Գլուխ 36

   
1․ Եւ եղեւ ի չորեքտասաներորդի ամի թագաւորութեանն Եզեկիայ, ել Սենեքերիմ արքայ Ասորեստանեայց ի վերայ ամուր քաղաքաց Հրէաստանի, եւ առ զնոսա:

2․ Եւ առաքեաց արքայն Ասորեստանեայց զՌափսակ ի Լաքիսայ յԵրուսաղէմ առ արքայն Եզեկիայ զաւրաւք բազմաւք. եւ եկն եկաց ի վերայ ջրմղի վերնոյ աւազանին ի ճանապարհի ագարակին թափչաց:

3․ Եւ ելին առ նա Եղիակիմ Քեղկեայ որ հազարապետն էր, եւ Սովմնաս` հրովարտակաց դպիր, եւ Յովաք Ասափայ` յիշատակաց դպիր:

4․ Եւ ասէ ցնոսա Ռափսակ. երթայք ասացէք ցԵզեկիա, այսպէս ասէ մեծ արքայն Ասորեստանեայց, յո՞ յուսացեալ իցես.

5․ միթէ խորհրդով կամ բանիւ շրթանց պատերա՞զմ վճարիցի. իսկ արդ` յո՞ յուսացեալ իցես զի ոչ հնազանդիս ինձ:

6․ Ահաւասիկ յուսացեալ ես ի ցուպն եղեգնեայ` ի ջախջախ յեգիպտացին. յոր թէ յենուցու ոք` խորտակի եւ ընդ ձեռս ելանէ. այնպէս է փարաւոն արքայն եգիպտացւոց, եւ ամենեքեան  որ յուսացեալ են ի նա:

7․ Իսկ եթէ ասիցէք, եթէ ի Տէր Աստուած մեր յուսացեալ եմք. ո՞չ ապաքէն նա է` վասն որոյ քակեաց Եզեկիա զբարձունս եւ զսեղանս նոցա. եւ պատուէր ետ Հրէաստանի` եւ Երուսաղէմի,առաջի նորա սեղանոյն միայն երկիր պագանել:

8․ Այլ արդ` եկայք խառնեցարուք ընդ տեառն իմում արքային ասորեստանեայց. եւ տաց ձեզ երկուս հազարս երիվարաց, եթէ կարիցէք տալ հեծեալս ի վերայ նոցա:

9․ Եւ զիա՞րդ կարիցէք ի դիմի հարկանել միում յաշխարհակալաց ծառայից տեառն իմոյ, որք յուսացեալ էք յԵգիպտոս ի հեծեալս եւ յերիվարս նոցա:

10․ Իսկ արդ մեք առանց Տեա՞ռն եկեալ իցեմք յերկիրս յայս տալ ընդ սմա պատերազմ. Տէր ասաց ցիս, ել յերկիրն յայն, եւ ապականեա զնա:

11․ Եւ ասէ ցնա Եղիակիմ, եւ Սովմնաս, եւ Յովաք. խաւսեաց ընդ ծառայս քո ասորերէն` զի լսեմք, եւ մի խաւսիր ընդ մեզ հրէարէն. եւ ընդէ՞ր խաւսիս յականջս մարդկանս որ անկեալ կան զպարսպաւս:

12․ Ասէ ցնոսա Ռափսակ. միթէ առ տէ՞րն ձեր` կամ առ ձե՞զ առաքեաց զիս տէր իմ խաւսել զբանս զայսոսիկ. ո՞չ ապաքէն առ մարդիկդ որ նստին ի վերայ պարսպիդ. զի մի ուտիցեն զաղբ եւ ըմպիցեն զմէզս իւրեանց ձեւք հանդերձ:

13․ Յոտն եկաց Ռափսակ` եւ աղաղակեաց ի ձայն մեծ հրէարէն` եւ ասէ. լուարուք զպատգամս թագաւորին մեծի արքային ասորեստանեայց:

14․ Այսպէս ասէ արքայ. մի պատրեսցէ զձեզ Եզեկիա բանիւք` որովք ոչ կարէ փրկել զձեզ:

15․ Եւ մի խաբեսցէ զձեզ Եզեկիա` թէ Աստուած փրկեսցէ զձեզ, եւ ոչ մատնիցի քաղաքս ի ձեռս թագաւորին ասորեստանեայց:

16․ մի անսայք Եզեկիայ: Այսպէս ասէ արքայն ասորեստանեայց. եթէ կամիցիք դիւրել անձանց, եկայք ելէք առ իս. եւ կերիջիք իւրաքանչիւր զայգի իւր եւ զթզենի, եւ արբջիք ջուր ի ջրհորոց ձերոց:

17․ մինչչեւ եկից եւ տարայց զձեզ յերկիրն` որ իբրեւ զերկիրս ձեր է. երկիր ցորենոյ եւ գինւոյ, հացաւետ եւ գինաւետ:

18․ Մի խաբեսցէ զձեզ Եզեկիա` եւ ասասցէ թէ Աստուած փրկէ զձեզ. միթէ փրկեցի՞ն աստուածք ազգացն զիւրաքանչիւր երկիր ի ձեռաց արքային ասորեստանեայց:

19․ Ու՞ր է աստուած Եմաթայն` եւ Արփաթայ. եւ ո՞ւր է աստուած քաղաքին Սեփարուիմ. միթէ կարացի՞ն փրկել զՍամարիա ի ձեռաց իմոց:

20․ Ո՞ ոք յաստուածոց ամենայն ազգացն այնոցիկ կարաց փրկել զերկիր իւր ի ձեռաց իմոց, զի եւ ձեր աստուածդ փրկեսցէ զԵրուսաղէմ ի ձեռաց իմոց:

21․ Լուռ եղեն եւ ոչ ինչ ետուն պատասխանի, վասն հրամանի թագաւորին չտալ պատասխանի:

22․ Եւ եմուտ Եղիակիմ Քեղկեայ որ հազարապետն էր` եւ Սովմնաս հրովարտակաց դպիր` եւ Յովաք Ասափայ յիշատակաց դպիր առ Եզեկիա` զաւձիս պատառեալ, եւ պատմեցին նմա զբանս Ռափսակայ: