Գլուխ 13

   
1. Տեսիլ Բաբելացւոց. զոր ետես Եսայի որդի Ամովսայ:

2. Ի վերայ լերինն դաշտականի առէք նշան: բարձրացուցէք զբարբառ ձեր ի վերայ նոցա: մի երկնչիք կոչեցէք ձեռամբ. բացէք իշխանք,

3. եւ ես տաց հրաման: Նուիրեալք են` եւ ես ածից զնոսա. դիմեալ գան սկայք յագեցուցանել զսրտմտութիւն իմ. խնդան` գան միանգամայն, եւ թշնամանեն:

4. Ձայն ազգաց բազմաց ի վերայ լերանց` ի նմանութիւն ազգաց բազմաց: ձայն թագաւորաց եւ ազանց միահամուռ ժողովելոց: Տէր զաւրութեանց հրաման ետ ազգաց սպառազինաց,

5. գալ յերկրէ հեռաստանէ ի ծագաց հիմանց երկնից: Հասեալ է Տէր իւրովք սպառազինաւք սատակել զամենայն տիեզերս:

6. Ողբացէք զի մերձ է աւր Տեառն, եւ բեկումն յԱստուծոյ հասեալ է:

7. Վասն այսորիկ ամենայն ձեռք լքցին, եւ ամենայն անձն մարդոյ դողասցէ:

8. Խռովեսցին հրեշտակք, եւ երկունք կալցին զնոսա իբրեւ զկանայս ծննդականս: փռընկայցեն այր ընդ ընկերի` եւ զայրասցին. եւ զդէմս իւրեանց ի բոցագոյն դարձուսցեն:

9. Զի ահաւասիկ Տէր զաւրութեանց հասեալ է անհնարին լի բարկութեամբ` ոխակալութեամբ սրտմտութեամբ. առնել զտիեզերս անապատ, եւ զմեղաւորս սատակել ի նմանէ:

10. Զի աստեղք երկնից Հայկիւն հանդերձ, եւ ամենայն զարդուն երկնից լոյս մի տացեն. եւ խաւարեսցի արեգակն ի ծագել իւրում, եւ լուսին մի տացէ զլոյս իւր:

11. Եւ հրաման տաց ընդ ամենայն տիեզերս զչարիս, եւ ամպարշտաց զմեղս իւրեանց. եւ կորուսից զհպարտութիւն զանաւրինաց, եւ զբարձրութիւն ամբարտաւանից խոնարհեցուցից:

12. Եւ եղիցին մնացեալքն պատուականք առաւել քան զոսկի անհուր. եւ մարդն պատուական եղիցի քան զականս Սովփերայ:

13. Զի երկինք զայրասցին, եւ երկիր սասանեսցի ի հիմանց իւրոց, վասն սրտմտութեան բարկութեան Տեառն զաւրութեանց. յաւուր յորում հասեալ իցէ սրտմտութիւն նորա:

14. Եւ եղիցին մնացեալքն իբրեւ զայծեամն փախուցեալ, եւ իբրեւ զոչխարս մոլորեալ. եւ ոչ ոք իցէ որ ժողովիցէ: զի մարդն անդրէն ի ժողովուրդ իւր դարձցի, եւ այր իւրաքանչիւր յերկիր իւր հալածեսցի:

15. Զի որ ըմբռնեսցի` ի պարտութիւն մատնեսցի, եւ ժողովեալքն ի սուր անկցին:

16. Եւ զորդիս նոցա` առաջի նոցա սատակեսցեն, եւ զտունս նոցա աւար հարկանիցեն, եւ զկանայս նոցա խայտառակեսցեն:

17. Ահաւասիկ յարուցանեմ ի վերայ ձեր զմարս` որ ոչինչ համարին զարծաթ եւ զոսկի:

18. Զաղեղունս երիտասարդաց խորտակեսցեն, եւ որդւոցն ձերոց մի ողորմեսցին, եւ ի մանկունս ձեր ոչ խնայեսցէ ակն նոցա:

19. Եւ եղիցի Բաբելովն որ փառաւորն կոչի ի թագաւորէն քաղդէացւոց. որպէս կործանեաց Աստուած զՍոդոմ եւ զԳոմոր:

20. Եւ ոչ բնակեսցէ յաւիտեանս ժամանակաց. եւ մի մտցեն ի նմա յազգս բազումս, եւ մի եւս անցցեն ընդ նա արաբացիք. եւ հովիւք մի հանգիցեն ի նմա:

21. Այլ անդ հանգիցեն գազանք վայրենիք. եւ լցցին տունք նոցա աղաղակաւ. եւ անդ հանգիցեն համբարուք, եւ անդ դեւք կաքաւեսցեն.

22. եւ յուշկապարիկք բնակեսցեն ի նմա. եւ ոզնիք ձագս հանցեն յապարանս նորա: