն հրեշտակաց նախատեցեր զՏէր: Դու ասէիր թէ բազմութեամբ կառաց իմոց ելից ի բարձրութիւն լերանց, եւ ի ծագս Լիբանանու. եւ կոտորեցից զբարձրութիւն մայրից նորա, եւ զգեղեցկութիւն նոճից նորա: եւ մտից ի բարձրութիւն կողմանց անտառին:
25․ եւ արկից կամուրջ, եւ աւերեցից զջուրսն եւ զամենայն ժողովս ջուրցն:
26․ Չիցէ՞ լուեալ քո զոր յառաջագոյն արարի ես յաւուրցն առաջնոց. զոր կարգեցի եւ այժմ յայտնեցի աւերել զհեթանոսս յամուրս իւրեանց:
27․ եւ զբնակիչս քաղաքաց յիւրաքանչիւր ամրոցաց, թողի ի ձեռաց` եւ ցամաքեցան. եւ եղեն իբրեւ զխոտ ցամաքեալ ի վերայ տանեաց` եւ իբրեւ զսէզ չորացեալ:
28․ Արդ զկայս հանգստեան քոյ, եւ զել եւ զմուտ ճանապարհաց քոց ես ինձէն գիտեմ.
29․ եւ սրտմտութիւն քո զոր սրտմտեցեր, եւ դառնութիւն քո ել առաջի իմ. եւ արկից վարապան ի ցռուկք քո, եւ դանդանաւանդ ի կզակս քո. եւ դարձուցից զքեզ ընդ նոյն ճանապարհ ընդ որ եկիր:
30․ Այլ քեզ այս եղիցի նշան. կերիցես այս ամ զսերմանեալդ, եւ յամէ եւս կերիցես զմնացորդսն. եւ յամին երրորդում սերմանեսջիք եւ հնձեսջիք, տնկեսջիք այգիս` եւ կերիջիք զպտուղ նորա:
31․ Եւ եղիցին մնացորդքն Հրէաստանի արձակել արմատս ի խոնարհ, եւ տալ պտուղ ի վեր:
32․ զի յԵրուսաղէմ եղիցին մնացեալք, եւ ի լերին Սիովնի ապրեալք: զի նախանձ Տեառն զաւրութեանց արար զայս:
33․ Վասն այսորիկ այսպէս ասէ Տէր ի վերայ թագաւորին Ասորեստանեաց. մի մտցէ ի քաղաքս յայս, եւ մի նետս արկցէ ի վերայ դորա. եւ մի փակեսցէ զդա վահանաւք, եւ մի պաշարեսցէ զդա պատնիշաւք.
34․ այլ ճանապարհ ընդ որ եկն ընդ նոյն դարձցի, եւ ի քաղաքն յայն մի մտցէ: Այսպէս ասէ Տէր.
35․ վերակացու եղէց քաղաքիդ այդմիկ. ապրեցուցանել զդա, վասն իմ եւ վասն Դաւթի ծառայի իմոյ:
36․ Եւ ել հրեշտակ Տեառն, եւ սատակեաց ի բանակէ անտի Ասորեստանեայցն` հարեւր ութսուն եւ հինգ հազար: եւ յարեան ընդ առաւաւտն` գտին զայն ամենայն մարմին մեռեալ:
37․ Եւ դարձաւ անդրէն` գնաց Սենեքերիմ արքայն Ասորեստանեայց, բնակեալ ի Նինուէ:
38․ Եւ մինչդեռ երկիր պագանէր ի տան իւրում Նասրաքայ կռոց իւրոց, Ադրամելէք եւ Սարասար որդիք նորա սպանին զնա սրով, եւ ինքեանք գնացին փախստական ի Հայս: եւ թագաւորեաց Ասորդան որդի նորա ընդ նորա:
Հաղորդում կայքում սխալի վերաբերյալ
Տվյալ հատվածում առկա է սխալ: