Գլուխ 26

   
1․ Յաւուր յայնմիկ երգեսցեն զերգս զայս յերկրին Հրէաստանի. թէ ահաւասիկ քաղաք զաւրացեալ եւ փրկութիւն մեր. կանգնեսցէ պարիսպ եւ պատուարս:

2․ Բացէք զդրունս ձեր, եւ մտցէ ժողովուրդ որ պահէ զարդարութիւն:

3․ եւ պահէ զճշմարտութիւն. վերակացու ճշմարտութեան. եւ պահէ զխաղաղութիւն. խաղաղութիւն:

4․ Զի ի քեզ յուսով յուսացաք Տէր մինչչեւ յաւիտեան:

5․ Որ խոնարհեցուցեր իջուցեր զբնակիչս բարձանց. զքաղաքս հզաւրս կործանեսցես, եւ իջուսցես զնոսա մինչչեւ ի յատակս:

6․ Կոխեսցեն զնոսա ոտք հեզոց եւ խոնարհաց, գնացք տնանկաց:

7․ ճանապարհք բարեպաշտաց ուղիղ են.  դիւրեալ եւ պատրաստեալ են ճանապարք աստուածապաշտաց:

8․ Զի ճանապարհք Տեառն իրաւունք են. յուսացաք յանուն քո` եւ ի յիշատակս ցանկութեամբ ոգւոց որում ցանկացաւ անձն մեր:

9․ Գիշերաց կանխէ հոգի իմ առ քեզ Աստուած, զի լոյս են հրամանք քո ի վերայ երկրի. զարդարութիւն ուսարուք բնակիչք երկրի:

10․ զի կարկեցաւ ամպարիշտն: եւ ամենայն որ ոչ ուսանի զարդարութիւն յերկրի, ոչ արասցէ ճշմարտութիւն: բարձցի ամպարիշտն, զի մի տեսցէ զփառս Տեառն:

11․ Տէր բազուկ քո բարձր, եւ ոչ ծանեան. ծանիցեն` եւ ամաչեսցեն, նախանձ առցէ զժողովուրդն անխրատ: եւ այժմ հուր զհակառակորդս կերիցէ:

12․ Տէր Աստուած մեր տուր մեզ զխաղաղութիւն. զամենայն ինչ հատուցեր մեզ,

13․ Տէր Աստուած մեր ստացիր զմեզ. Տէր` բաց ի քէն զայլ ոք ոչ գիտեմք, եւ զանուն քո անուանեմք:

14․ Իսկ մեռեալք` զկեանս ոչ տեսանիցեն, եւ բժիշկք ոչ յարուսցեն: Վասն այսորիկ ածեր սատակեցեր եւ կորուսեր զամենայն արու նոցա:

15․ յաւել նոցա Տէր չարիս, յաւել չարիս ի վերայ փառաւորաց երկրի. յերկարեցեր ամենայն ծագաց երկրի:

16․ Տէր ի նեղութեան յիշեցաք զքեզ, զի փոքր նեղութիւն է խրատ քո մեզ:

17․ եւ որպէս որ երկնիցէն մերձ ի ծնանել, եւ առ ցաւս իւր ճչիցէ. այնպէս եղեաք սիրելւոյն քում: Վասն երկիւղի քոյ Տէր,

18․ յղացաք` երկնեցաք` եւ ծնաք զհոգի փրկութեան քոյ. արարաք ի վերայ երկրի: Ոչ եւս կործանեսցուք մեք, այլ կործանեսցին բնակիչք երկրի:

19․ Յարիցեն մեռեալք` եւ կանգնեսցին որ իցեն ի գերեզմանս, եւ ուրախ եղիցին յերկրի, զի ցաւղդ որ ի քէն է` բժշկութիւն է նոցա: բայց երկիր ամպարշտաց կործանեսցի:

20․ Գնա ժողովուրդ իմ` մուտ ի շտեմարանս քո. փակեա զդուրս քո. թաքիր առ ժամանակ մի, մինչչեւ անցցէ բարկութիւն Տեառն:

21․ Զի ահաւասիկ Տէր ի սրբութենէ իւրմէ ածցէ բարկութիւն ի վերայ բնակչաց երկրի. եւ յայտնեսցէ երկիր զարիւն իւր, եւ ոչ ծածկեսցէ զսպանեալսն: