1․ Եւ եղեւ ի ժամանակին յայնմիկ հիւանդանալ Եզեկիայ մինչչեւ ի մահ: եւ եկն առ նա Եսայի որդի Ամովսայ` եւ ասէ ցնա. այսպէս ասէ Տէր. հրաման տուր վասն տան քոյ` զի մեռանիս եւ ոչ կեաս:
2․ Եւ դարձոյց Եզեկիա զերես իւր յորմն անդր, յաղաւթս եկաց
3․ եւ ասէ` ո՞ Տէր. յիշեա զիս Տէր զի գնացի առաջի քո արդարութեամբ եւ ճշմարտութեամբ սրտիւ, եւ զհաճոյս առաջի քո արարի: եւ ելաց Եզեկիա լալիւն մեծ:
4․ Եւ եղեւ բան Տեառն առ Եսայի` եւ ասէ.
5․ երթ` եւ ասա ցԵզեկիա. այսպէս ասէ Տէր Աստուած Դաւթի հաւր քո. լուայ բարբառոյ աղաւթից քոց, եւ տեսի զարտասուս քո. ահաւադիկ յաւելում ի ժամանակս քո ամս հինգետասան:
6․ եւ ի ձեռաց արքային Ասորեստանեայց ապրեցուցից զքեզ եւ զքաղաքդ զայդ. եւ վերակացու եղէց քաղաքիդ այդմիկ:
7․ Եւ այս քեզ նշան ի Տեառնէ, թէ առնիցէ Աստուած զբանդ զայդ զոր խաւսեցաւ:
8․ ահաւասիկ ես դարձուցանեմ զստուեր աշտիճանացդ, ընդ որ իջեալ է շողդ, զտասն աշտիճանաւ տան քոյ. եւ դարձուցից զշողդ զտասնեքումք աշտիճանաւքդ: Եւ ել շողն զտասնեքումք աստիճանաւք` ընդ որ իջեալ էր ստուերին:
9․ Աղաւթք Եզեկիայ արքայի Հրէաստանի ի ժամանակի յորում հիւանդացաւ` եւ յարեաւ ի հիւանդութենէ իւրմէ:
10․ Ես ասացի ի վերանալ աւուրց իմոց գնացից ի դրունս դժոխոց: Թողի զմնացորդս ամաց իմոց:
11․ ասացի թէ ոչ եւս տեսից զփրկութիւն Աստուծոյ ի վերայ երկրի, եւ ոչ եւս տեսից զմարդն բնակչաւք իւրովք:
12․ Պակասեցայ ես յազգատոհմէ իմմէ. թողի զմնացորդս կենաց իմոց. ելին եւ գնացին յինէն` որպէս որ քակէ զտաղաւար կանգնեալ: եղեւ հոգի իմ առ յինէն իբրեւ ոստայն սատարաց մերձ ի հատանել:
13․ Յաւուր յայնմիկ մատնեցայ մինչչեւ յառաւաւտ: իբրեւ զառեւծ այնպէս խորտակեաց զոսկերս իմ, զի ի տունջենէ մինչչեւ ի գիշեր մատնեցայ:
14․ Իբրեւ զծիծառն այնպէս ճչեցի, եւ իբրեւ զաղաւնի այնպէս մնչեցի. զի նուաղեցան աչք իմ ի հայելոյ ի բարձունս երկնից առ Տէր որ փրկեացն զիս, եւ փարատեցոյց զցաւս անձին իմոյ:
15․ եւ ինքն կարգեաց զամենայն ամս իմ ի դառնութիւն անձին իմոյ:
16․ Տէր վասն այսորիկ պատմեցաւ քեզ, զարթուցեր զհոգի իմ, մխիթարեցայ` եւ կեցի:
17․ Ահաւասիկ ի խաղաղութիւն դարձաւ դառնութիւն իմ. փրկեցեր զանձն իմ զի մի կորեայց, եւ ընկեցեր յետոյ իմ զամենայն զմեղս իմ:
18․ Զի ոչ թէ որ ի դժոխս են` խոստովան առնիցին առ քեզ. եւ ոչ մեռեալք աւրհնեսցեն զքեզ, եւ ոչ յուսասցին յողորմութիւնս քո` ոյք իջանեն ի գուբ:
19․ Այլ կենդանիք աւրհնեսցեն զքեզ. որպէս եւ եսս այսուհետեւ մանկունս ծնայց, որ պատմեսցեն զարդարութիւն քո,
20․ Տէր փրկութեան իմոյ: Եւ ոչ դադարեցից աւրհնել զքեզ սաղմոսարանաւ զամենայն աւուրս կենաց իմոց, յանդիման տաճարիդ Աստուծոյ:
21․ Եւ ասէ Եսայի ցԵզեկիա. առ դու պաղատիտս թզոյ` մանրեա եւ դիր ի վերայ վիրիդ` եւ ողջասցիս:
22․ Եւ ասէ. այդ եղիցի նշան եթէ ելանիցեմ ի տունն Աստուծոյ:
Հաղորդում կայքում սխալի վերաբերյալ
Տվյալ հատվածում առկա է սխալ: